¹ Tabe neu Filemon Tabe teka hi Paulus, isakaulun sa napenjara deya Yesus Kristus, andri teka hi Timotius, pulaksanai isaiman takam, ma hi Filemon, sahabat andri hengau sapelayanan sa kami kasihi, ² andri ma hi Apfia, pulaksanai takam, andri hi Arkhipus, hengau seperjuangan takam, andri ma ungkup sa samayang hang lewunu. ³ Anugerah andri damai sejahtera ma hanyu hingka Alatalla, Amah takam, andri hingka Tuhan Yesus Kristus. Antuhan Syukur ma Iman andri Kasih hi Filemon ⁴ Aku pada basyukur eleh ma Alatallaku hantek ka'itung hanyu wuang doa-doaku, ⁵ deya aku nyandrengei hal iman andri kasih sa naan witu hanyu wuang Tuhan Yesus andri ma katuluh ulun kudus. ⁶ Aku badoa nampan ipakatan imannu jari efektif neu pangataruan sa penu andri katuluh hal sa maeh sa naan hang takam demi Kristus. ⁷ Aku arai tatu'u andri tahibur deya kasihnu dagana mitah hanyu, Pulaksanai, atei kawan ulun barasis ba'asa nasegarkan. Permohonan hi Paulus Hal hi Onesimus ⁸ Deya yiru, kude aku naan kayakinan hante wuang Kristus andri kaiyuh marintah hanyu inun sa jari keawajibannu, ⁹ kude deya kasih, ware aku lakuni mahanyu. Aku, hi Paulus - sa haut matueh, andri wayah yina jari ulun sa napenjara deya Kristus Yesus-- ¹⁰ Ilaku tu'u ma hanyu hal iyaku, hi Onesimus, sa aku katunung salawah aku naan hang penjara, ¹¹ sa dahulu puang badiran ma hanyu, kude itati badiran tatu'u, ma hanyu atawa ma aku. ¹² Aku ngirim hanye wua ateiku, mulek ma hanyu, ¹³ sa sabujurni sagar aku tahan pakai muneng baya aku nampan hanye iyuh ngaganti hanyu ngarawah aku salawah aku hang penjara deya Injil.* ¹⁴ Kude, dami mahi persetujuannu, aku pa'kaiyuh ngulah inunpun himpan samaeh yiru hanyu ulah puang deya tapaksa, kude deya hanyu katuju. ¹⁵ Hie karasa alasan hi Onesimus napisah teka hanyu erangitus nampan hanyu kaiyuh narimeni ba'asa neu salawahni, ¹⁶ kude puang lagi ialah walah, baharap labih hingka yiru, ialah sameh pulaksanai sa terkasih, pung ekat khusus ma aku, pada labih lagi pakai hanyu, maeh wuang tenga atawa wuang Tuhan. ¹⁷ Jari, dami hanyu nganggap aku ialah hengau bagawinu, tarimelah hi Onesimus ialah hanyu narime aku. ¹⁸ Dami hanye haut bahala ma hanyu atawa tahutang inun-inun ma hanyu, die aku sananggungni. ¹⁹ Aku, hi Paulus, nyurat iti andri tanganku raerai; Aku sagar ngalunasni -- mahi ngatuh inun-inun hal utangnu ma aku, hanye welumnu raerai. ²⁰ Hanye, Pulaksanaiku, elahni hang wuang Tuhan aku kahaba samaeh teka hanyu. Nampan ateiku arai hang wuang Kristus. ²¹ Deya aku tu'u yakin hanyu sagar ngunu, aku nyurat hal iti ma hanyu, deya aku karasa hanyu sagar ngagawini labih teka sa nalaku. ²² Kalahie pada, awat nasiap elet maaku deya aku baharap mitah doa-doanu, aku sagar kaiyuh mulek ma hanyu. Tabe Pangalis ²³ Hi Epafras, hengauku hang penjara wuang Yesus Kristus, ngirim tabe ma hanyu, ²⁴ kalahie pada hi Markus, hi Aristarkus, hi Demas, andri hi Lukas, kawan hengau sapelayananku. ²⁵ Anugerah hingka Tuhan takam, Yesus Kristus, Kirani ngiring rohnu.