Paribasa hal Panyewa Kabun Anggur sa Ra'at ¹ Balalu, Yesus mulai bapaner ma here wuang kawan paribasa. "Naan ulun sa bausaha kabun anggur. Hanye ngulah pagar hang kulilingni, balalu, ngadi isa luang pakai nyeje anggur, andri ngulah isa manara pangawas. Udihie, hanye nyewani ma kawan penggarap kabun balalu tulak ma luar nagari. ² Hantek musim masi, hanye ngirim isakaulun walahni ma kawan penggarap kabun yiru neu narime hingka here hasil kabun anggurni. ³ Kude, here nyama walah yiru, ngakasahni, balalu ngusirni andri mahi ngenei inun-inun. ⁴ Deya yiru, hanye ngirim pudi walahni sa lain ma here, balalu here mupuk uluni, hampe ngulah hanye mangan. ⁵ Udihie, hanye ngirim walani sa lain balalu here mununi. Hal yiru terjadi ma rama sa lainni, mehe na pupuk here andri mehe na wunu. ⁶ Sa amput kabun yiru masih naan isa lagi, hanye iya sa naahini. Akhirni, hanye ngirim iyani ma here andri kaeau, 'Here sagar ngahormati iyaku.' ⁷ Kude, akwan penggarap kabun yiru kaeau isa andri sa lain, 'Hanye hi ahli warisni. Hayu, takam munu hanye balalu warisani sagar jari amput takam.' ⁸ Udihie, here nyama'ni, munu'ni, balalu ngumpe'ni ma luar kabun anggur. ⁹ Kakira Inun sa sagar na ulah sa amput kabun anggur yiru? Hanye sagar hawi balalu munu galis kawan penggarap yiru balalu ngami kabun anggur'ni ma ulun lain. ¹⁰ Ang suahkah hanyu membasa ayat Kitab suci iti. "Watu sa naumpe deya tukang bangunan, haut jari watu penjuru. ¹¹ Yinalah sa naulah Tuhan, ansri inun sa naulah-Ni wauh tatu'u hang hadapan takam'?"Mazmur 118:22-23 ¹² Udihie, here bausaha neu nyama-Ni, kude here pa'he'ei ma ulun rama deya here karasa Yesus iwara paribasa yiru pakai here. Balalu, here tulak nanan Yesus. Hal Bayar Pajak ¹³ Udihie, here nunyu hawi ma Yesus papire ulun Farisi andri kawan ulun Herodian neu ngajabak Hanye andri paneran Hanye ra'erai. ¹⁴ Here hawi balalu kaeau ma Yesus, "Guru, kami karasa bahwa Hanyu bujur nelang puang paduli andri pendapat ulun lain. Deya, Hanyu puang nantau wangun ulun kude bulat ngajar lalan Alatalla sa sasuai andri sabujurni. Inunkah bujur bayar pajak ma Kaisar atawa puang?" ¹⁵ Haruskah kami mambayar atawa haruskah kami puang mambayar? Kude Yesus, udi haut karasa here munafik, hanye kaeau mahere, "Deyainun hanyu nyansuba Aku? Enei maina 1 dinar pakai Aku ninungni." ¹⁶ Balalu, here ngeneini, Yesus kaeau ma here, "Gambar andri tulisan hie kah iti?" Here nyang-Ni, "Gambar anderi tulisan kaisar," ¹⁷ Udihie, Yesus kaeau ma here, "Ami ma kaisar hal-hal sa wat kaisar andri ami ma Alatalla hal-hal sa wat Alatalla." Balalu, here wauh ma Yesus. Tunti'an Ulun Saduki pakai ngajabak Yesus ¹⁸ Balalu, kawan ulun Saduki, sa puang parisaya naan kebangkitan, hawi nunung Yesus balalu nunti ma Hanye, eau here, ¹⁹ "Guru, Musa nyurat ma takam bahwa amun isakaulun, sa amput pulaksanai upu, balalu matei nanan daranganni, kude mahi iya'ni, pulaksanaini sa upu yiru harus pa'adu andri walu yiru himpan naan narus keturunan ma pulaksanaini ru. ²⁰ Naan pitu kaulun pulaksanai. Pulaksanai sa pertama ngalap isakaulun darangan, ²¹ balalu hantek hanye matei, hanye puang ba'anak. Balalu, pulaksanai sa karueh pa'adu andri wawei yiru, balalu matei pada sameh puang ba'anak. Kalahie pada andri pulaksanai sa katelu. ²² Balalu, mahi hingka kapitu bapulaksanai yiru sa nanan iya. Pangalisni hingka katuluhni yiru, wawei yiru pada matei. ²³ Hang andrau kebangkitan, hantek here katuluh bangkit, jari darangan hie kakira wawei yiru? Deya, kapitu bapulaksanai yiru katuluhni haut narangan wawei yiru." ²⁴ Yesus nyangai here, "Angsah iti alasan hanyu jari tawang, deya hanyu puang kataru andri Kitab Suci atawa kuasa Alatalla? ²⁵ Deya, hantek here bangkit hingka penah ulun matei, here mahi sa pa'adu atawa na'adu, deya here haut jari sameh malaikat hang surga. ²⁶ Hal kawan ulun matei sa nabangkitkan angsah hanyu haut mambasa wuang kitab hi Musa, hang bagian hal jumpun haket, kala'awe Alatalla bapaner ma hanye, 'Aku iti Alatalla hi Abraham, andri hi Ishak, andri hi Yakub'? ²⁷ Hanye puang Alatalla ulun matei, kude Alatalla ulun sa welum. Hanyu dasar bujur haut tawang!" Parintah sa Penting Tatu'u ²⁸ Udihie, isakaulun teka kawan ahli Taurat hawi balalu nyandrengei here bahual. Hantek hanye kadinung bahwa Yesus haut nyangai here andri maeh, balalu hanye nunti ma Yesus, "Parintah sa awe sa penting tu'u hingka katuluhni?" ²⁹ Yesus nyangaini, Hukum sa paling utama hanyelah: 'Rengei, hi kawan ulun Israel! Tuhan Alatalla takam hanyelah isa-isani Tuhan. ³⁰ Andri, Hayanglah ma Tuhan Alatallanu andri katuluh atei-nu, andri katuluh amirue-nu, andri katuluh pikiran-nu balalu andri katuluh kakuatan-nu.' ³¹ Balalu, sa karueh hanyelah: 'Hayanglah sasameh-nu ialah hanyu raerai.' Mahi hukum sa labih hante hingka yina." ³² Balalu, Ahli Taurat yiru kaeau ma Yesus, ''Hanyu tu'u, Guru. Hanyu tu'u amun kaeau bahwa Hanye yiru isa, nelang ahi sa lain hingka Hanye. ³³ Balalu, Hayang ma Hanye andri katuluh atei, andri katuluh pengertian, andri katuluh kakuatan, nelang hayang ma sasameh murunsia ialah tenga ra'erai, dasar labih penting hingka katuluh kurban sanatutung andri persembahan." ³⁴ Udihie, hantek Yesus kadinung bahwa ulun yiru nyangai andri bijaksana, Hanye kaeau ma ulun yiru, "Hanyu puang lawit hingka kerajaan Alatalla." Udi yeru, mahi naan lagi ulun sa he'ei nunti ma Yesus. Kristus hanyelah Tuhan ³⁵ Andri, nelang ngajar hang Bait Alatalla, Yesus kaeau, Kala'awe ta'u kawan ahli Taurat kaeau bahwa Kristus hanyelah iya hi Daud? ³⁶ Daud kerai kaeau hang wuang Roh Barasis, 'Tuhan kaeau ma Tuanku: Maharunglah hang tuhi kawan-Ku, hampe Aku nganak kawan musuh-Nu hang kapit pe'e-Nu.' Mazmur 110:1 ³⁷ Daud kerai ngantuh Kristus hanyelah ''Tuhan'. Jari, kalaawe ta'u Kristus hanyelah iyani?" Balalu, ulun rama nyandrengei Hanye tu'u arai. Sikap Nadap Kawan Ahli Taurat ³⁸ Wuang ajaran-Ni, Yesus kaeau, ''Ati-ati nadap kawan ahli Taurat, sa katuju takia makai jubah amau andri katuju narime tabe hormat hang kawan uneng pulau ulun rama, ³⁹ andri amput uneng maharung sa terhormat hang kawan sinagoge andri kawan uneng sa terhormat wuang kawan jamuan. ⁴⁰ Here sa ngarampas kawan lewu here walu balalu ba'alasan makai doa sa amau-amau. Here sagar narime hukuman sa labih we'at." Persembahan Sejati ⁴¹ Udihie, Yesus maharung nadap kotak persembahan nelang nantau kawan ulun sa naampasuk duit ma wuang kotak yiru. Rama ulun sugih sa naampasuk wuang jumalah sa hante. ⁴² Udihie, isakaulun walu miskin hawi balalu naampasuk rueh kaping duit logam, sa banilai 1 sen. ⁴³ Balalu, Yesus nerau kawan murid-Ni nelang kaeau ma here, "Aku iwara satu'uni ma hanyu, walu miskin iti haut naampasuk labih rama ma wuang kotak persembahan yiru hingka katuluh ulun sa lain. ⁴⁴ Deya, here katuluh ngami hingka kalabihan here, kude walu miskin yiru, ngami teka kakuranganni, ngami katuluh sa naan watni, hanye katuluh rajakini."