¹ Aku nyarah ma naun hi Febe, pulaksanai takam, hanye yiru erang kaulun palayan ungkup hang Kengkrea. ² Tarime hanye hang wuang Tuhan sameh kala kawan ulun kudus, balalu karawah hanye ma kawan inun sa naperlu daya ni teka naun daya hanye raerai haut ngarawah ulun rama tamasuk aku. ³ Tahampe tabeku ma hi Priskila anri hi Akwila, kawan hengau sapalayananku hang wuang Kristus Yesus, ⁴ sa haut ane matei daya nyalamat aku. Puang ekat aku sa batarima kasih ma here, kude katuluh ungkup sa puang Yahudi. ⁵ Tahampe pada tabeku ma ungkup sa naan hang lewu here. Tahampe pada tabe ma hi Epenetus sa nasintaku, hanye ulun sa palanungkai hang Asia sa narime Kristus. ⁶ Tabe ma hi Maria sa haut bagawi ta tuu ma naun. ⁷ Tabe ma hi Andronikus anri hi Yunias, kawan pulaksanai sabangsaku nelang here suah masuk panjara sinrah aku, hanye yiru kawan ulun sa tapandang hang penah kawan rasul, here haut labis dahulu parisaya Kristus sa huan aku. Tabe ma hi Ampliatus, sa nasintaku hang wuang Tuhan. ⁹ Tabe ma hi Urbanus, hengau sapalayanan hang wuang Kristus, anri ma hi Stakhis sa nasintaku. ¹⁰ Tabe ma hi Apeles, sa haut tabukti kasatiaanni hang wuang Kristus. Tabe pada ma kaluarga Aristobulus. ¹¹ Tahampe tabeku ma hi Herodion, pulaksanai isa bangsa anri aku. Tabe ma kaluarga Narkisus, sa naan hg wuang Tuhan. ¹² Tabeku ma hi Trifena anri hi Trifosa, sa haut bahimat bagawi hang wuang Tuhan. Nelang ma hi Persis sa nasintaku, sa haut tatuu bagawi hang wuang Tuhan. ¹³ Tabe pada ma hi Rufus, ulun pidian hang wuang Tuhan, nelang pada ma inehni sa haut jari inehku pada. ¹⁴ Tabe ma hi Asinkritus, hi Flegon, hi Hermes, hi Patrobas, hi Hermas anri kawan pulaksanai sa baya anri here. ¹⁵ Tabe ma hi Filologus anri hi Yulia, hi Nereus anri pulaksanaini sa wawei, ma hi Olimpas, anri ma katuluh ulun kudus sa baya anri here. ¹⁶ Ipanabe anri siuk kudus. Katuluh ungkup Kristus ngirim tabe here ma naun. ¹⁷ Pulaksanai katuluh, aku iwara tatuu ma naun, nampan naun hati-hati nadap kawan ulun sa tau ngulah rawek nelang tau manyasat kaparisayaan naun, kawan ulun sa balawanan anri inun sa haut na ajar ma naun; Sanawit tenga teka ulun kala yiru. ¹⁸ Daya, kawan ulun yiru puang malayani Tuhan takam Yesus Kristus, kude mulur aheng atei here raerai; makai lengan sa marauh na rengei, here manipu atei kawan ulun sa puang suriga anri here. ¹⁹ Daya, katuluh ulun haut karasa kataaten naun, daya gana yiru aku tuu arai mihewu. Kude aku hamen naun marahati neu kawan hal sa maeh anri barasis neu kawan sa jahat. ²⁰ Alatalla sumber damai sejahtera sagar ngampi hansur Iblis hang kapit pee naun. Ahi lelo Yesus, Tuhan takam, nyinrah naun. ²¹ Hi Timotius, hengau sapalayananku, nampe tabe ma naun, kala yiru pada hi Lukius, hi Yason, anri hi Sosipater, kawan pulaksanai sebangsaku. ²² Aku hi Tertius, sa nyurat surat yiti, ngirim tabe ma naun hang wuang Tuhan. ²³ Hi Gayus, sa ngami uneng manre ma aku anri ma katuluh ungkup, ngirim tabe ma naun. Hi Erastus, kapala kaungan tumpuk, anri hi Kwartus, pulaksanai takam, ngirim tabe ma naun. ²⁴ (Ahi lelo Yesus Kristus, Tuhan takam, nyinrah naun katuluh! Amen.) ²⁵ Ma Hanye, sa bakuasa ngampi kuat naun sasuai anri Kabar Maeh sa nawaraku neu Yesus Kristus, sasuai pada anri rahasia sa haut na simuh baabad-abad, ²⁶ kude sa itati haut nawara itetei kawan kitab kawan nabi ma katuluh bangsa nampan mamimpin here nuju ma kataaten iman parisaya, ²⁷ ma ekat isa Alatalla sa penu hikmat itetei Kristus Yesus; kamuliaan hampe kalalawahni! Amen