Yesus hang Hadapan hi Pilatus ¹ Kaiyat sunsung, kawan imam kepala ngulah ipakat andri here kawan tua, andri kawan ahli Taurat, andri katuluh Sanhedrin. Balalu, here nuruk Yesus, ngenei-Ni tulak, andri nyarah Hanye ma hi Pilatus. ² Balalu, hi Pilatus nunti ma Hanye, "Inunkah Hanyu Raja ulun Yahudi?" Balalu, Hanye nyangaini, "Hanyu sa ngantuhni." ³ Udihie, here imam kepala ngadawa Yesus eleh. ⁴ Balalu, hi Pilatus nunti lagi ma Hanye, "Inunkah hanyu puang nyangaini? Dinung, papire rama dawa'an here pakai nawan Hanyu." ⁵ Kude, Yesus puang lagi nyangai ngulah hi Pilatus wauh. Yesus andri Barabas ⁶ Hang Andrau Raya Paskah, hi Pilatus haut patuh napas isakaulun tahanan sa here laku. ⁷ Andri, naan isakaulun bangaran hi Barabas haut natahan baya here pemberontak sa munu ulun wuang isa pemberontakan. ⁸ Ulun rama hawi andri mulai laku ma hi Pilatus neu ngulah sameh sapatuh hanye ulah ma here. ⁹ Andri, hi Pilatus nyangai here andri kaeau, "Inun hanyu sini aku napas mahanyu Raja ulun Yahudi ini?" ¹⁰ Deya, hanye karasa amun here imam kepala haut nyarah Yesus deya kasiwa. ¹¹ Kude yiru, kawan imam kepala nga'yak ulun rama nampan laku hi Pilatus napas hi Barabas. ¹² Balalu, hi Pilatus kaeau lagi ma here, "Jari, inun sa harus aku ulah andri ulun sa hanyu antuh Raja ulun Yahudi iti?" ¹³ Balalu, here sindrah nantiak lagi, Nasalib ai Hanye!" ¹⁴ Udihie, hi Pilatus kaeau ma here, "Deya inun? Kahalaan inun sa haut Hanye uluh?" Kude, here sindrah nantiak magin mehet lagi, "Nasalib ai Hanye!" ¹⁵ Deya sini ngulah arai atei ulun rama, hi Pilatus napas hi Barabas ma here, balalu, udi ngakasah Yesus, hanye nyarah-Ni pakai nasalibkan. Yesus Nakasese andri Nasiksa ¹⁶ Balalu, here prajurit ngenei Yesus masuk ma istana, hanye gedung pengadilan, andri here nerau katuluh pasukan bakumpul. ¹⁷ Udihie, here masang jubah ungu ma Hanye, andri udi nganyam isa mahkota barunrui, here nganakni ma ulu Yesus. ¹⁸ Udihie, here mulai ngantuh salam ma Hanye, "Salam, Raja ulun Yahudi!" ¹⁹ Andri, here mupuk ulu-Ni andri buluh balau nura-Ni nelang sujud nyambah Hanye. ²⁰ Udi here ngaja'an Yesus, here napas jubah ungu teka Yesus, balalu masang pama-Ni raerai. Udihie, here ngenei Yesus kaluar neu nyalib Hanye. Yesus Nasalib ²¹ Balalu, here maksa ulun sa ganyah mitah, hi Simon ulun Kirene, sa rahat hawi hingka tumpuk, amah hingka Aleksander andri Rufus, pakai mikul salib-Ni. ²² Udihie, here ngenei Yesus ma uneng sa bangaran Golgota, sa artini "Uneng Tengkorak". ²³ Here ngami-Ni anggur basampur andri mur, kude, hanye ang hakun ngalapni. ²⁴ Udihie, here nyalib Hanye andri ngabagi-bagi pama-Ni hang penah here, nelang ngumpe undi pakai ngalap jatah sa iyuh naalap deya here asing-asing. ²⁵ Andri, wayah yiru pas jam telu hantek here nyalib Hanye. ²⁶ Balalu, tulisan hal dawa'an ma Yesus nasurat, "Raja Ulun Yahudi." ²⁷ Udihie, here nyalib rueh ulun parampok sindrah Hanye, isa hang tuhi kawan-Ni andri isakaulun hang tuhi kawi-Ni. ²⁸ Jari, taganaplah Kitab Suci sa kaeau, "Andri, Hanye tahitung hang helang kawan ulun durhaka." ²⁹ Udihie, kawan ulun sa rahat mitahngahujat Yesus nelang ngageleng ulu here andri kaeau, "Hi! Hanyu sa sagar ngampiruntun Bait Alatalla balalu ngulahni lagi wuang telu andrau, ³⁰ ware nyalamat tenga-Nu raerai balalu minauleh teka salib'ru!" ³¹ Kalahie pada kawan imam kepala, sindrah andri here ahli Taurat, ngaja'an Yesus andri kaeu isa andri sa lain, "Hanye ta'u nyalamat ulun lain, kude Hanye pa'kaiyuh nyalamat tenga-Ni raerai! ³² Elahni Mesias, Sang Raja Israel, itati minau hingka salib nampan takam kaiyuh nantau andri parisaya." Here sa nasalib baya andri Yesus pada mencela Hanye. Kepateian Yesus ³³ Hantek haut jam kaenem, terjadi maieng hang katuluh tane yiru hampe hang jam kasuei. ³⁴ Dami jam ka-9, Yesus nantiak andri lengan mehet, "Eloi, Eloi, lama sabaktani," sa artini "Alatalla-Ku, Alatalla-Ku, wahinun Hanyu nanan Aku?" ³⁵ Balalu, udi nyandrengeini, papire ulun sa mindri hang riet-Ni kaeau, "dinung! Hanye nerau hi Elia." ³⁶ Balalu, isakaulun nempat, andri ngisi isa uneng andri anggur asem, balalu nganakni hang buluh, balalu, ngamini ma Yesus pakai ngu'ut, nelang kaeau, "Elahni takam ninung inunkah hi Elia sagar hawi neu ngampinau Hanye." ³⁷ Udihie, Yesus nantiak andri lengan mehet nelang mahewuk sa pangalis-Ni. ³⁸ Hantek yiru, tirai Bait Alatalla pairah jari rueh, hingka amau hampe ma ime. ³⁹ Balalu, hantek kepala pasukan, sa mindri nadap Yesus, kadinung kalaawe Yesus mahewuk pangalis-Ni, hanye kaeau, "Tu'u, ulun iti hanyelah Iya Alatalla!" ⁴⁰ Hang yeru pada naan papire wawei sa kadinung hingka lawit, hang helang here naan hi Maria Magdalena, andri hi Maria ineh hi Yakobus Muda andri hi Yoses, andri hi Salome. ⁴¹ Hantek Yesus naan hang wilayah Galilea, here ngiring Hanye andri melayani Hanye. Balalu, hang yaru naan rama wawei lainni sa hawi sindrah Yesus ma Yerusalem. Yesus Napasar ⁴² Hantek andrau haut tiba kamalem, deya andrau yiru hanye Andrau Persiapan, sa'hu'an andrau Sabat, ⁴³ Hi Yususf ulun Arimatea hawi, hanye isakaulun hingka anggota Majelis Besar sa nahormati, hanye pada ngandrei eleh pihawian Kerajaan Alatalla, bausaha ngampihe'ei tengani tulak ma Pilatus nampan laku tenga Yesus. ⁴⁴ Pilatus emah hantek nyandrengei Yesus haut matei. Hanye nerau kepala pasukan balalu nunti ma hanye, tu'u sah Yesus haut matei. ⁴⁵ Udi hi Pilatus karasa hingka kepala pasukan, hanye ngami mayat yiru ma hi Yusuf. ⁴⁶ Balalu, hi Yusuf midi kain linen balalu ngampinau mayat Yesus, udihie ngabungkus-Ni wuang kain linen yiru, hanye ma'angkading-Ni hang wuang ugang sa haut nakadi hang wungkur watu. Balalu, hanye ngaguling isa watu ma anawang ugang yiru. ⁴⁷ Hi Maria Magdalena andri hi Maria ine Yoses nantau uneng mayat Yesus naangkading.