Rensana Ipamunu Yesus ¹ Andrau Raya Paskah andri Andrau Raya Ruti Puang Baragi sagar mulai rueh andrau lagi, kawan imam kepala andri kawan ahli Taurat ganyah ngantara sara pakai nyama Yesus andri ipusu mada balalu munu Hanye. ² Deya, here kaeau, "Ada salawah andrau raya nampan ada ridu terjadi hang penah rakyat." Yesus Naurapi andri Minyak Narwastu ³ Ganyah Yesus naan hang Betania, hang lewu hi Simon si Kusta, hantek rahat maharung hang meja kuman, hawi isakaulun wawei ngenei isa guci rumis hingka watu pualam sa baisi minyak wangi teka narwastu murni sa larang. Hanye nyandarai gucini yiru balalu nunrakni ma amau ulu Yesus. ⁴ Kude, naan papire ulun sa sangkal nelang kaeau isa andri sa lain, "Wah inun memboroskan minyak wangi sameh iti? ⁵ Deya, minyak iti ta'u na'ari 300 dinar labih balalu kaiyuh naami ma ulun miskin." Balalu, here pada sangit andri wawei yiru. ⁶ Kude, Yesus kaeau ma here, "Elahni hanye. Wah inun hanyu nyansusah hanye? hanye haut ngulah gawian sa maeh ma Aku. ⁷ Deya, ulun miskin naan eleh hang penah hanyu, andri hantek awe-awe hanyu kaiyuh ngarawah here. Kude, Aku puang sagar naan eleh baya hanyu. ⁸ Wawei iti haut ngulah inun sa hanye iyuh. Hanye mengurapi tenga-Ku badahulu sahu'an Aku napasar. ⁹ Aku ngantuh sa bujurni ma hanyu, hang awe Injil nasiarkan hang seluruh dunia, inun sa haut naulah wawei yiru sagar naantuh eleh makai ngitung hanye." Rensana hi Yudas neu Bakhianat ¹⁰ Udihie, hi Yudas Iskariot, isakaulun teka karueh walas murid, tulak nunung kawan imam kepala makai nyarah Yesus ma here. ¹¹ Hantek here nyandrengeini, here arai tu'u nelang banyanji ngami hi Yudas duit. Deya yiru, hi Yudas ngantara waktu sa maeh makai nyarah Hanye. Hidangan Paskah ¹² Hang andrau pertama Andrau Raya Ruti Puang Baragi, hantek here mangurbankan iya domba Paskah, kawan murid Yesus nunti ma Hanye, "Ma'awe Hanyu hamen kami tulak makai nyadia ma Hanyu kuman Paskah?" ¹³ Balalu, Hanye nunyu rueh ulun murid-Ni andri kaeau ma here, "Tulakleh ma kota, die naan isakaulun upu sa rahat ngenei kendi baisi ranu sagar nunung hanyu. Umaleh hanye, ¹⁴ balalu ma awe pun hanye masuk, iwara gi sa amput lewu, 'Guru kaeau: Hang awe ruangan uneng Aku kaiyuh kuman Paskah baya kawan murid-Ku?' ¹⁵ Balalu, hanye sagar nutui ma hanyu isa ruangan hante hang lantai amau sa haut siap andri perabotni. Nasiapkanlah perjamuan kuman ma takam hang yaru." ¹⁶ Udihie, kawan murid-Ni tulak andri hampe hang kota. Hang yeru, here katunung sameh ialah sa Yesus haut eau ma here, balalu, here menyiapakan Paskah. ¹⁷ Hantek kamalem, Yesus sindrah karueh walas murid-Ni hawi. ¹⁸ Balalu, hantek here rahat maharung kuman, Yesus kaeau, "Aku ngeau satu'uni ma hanyu, isakaulun hingka naun na, sa rahat kuman baya Aku, sagar bakhianat ma-Aku." ¹⁹ Here mulai naulah sedih balalu kaeau ma Hanye isa demi isa, "Pasti lain aku, ang nih?" ²⁰ Yesus kaeau ma here, "Hanye ru isa hingka bilangan rueh walas murid, ulun sa na ampasuk rutini baya Aku ma wuang mangkuk. ²¹ Deya, Iya Murunsia sagar tulak, ialah kala sa haut nasurat hal Hanye, kude tu'u cilaka ulun sa dagana hanye, Iya Murunsia nakhianati! Ware ma ulun yiru jaka hanye puang suah nalahirkan." Peringatan ma Tenga andri Ira Kristus ²² Hantek here rahat kuman, Yesus ngalap ruti, andri udi Hanye memberkatini, Hanye nuhi-nuhini balalu ngamini ma here, nelang kaeau, "Alapleh, iti tenga-Ku." ²³ Balalu, Hanye ngalap sangkir, andri ngantuh syukur. Hanye ngamini ma here, andri here katuluh ngo'ot teka sangkir yiru. ²⁴ Balalu, Yesus kaeau ma here, "itilah ira-Ku, ira perjanjian, sa nacurahkan ma ulun rama. ²⁵ Aku ngantuh ma hanyu andri sabujurni, Aku puang sagar ngu'ut lagi hasil teka wua kakau anggur, hampe ma andrau hantek Aku ngu'ut anggur sa wa'u hang wuang kerajaan Alatalla." ²⁶ Udi here banyanyi isa lagu rohani, here pada tulak ma Wungkur Zaitun. Kawan murid Yesus sagar Nanan Hanye ²⁷ Udihie, Yesus kaeau ma here, "'Hanyu katuluh sagar nanan Aku, deya naan nasurat, 'Aku sagar manyarang gembala, balalu kawan domba yiru sagar tapisah-pisah.' Zakaria 13:7 ²⁸ Kude yiru, udi Aku nabangkitkan, Aku sagar tulak ma Galilea badahulu teka hanyu," ²⁹ Kude, hi Petrus kaeau ma Hanye, "Biar here katuluh nanan Hanyu, kude aku puang." ³⁰ Balalu, Yesus kaeau mahanye, "Aku ngantuh satu'uni mahanyu, malem iti, sahu'an manu jagau malengan rueh kali, hanyu sagar menyangkal Aku telu kali." ³¹ Kude yiru, hi Petrus gagumet nyangai, "'Biar Aku harus matei sindrah Hanyu, aku puang sagar manyangkal Hanyu!" Balalu, here katuluh sameh ngantuh kalayiru. Yesus hang Taman Getsemani ³² Udihie, here hampe ma uneng sa bangaran Getsemani, balalu Hanye kaeau ma kawan murid-Ni, Maharungleh hang yina samentara aku badoa." ³³ Balalu, Hanye ngenei hi Petrus, andri hi Yakobus, andri hi Yohanes baya Hanye, nelang Hanye mulai jari takut tatu'u andri tai'ik. ³⁴ Udihie, eau-Ni ma here, "Amirue-Ku sedih tu'u, numa sa hampe ane matei. Tatapleh muneng hang yina andri bajaga-jaga." ³⁵ Dami, udi lawit butit, Hanye basujud hang amau tane andri badoa, Jaka kaiyuh , saat yiru mitah teka Hanye. ³⁶ Balalu, Hanye kaeau, "Abba, Ambah, katuluh hal kaiyuh na ulah-Nu. Alapleh sangkir iti teka Aku. Deya, puang inun sa ka'aheng-Ku, kude inun sa ka'aheng-Nu." ³⁷ Udihie, Hanye hawi miulek andri katunung kawan murid-Ni ganyah mandre, balalu Hanye kaeau ma hi Petrus, "Simon, wah'inun hanyu mandre? Pa'kaiyuh sa hanyu bajaga-jaga salawah erang jam ai? ³⁸ Bajaga-jagaleh andri badoa himpan hanyu ada lawu ma wuang pencobaan. Roh dasar ngunu, kude tenga leme." ³⁹ Balalu ba'asa, Hanye tulak neu badoa andri ngantuh paneran sa sameh. ⁴⁰ Andri ba'asa, Hanye hawi balalu katunung here rahat mandre deya mate here we'at tu'u, andri here puang ta'u harus nyangai inun ma-Hanye. ⁴¹ Udi yiru, Yesus hawi ka telu kalini andri kaeau ma here, "Hanyu masih mandre andri istirahatleh? Sukup, wayahni haut hampe. Dinung, Iya Murunsia nasarah ma wuang kawan ulun badosa. ⁴² Amuanleh, Hayu takam tulak. Dinung, sa nyarah Aku haut riet." Yesus Najama ⁴³ Dami udi yiru, hantek Yesus ganyah bapaner, hi Yudas, isa hingka karueh walas murid, hawi baya ulun rama ngenei manau andri kayu pakai mupuk, nautus deya kawan imam kepala, kawan ahli Taurat, andri kawan tua bangsa Yahudi. ⁴⁴ Hanye sa nyarah haut ngami here siri, eauni, "Ulun sa sagar aku siuk, Hanyelah ulunni. Jama Hanye balalu enei Hanye tulak hang ime pengawasan." ⁴⁵ udihie, Hantek Yudas hampe, hanye hinang nyanriet Yesus andri kaeau, "'Rabi!" Balalu, hanye nyiuk Yesus. ⁴⁶ Udihie, here negei Yesus balalu nyama-Hanye. ⁴⁷ Kude, isakaulun hingka here sa mindri, nyabut manauni balalu nyarang walah imam Besar, udihie netek siluni. ⁴⁸ Andri, Yesus kaeau ma here, "Wah inu hanyu hawi ngenei manau andri kayu pamupuk pakai nyama Aku sameh isakaulun perampok? ⁴⁹ Satiap andrau, Aku baya andri hanyu hang Bait Alatalla nelang mangajar, kude hanyu puang nyama Aku. Deya, hal iti terjadi nampan Kitab Suci iyuh naganapi." ⁵⁰ Udihie, here katuluh nanan Hanye balalu nempat. ⁵¹ Naan isakaulun pemuda sa ngiring Yesus, ekat makai sarung hang tengani. Balalu, here nyamani, ⁵² kude hanye nanan sarungni yiru balalu nempat nelang babentur. Yesus Nahakimi Pemimpin Yahudi ⁵³ Udihie, here ngenei Yesus ma Imam Besar. Andri, katuluh imam kepala, andri tua-tua andri kawan ahli Taurat bakumpul sasameh. ⁵⁴ Balalu, hi Petrus ngiring Yesus teka lawit, hampe ma halaman lewu Imam Besar. Hang yaru, Hanye maharung baya here pengawal nelang ngampilaing tengani hang perapian. ⁵⁵ Here imam kepala andri katuluh Mahkamah Agama tarus ngantara saksi pakai nawan Yesus nampan here kaiyuh munu Hanye, kude here puang kahaba inun-inun. ⁵⁶ Deya, rama ulun ngami kesaksian palsu pakai nawan-Ni, kude kesaksian here puang rasuk isa andri sa lain. ⁵⁷ Udihie, papire ulun mindri andri ngami kesaksian palsu pakai nawan Yesus, eauni, ⁵⁸ Kami nyandrengei Hanye kaeau, 'Aku sagar ngaruntun Bait Alatalla sa naulah tangan murunsia, balalu wuang telu andrau, Aku sagar ngulahni ba'asa, sa puang sameh naulah tangan murunsia." ⁵⁹ Kude, neu hal itipun kesaksian here puang sesuai isa andri sa lain. ⁶⁰ Balalu, Imam Besar mindri hang penah-penah here andri nunti ma Yesus, "Wah inun Hanyu puang nyangai kawan ulun sa basaksi nawan Hanyu?" ⁶¹ Kude, Hanye tatap muku andri puang nyangai. Imam Besar nunti ba'asa ma Yesus andri kaeau, "Inunkah Hanyu Mesias, Iya Alatalla sa Terpuji?" ⁶² Balalu, Yesus kaeau, "Hanyelah Aku, andri hanyu sagar kadinung Iya Murunsia maharung hang tuhi kawan Yang Mahakuasa nelang sagar hawi sindrah andri awan-awan hang langit." ⁶³ Balalu, nelang mairah jubahni, Imam Besar kaeau, "Wah inun takam ngantara saksi lagi? ⁶⁴ Hanyu haut nyandrengei hujatan. Inun kaputusannu?" Balalu, here katuluh ipakat nukum Hanye andri hukuman matei. ⁶⁵ Papire ulun mulai nura Hanye, andri nutup ra'i-Ni, andri nampar-Ni, balalu kaeau ma Hanye, "Banubuatlah!" Here pengawal narime-Ni balalu nampeleng Hanye. Hi Petrus Puang Mangakui Yesus ⁶⁶ Andri, rahat hi Petrus masih naan hang ime halaman lewu Imam Besar, isakaulun walah wawei Imam Besar hawi. ⁶⁷ Balalu, kadinung hi Petrus ganyah ngampilaing tengani, walah yiru nantau hanye balalu kaeau, "Hanyu pada baya Yesus, Ulun Nazaret yiru." ⁶⁸ Kude, hi Petrus manyangkal nelang kaeau, "Aku puang karasa andri pauang kataru inun sa hanyu paner." Balalu, hanye tulak ma garabang anawang, balalu manu jagau malengan. ⁶⁹ Walah wawei yiru kadinung hi Petrus hindra lagi balalu mulai kaeau lagi ma kawan ulun sa mindri, "Ulun iti hanye isakaulun hingka here." ⁷⁰ Kude, Hanye mayangkal lagi. Andri, puanf lawah udihie, kawan ulun sa mindri kaeau ma hi Petrus, "Hanyu jalas isa hingka here deya hanyu pada ulun Galilea." ⁷¹ Udihie, hanye mulai mangutuk andri basumpah, "Aku puang kataru andri ulun sa hanyu paner!" ⁷² Hinang, manu jagau malengan karueh kalini andri hi Petrus kaitung sa inun haut Yesus eau mahanye, "Sahu'an manu jagau malengan rueh kali, hanyu haut manyangkal Aku telu kali." Balalu, hi Petrus puang kaiyuh nahan ngiak.