¹ Jari takam sa kuat harus nanggung ulun sa puang kuat, ada ekat ngampi sanang atei takam raerai. ² Tiap kaulun ngampi sanang atei sasameh takam ma pikaeh, nampan kayakinanni batambah. ³ Daya Kristus puang ngampi sanang diri-Ni raerai, kude kala naan nasurat, "Kawan wadaan here, sa mada Hanyu, haut wuah ma ambau aku." ⁴ Daya, katuluh sa haut nasurat samula napakai ngajar takam nampan itetei katekunan nelang panghiburan sa naami daya Surat Barasis, takam tau kaiyuh pangharapen. ⁵ Mudahan Alatalla, sa ampun katuluh kasabaren anri panghiburan ngami takam ahi lelo nampan tau welum isa atei sasuai anri aheng Yesus Kristus, ⁶ anri isa atei nelang isa suara naun nawat Alatalla, Ambah Tuhan takam Yesus Kristus. ⁷ Daya yiru, tarime isa anri sa lain, sameh kala Kristus narime takam ma kamuliaan Alatalla. ⁸ Aku kaeau ma naun amun Kristus haut jari palayan ma kawan ulun basunat ma kabanaran Alatalla, hanye yiru nampan ngampi kuat janji sa haut naami ma datu nini takam, ⁹ anri ma kawan bangsa puang Yahudi nampan nawat Alatalla daya ahi lelo-Ni. Kala naan nasurat, "Daya yiru, aku sagar nawat Hanyu hang penah kawan bangsa puang Yahudi; nelang aku sagar manyanyi tawat hurmat ma ngaran-Nu." Mazmur 18:50 ¹⁰ Udi hie eauni, "Hayu miarai kawan bangsa, sasameh anri ulun pidian Alatalla!" Ulangan 32:43 ¹¹ Eauni lagi, "Tawat ma Tuhan katuluh bangsa! Katantuluh ulun pidian nawat Tuhan." Mazmur 117:1 ¹² Udi yiru eau Yesaya, "Sagar hawi teka katurunan Isai, Hanye sagar marentah kawan bangsa, hang wuang Hanye kawan bangsa sagar baharap." Yesaya 11:10 ¹³ Mudahan Alatalla sa uneng kaharapen nampenu naun anri kaaraien nelang damai sejahtera hang wuang parisayanu, nampan naun natampenu hang wuang kaharapen daya kuasa Roh Alatalla. Palayanan Paulus ma kawan ulun puang Yahudi ¹⁴ Pulaksanai katuluh, aku raerai tuu yakin neu naun, amun naun penu anri pikaeh, naun hene masam katauen, nelang sanggup ngami nasehat isa anri sa lain. ¹⁵ Kude, aku haut heei nulis ma naun papire hal neu ngampi itung kamulek, daya Alatalla haut ngami ahi lelo ma aku, ¹⁶ aku jari palayan Yesus Kristus ma kawan bangsa puang Yahudi jari imam neu Kabar Maeh teka Alatalla, nampan kawan bangsa puang Yahudi tau jari parapah sa natarime, sa nabarasis daya Roh Alatalla. ¹⁷ Yiru sababni, hawuang Yesus Kristus, aku kaiyuh iwawara kawan hal pigawianku ma Alatalla. ¹⁸ Daya, aku puang heei kaeau hal sa lain, kasuali sa haut naulah Kristus itetei aku, nampan ngulah kawan ulun puang Yahudi nuu daya lengan atawa pigawian, ¹⁹ itetei kuasa kawan tanda ajaib nelang kawan mukjizat, itetei kuasa Roh teka Yerusalem palus bakaliling hampe Ilirkum, aku haut iwaraku katuluhni neu Kabar Maeh Kristus. ²⁰ Kala yiru bahumku iwara Kabar Maeh hang unengan ulun sa huan karengei Kistus nampan ada aku ngamuan hang amau pondasi sa haut na andak daya ulun lain. ²¹ Kala naan nasurat, "Here sa huan suah narime kabar neu Hanye sagar kadinung, nelang here sa huan suah karengei sagar kataru." Yesaya 52:15 Ransana Paulus ganta ma Roma ²² Yiru sababni aku gaha bahalangan lepuh ganta naun. ²³ Kude itati, daya haut mahi unengan hang daerah yina, nelang daya aku haut ba taun taun lawahni hamen ganta naun, ²⁴ amun aku tulak ma Spanyol, aku baharap tau tarie nelang panalu anri naun nampan naun tau ngarawah aku ma yaru, udi aku miarai baya naun erang pitus. ²⁵ Kude itati aku hamen ma Yerusalem neu malayani kawan ulun kudus, ²⁶ Daya hang Makedonia anri Akhaya here arai atei ngami sumbangan ma kawan ulun paua hang penah kawan ulun kudus hang Yerusalem. ²⁷ Here tuu arai ngarajani, daya hal yiru memang kawajiban here. Amun kawan bangsa puang Yahudi haut narime kawan berkat sa jari hak ulun Yahudi, here pada harus malayani ulun Yahudi hang wuang kabutuhan tenga daging here. ²⁸ Daya yiru, dami haut luput tugasku yina balalu nyarah sumbangan ma here, aku sagar tulak ma Spanyol mitah tumpuk naun. ²⁹ Amun aku hawi nunung naun, aku sagar hawi penu anri berkat Alatalla. ³⁰ Pulakanai katuluh, aku ilaku ma naun, demi Tuhan takam Yesus Kristus nelang demi sinta Roh, nampan takam sasameh laku dua ma Alatalla neu aku, ³¹ nampan aku nalapas teka kawan ulun sa puang parisaya hang Yudea, nelang nampan palayananku ma Yerusalem natarime kawan ulun kudus. ³² Nampan daya kabahumen Alatalla aku tau hawi nunung naun anri arai atei, nelang kaiyuh rariu teka penah naun. ³³ Mudahan damai sejahtera teka Alatalla nyinrah naun katuluh. Amen