¹ Habar Kebangkitan Yesus Andri, hantek andrau Sabat haut luput, Hi Maria Magdalena, hi Maria ine hi Yakobus, andri hi Salome, haut midi kawan rempah pakai here tulak neu meminyaki Yesus. ² Ka'iyat sunsung, hang andrau pertama minggu yiru, hantek mateandrau terbit, here hawi ma ugang. ³ Here kaeau isa andri salain, "Hie sa sagar ngaguling watu hingka anawang ugang yiru die?" ⁴ Kude, dami here nantau ma amau, here kadinung watu sa hante tu'u yiru haut taguling. ⁵ Andri, udi masuk ma wuang ugang, here kadinung isakaulun pemuda sa makai jubah mahilak rahat maharaung hang tuhi kawan, here emah. ⁶ Balalu, hanye kaeau ma here, "Ada emah, hanyu ngantara Yesus ulun Nazaret sa nasalib. Hanye haut bangkit. Hanye mahi hang yina. Dinung uneng here nangkading-Ni. ⁷ Kude, tulakleh, wara ma kawan murid-Ni andri ma hi Petrus bahwa Hanye rahat badahulu hingkahanyu ma Galilea. Hang yaru, hanyu sagar panalu Hanye, ialah sa haut hanye wara ma hanyu ⁸ Udihie, here kaluar nempat teka ugang yiru deya here neter andri wauh, andri here pa'kaiyuh kaeau inun-inun ma hie-hie deya here takut. [Andri inunpun sa haut naparintah nampan here ngeau ma hi Petrus andri kawan hengauni, here iwara andri tawelek. Udihie, Yesus raerai sa ngirim here ma Timur hampe Barat, neu ngasiar habar sa Barasis andri sa pa'kaiyuh binasa hal keselamatan kekal. Amin.] Yesus Nyantarang Tenga-Ni ma Kawan Murid-Ni ⁹ Hantek Yesus bangkit kaiyat sunsung hang andrau pertama wuang minggu yiru, Hanye pertama-tama nyantarang tenga-Ni ma hi Maria Magdalena sa teka hanye Yesus haut ngunur pitu roh ra'at. ¹⁰ Balalu, hanye tulak andri iwara ma here sa haut baya Yesus, ganyah here rahat baduka andri ngiak. ¹¹ Balalu, hantek here nyandrengei bahwa Yesus welum andri nadinung deyani, here puang parisaya. ¹² Udi kejadian yiru, Yesus pada nyantarang tenga-Ni wuang rupa lain ma rueh kaulun teka here sa rahat takia nuju ma tumpuk. ¹³ Balalu, here miulek andri iwara ma sa linni, kude here sa linni pada puang parisaya here. Yesus Bapaner ma Kawan Murid-Ni ¹⁴ Udihie, Hanye nyantarang tenga-Ni ma kasawalas murid-Ni hantek here rahat maharung kuman balalu Hanye nagur here deya here puang parisaya andri mape atei. Deya, here puang parisaya ma kawan ulun sa haut kadinung Hanye haut bangkit. ¹⁵ Balalu, Hanye kaeau ma here, "Tulakleh ma katuluh dunia andri ngasiar Injil ma katuluh sa welum. ¹⁶ Hie sa haut parisaya andri haut nabaptis sagar nasalamat, kude hie sa puang parisaya sagar nahukum. ¹⁷ Balau, siri-siri iti sagar naan witu here sa parisaya: Wuang ngaran-Ku here sagar ngusir kawan roh ra'at; here sagar bapaner wuang basa-basa wa'u, ¹⁸ here sagar negei anipe andri tangan here; balalu dami here ngu'ut rasun sa nampatei, hal yiru puang sagar ngulah here silaka; here sagar nganak tangan here hang amau kawan ulun sakit, balalu ulun yiru jari ware." Yesus Tapaenat ke Surga ¹⁹ Balalu, udi Tuhan Yesus ngantuhni ma here, Hanye tapaenat ma surga andri maharung hang tuhi kawan Alatalla. ²⁰ udihie, here tulak andri bahutbah hang awe-awe, nelang kuasaTuhan bagawi wuang here andri ngampitaguh firman-Ni mitah siri-siri sa ngiringni.