KHOTBAH YESUS HAL PANGALIS ZAMAN Bait Alatalla sagar Nasantumang ¹ Balalu, hantek Yesus nanan Bait Alatalla, isakaulun murid-Ni kaeau ma-Hanye, "Guru, dinung dasar sa maeh tu'u kawan watu andri kawan bangunan yina!" ² Balalu, Yesus nyangaini, "Inun sa hanyu dinung kawan bangunan sa segah yiru? Mahi ka isa watu pun sa sagar tatanan hang amau watu sa lainni deya katuluhni sagar nasantumang." Awal Mula Kararaen ³ Udihie, ganyah Yesus rahat maharung hang amau wungkur Zaitun sa nadap Bait Alatalla, hi Petrus, andri hi Yakobus, andri hi Yohanes, andri hi Andreas nunti ma Yesus kerai, ⁴ "Wara ma kami, hantek awe hal-hal yiru sagar bakajadian, andri inun sa sagar jari sirini dami katuluh yiru haut hampe?" ⁵ Balalu, Yesus mulai kaeau ma here, "Ati-ati nampan ada naan ulun sa ngulah hanyu tawang. ⁶ Rama ulun sa sagar hawi wuang ngaran-Ku, kaeau, 'Aku ti Yesus.' nelang here sagar ngulah tawang ulun rama. ⁷ Hantek hanyu nyandrengei naan peperangan andri kawan habar ulun ipamunu, ada takut. Deya hal yiru harus terjadi, kude pangalis hingka katuluhni hu'an terjadi. ⁸ Deya, bangsa sagar amuan nawan bangsa, andri kerajaan nawan kerajaan. Sagar naan gempa bumi hang awe-awe; sagar rama ulun kalauan. Yirulah awal ialah sameh hanang ulun nganak. ⁹ Dagana yiru, najaga tenganu. Deya, here sagar nyarah hanyu ma pengadilan, balalu hanyu sagar napupuk hang sinagoge-sinagoge andri hanyu sagar mindri hang hadapan Sanhedrin andri raja-raja deya Aku, himpanjari saksi ma here. ¹⁰ Kude, Injil harus nasiarkan badahulu ma katuluh bangsa. ¹¹ Dami, hantek here ngenei andri nyarah hanyu, ada gaer andri inun sa sagar hanyu eau, kude iwara ai inun sa haut nakaruniakan ma hanyu hantek iru deya lain hanyu sa bapaner, kude Roh Barasis. ¹² Nelang naan pulaksanai sa sagar nyarah pulaksanaini nampan nawunu, kalahie pada naulah ambahni ma iyani. Kawan iya sagar amuan nawan ulun matuehni balalu munu here. ¹³ Udihie, hanyu sagar namuar deya katuluh ulun dagana ngaran Ku. Kude, ulun sa tatap batahan hampe pangalisni sagar nasalamatkan." Hal Ra'at sa Ngulah Hansur ¹⁴ Kude, hantek hanyu nantau pembinasa keji mindri hang uneng sa puang saharusni ( sa mambasa saharusni kataru }, here sa naan hang Yudea harus nempat ma gunung. ¹⁵ Ulun sa naan hang hapau lewu ada minau atawa suluk ma wuang lewu pakai ngaluar inun sa naan wuang lewuni. ¹⁶ Balalu, ulun sa hang ume, ada miulek neu ngalap jubahni. ¹⁷ Dasar silaka here sa raat sawuntung andri ganyah pangempu kawan bayini hang andrau-andrau yiru. ¹⁸ Badoalah himpan hal-hal yiru puang terjadi ganyah musim marisak. ¹⁹ Deya, hang andrau-andrau yiru sagar terjadi kararaen sa tamam sa hu'an pihindra terjadi hingka awal dunia naulah, deya Tuhan hampe wayah yina, andri puang sagar suah terjadi lagi. ²⁰ Nelang dami Tuhan puang nampi hinang andrau-andaru yiru, sagar mahi ulun sa ta'u salamat. Kude, deya ma here sa haut napidi-Ni, Hanye nganyingkat andrau-andrau yiru. ²¹ Udihie, dami naan ulun sa kaeau ma hanyu, 'Dinung, Kristus naan hang yina!' atawa, 'Dinung, Hanye naan hang yaru!' Ada hanyu parisayani. ²² Degana, kawan mesias palsu andri kawan nabi palsu sagar amuan nutui siri-siri andri kawan sa ngulah wauh pakai ngampitawang, amun ta'u, amun ta'u hampe ma kawan ulun sa haut napidi-Ni. ²³ Ati-ati ai! Aku haut iwara katuluh hal ma hanyu sahu'anni. ²⁴ Kude, hantek andrau-andrau yiru, udi luput masa kararaen hante, 'Mateandrau sagar jari ma'iyeng, andri wulan puang sagar basinar. ²⁵ Kawan wawahiang sagar lawu teka langit, andri kuasa-kuasa hang langit sagar nagagunsang."' Yesaya 13:10 34:4 Pihawian Iya Murunsia ²⁶ "Udihie, here sagar nantau Iya Murunsia hawi wuang rakun-rakun andri kuasa andri kemuliaan sa hante. ²⁷ Balalu, Hanye sagar ngirim kawan malaikat andri ngumpul sa haut napidi hingka kaepat arah mate riwut, hingka kawan ujung bumi hampe ma kawan ujung langit. ²⁸ Ware pa'ajar hingka paribasa kakau ara: hantek kawan ra'anni haut maleme andri kawan raweni kaluar, hanyu haut karasa amun musim malaing haut riet. ²⁹ Kalahie pada andri hanyu, dami hanyu kadinung hal-hal iti terjadi, Haut narasa amun hanye haut riet, hang muka wanawang. ³⁰ Aku kaeau sabujurni ma hanyu, generasi iti puang sagar luput hampe katuluh iti terjadi. ³¹ Langit andri bumi sagar luput, kude firman-Ku puang sagar ta'u luput." Waspada andri Bajaga-jagalah ³² "Kude yiru, masalah andrau atawa jam ni yiru, mahi isakaulun sa karasa, puang jua kawan malaikat hang surga, puang jua Iya, ekat Ambah. ³³ Waspadalah, bajaga-jagalah. Deya, hanyu puang karasa hantek wayahni sagar hawi. ³⁴ Hal iti ialah kala ulun sa rahat hang kia'an. Hantek hanye nanan lewu balalu ngami kuasa ma kawan walahni, andri gawian asing-asing, nelang ngami parintah ma penjaga wanawang neu tatap bajaga-jaga. ³⁵ Dagana yiru, bajaga-jagaleh deya hanyu puang karasa wayah tuan lewu yiru sagar hawi, inun kariwe atawa penah malem, atawa hantek manu malengan, atawa kaiyat sunsung, ³⁶ ada hampe hanye hawi bakajut balalu katunung hanyu rahat mandre. ³⁷ Inun sa haut Aku wara mahanyu iti, Aku iwara pada ma ulun katuluhni: 'Bajaga-jagalah!"