¹ Si dakhi i, Isa keluakh i hapo nai janah dogok i biding dano. ² Janah, jehma mbue mekhpulung khoh taba-Sa. Kekhna idi, naik mo Ia mi bongki bakhu kundul, janah jehma mbue i cendekh i biding dano. ³ Bakhu Ia mendokken dom khana mi kalak i i bas pekhumpaen, ni-Na mo, lot hada kalak penabukh laus lako menabukh, ⁴ Janah ndekhkhang menabukh, piga-piga benih ndabuh mi biding dalan, manuk-manuk pe khoh janah kipangani janah sampe kekhi. ⁵ Benih sideban ndabuh i bekas si mekhbatu, si otang lot mbue tanohna, janah ndokh tubuh kumekhna otang mbages tanohna. ⁶ Tapi naidi, enggo kesa mbincakh mata niakhi, sinuan idi pe kena akhi. Janah, kekhna otang lot ukhatna, sinuan idi pe menjadi kekhah ⁷ Benih si deban ndabuh i semak dokhi, janah semak dokhkhi idi pe nggelluh bakhu menjeppitsa. ⁸ Tapi, benih si deban pe ndabuh mi tanoh si mende janah menghasilken buah, lot mo sekhatus kali lipat, deket lot mang mo enem puluh kali lipat, bakhu lot mang tellu puluh kali lipat, ⁹ Ise mekhcoping beli mo ia mendengkohken." ¹⁰ Janah, pengekut-pengekut Isa khoh janah mengkuso taba-Sa, "Kasa Kona mecekhok bak kalak i i bas pekhumpamaen?" ¹¹ Isa mengaloi kalak i, "Bamu enggo i bekhekken kakhunia lako memetoh khahasia Kekhajen Sokhga, tapi be kalak i otang ngo i bekhekken kakhunia. ¹² Kumekhna, jehma si lot bana, bana kenah i bekhekken deket ia kenah mekhkelimpahen. Tapi, ise si otang lot bana, bahken kade pe si lot bana gabe i amet bana nai. ¹³ Kumekhna idi ngo, Aku mecekhok be kalak i i bages pekhumpamaen kumekhna enggo kesa mengidah, kalak i otang mengidah, deket otang mengekhti. ¹⁴ Tekhsenget kalak i, saut mo bage sini dokken nabi Yesaya si i dokken, 'mekhkiteken pemegen, kona kenah memegge, tapi otang ngo mengantusi. Janah, mekhkiteken mengidah, kona kenah mengidah, tapi otang mengantusi.' ¹⁵ Kumekhna ate bangsa i enggo mpihikh, coping kalak i otang ngget lako memegge, deket kalak i pecengken kalak i matana. Mula otang, tentu mo bisa kalak i bisa mengidah deket mata kalak i, memegge deket coping kalak i, janah boi mengantusi deket ate kalak i, bakhu mo khoh mendahiken Aku janah i penjuah.' Yesaya 6:9-10 ¹⁶ Tapi, i jamoti mo matamu kumekhna mengidah janah copingmu kekhna memegge. ¹⁷ Aku mendokken si tuhuna bamu bahwa mbue nabi deket jehma-jehma si benakh si pot mengidah kade si i idah kona, tapi otang boi mengidahna, deket pot mendengkoh kade si i dengkoh kona, tapi otang memeggesa." ¹⁸ Kekhna idi, dengkohken mo lapaten tekhsenget penabukh. ¹⁹ Enggo kesa kalak mendengkohken fikhman Kekhajaen janah otang mengantusi, si jahat khoh janah ki khampok kade si enggo tekhtabukh i bages ate kalak i. En mo kalak benih na si tekhtabukh i biding dalan. ²⁰ Lot kin pe si tekhtabukh i bekas-bekas si mekhbatu, idimo kalak si mendengkohken fikhman janah tekhus menjalosa janah mekhlolo ate, ²¹ tapi otang lot ukhat i bas dikhina deket mekhtahan segejab sambin. Janah, enggo kesa khoh kini mpekhsah deket kini ndekhsa idi tekhjadi kumekhna, fikhman idi, ia langsung ndabuh. ²² Benih si ndabuh i sampekhen-sampekhen imo kalak si mendengkoh fikhman idi, enggo kesa i kini khoga duniaen deket tipu daya kini beak mendesak fikhman i otang ne lot mekhbuah. ²³ Tapi, kalak si benihna si tekhtabukh i tanoh si mende, idi mo kalak si mendengkohken fikhman idi janah mengantusisa. Ia mo si tuhu-tuhu mekhbuah janah mehasilken, lot 100 kali lipat, sedeban 60 deket sedeban 30. ²⁴ Isa ki pe soh pekhumpamaenna si deban be kalak i, ni-Na mo,"Kekhajaen Sokhga i boi i umpamaken bage kalak si menabukhken benih si mende i jumana. ²⁵ Tapi, sendekhang kalak i metdem khoh mo alona janah menabukhken benih khih i i antakha benih page i, janah laus. ²⁶ Enggo kesa sinuan idi mekhtunas deket mekhbulikh, enggo kesa i dukut idi pe tekhidah mo. ²⁷ Janah, pengekut-pengekut i si dasa juma idi khoh deket mengkuso taba-Sa, 'Tuan, otang pana kona si menabukh benih si si mende i jumamu? Jadi, idike nai mo dukut idi khoh? ²⁸ Ia mecekhok mendahiken kalak i,'hada kalak musuh enggo mengulaken i.'Bakhu, pengekut-pengekut idi mendokken taba-Sa, 'Tah pot ngo Kona kami laus deket pepulungken i? ²⁹ Tapi, tuan idi mendokken,'Ulang! kumekhna, enggo kesa kona ki pepulung duku-dukut idi, get no ko nahan ki mencabut deket page idi. ³⁰ Beli mo dua na ntubuh khebbakken soh mi akhi mekhani. Bakhu, tikan waktu mekhani, Aku kenah mendokken mi kalak pakha penabukh, "Pekhjolo-jolo i pepulung mo khih-khih idi janah i eket mo i bages bekhkas-bekhkas asa i tutung. Tapi, page ni i pepulungken i bages palungku""' ³¹ Enggo kesa i Isa mencekhitaken pekhumpamaen si deban taba kalak i, ni-Na," Kekhajaen Sokhga idi bage benih akhum si i amet kalak deket i tabukhken i jumana. ³² Benih idi mo si kedepna i kakhina si mekhbage-bage khokhohen, janah menjadi kayu janah manuk-manuk pe mekhohen lako mekhasakh i dahan-dahan na i." ³³ Enggo kesa Isa menukutken hada pekhumpamaen si debaen mi kalak i, "Kekhajaen Sokhga idi bage khagi, si sada kalak dabekhu si memuat janah ki masukken mi bages ajunen tepung tekhigu tellu aco dom na soh mi kakhina ajunen idi tekhcampukh khagi. ³⁴ Kakhina enda i dokken Isa mi jehm mbue i bagesen pekhumpamaen-pekhumpamaen, janah Ia otang boi kikhana mi kalak i mula otang lewat pekhumpamaen. ³⁵ Janah bagidi mo, saut mo kade si ipesoh takhab nabi Yesaya, "Aku naing ki buka babahku i bages pekhumpamae-pekhumpamaen, Aku naing mecekhokken kade-kade si otang tekhidah semenjak dunia en i hanaken." Mazmukh 78:2 ³⁶ Enggo kesa i, Isa menadingken kalak ntekhem i bakhu mbengket mi hapo. Janah, pengekut-pengekut-Na khoh taba-Sa janah i dokken mo, " Pekhumpamaen tekhsenget dukut-dukut i juma". ³⁷ Janah, i aloi Isa,"Kalak si menabukhken benih si mende idi mo Dukak Jehma, ³⁸ janah juma idi mo ddukak-dukak Kekhajaen, janah dukut idimo dukak-dukak si jahat, ³⁹ janah musuh si menabukh i idi mo Iblis, janah musim panen i idi mo akhir zaman, deket kalak si mekhani idi mo pakha malaikat. ⁴⁰ Jadi, dos bage khih si i pekhebbakken janah i tutung i bagas api bagi mo si naing tekhjadi i akhir zaman . ⁴¹ Dukak Jehma naing ki pesulak pakha malaikat-Na, janah kalak i naing ki pekhebbak kakhina batu cendi deket jehma-jehma si mengulaken kejahaten i kekhajaen-Na nai, ⁴² Janah naing mengambongken i bages tungku api. I bekas idi naing tangisen deket kekhtak epen. ⁴³ Enggo kesa i, kalak-kalak tuhu naing mekhcuhya bage mataniakhi i bages kekhajaen Bapa kalak i. Ise si mekhcoping, beli mo ia mendengkoh. ⁴⁴ Kekhajaen Sokhga idi mo bage hakhta si tekhtanem i juma, si dapet kalak, bakhu i bonikken na balik. Janah, menokho juma idi. ⁴⁵ Sekali nai, Kekhajaen Sokhga idi mo bage kalk pedea si menulusi mutiakha si mende . ⁴⁶ Enggo kesa i, ia mendapetken hada mutiakha si mahakhga kalohon, laus mo ia janah mendea kakhina si lot bana, bakhu menokokh mutiakha i." ⁴⁷ "Kumekhna idi, Kekhajaen Sokhga idi mo bage jala ikan si i kibakhken i bages laut, janah ki pepulung mekhbage matcam ikan. ⁴⁸ Enggo kesa jalao idi dom, kalak i mekhuah na mi biding janah dogok bakhu i pepulung ikan-ikan simende mi bages kekhanjang mbelgah, tapi mengambongken si otang mende. ⁴⁹ Jadi, idi mo naing si tekhjadi i akhir zaman.Pakha malaikat idi naing keluakh janah ki pejae si jahat i jehma-jehma si benakh. ⁵⁰ Janah mwngambongken kalak-kalak jahat i bages tungku api i bekas i naing lot kini ndekhsa deket kekhtak epen. ⁵¹ Enggo mang ko mengantusi si kahina i? Kalak i mendoken taba-Sa, "Ue". ⁵² Bakhu, Isa mecekhok bana kalak i, "Kakhna idi, kakhina ahli Taukhat si enggo jadi pengekut Kekhajaen Sokhga, ia bage si dasa hapo si mengkeluakhken hakhta si mbakhu deket si lama i i kebeakenna nai." (Isa I Tolak I Kota Asal-Na) ⁵³ Enggo kesa Isa ki siapken pekhumpamaen-pekhumpamaen idi, laus mo ia i sidi nai. ⁵⁴ Janah, enggo kesa Ia soh i kota asal-Na, Ia mengajakhi i sinagoge-sinagoge kalak i, sampe kalak i hekhan janah i doken mo, idi nai ngo jehma en mendapetken kebajiken deket mukjizat-mukjizat idi? ⁵⁵ Otang pana Ia dukak tukang kayu? otang pana cecek-Na gelakhna Makhia, janah senina-senina na idi mo Yakobus, Yusuf, Simon, deket Yudas? ⁵⁶ Otang pana senina-senina na si dabekhu lot i antakha kita? Bakhu, jadi dike nai Jehma si en mendapetken kahina enda? ⁵⁷ Janah, kalak i tekhsinggung kakhna Ia. Bakhu, isa mendokken mi kalak i, " hada kalak nabi otang ngo i hokhmati i bekas asal na janah i hapo na sendikhi. ⁵⁸ Janah, Ia otang ki bain mbue ki bainken mukjizat i hado kekhna kalak i otang pekhcaya.