Yesus Masuk ma Yerusalem Ialah Raja ¹ Balalu, hantek here ane hampe ma Yerusalem, riet Betfage andri Betania, hang wungkur Zaitun, Yesus nunyu rueh murid-Ni, ² nelang kaeau ma here, "Tulakleh ma tumpuk hang hadapannu, dami hanyu hampe, hanyu sagar panalu isakaukui keledai iya rahat nahuruk, sa hu'an pihindra na tunggang ulun. Nalapas ai keledai yiru balalu enei. ³ Dami naan ulun sa nunti hanyu, 'Daya inun hanyu napasni?' , sangai, 'Tuhan ka'i makai keledai yiru tawelek die Hanye ngampudini ma'yina.''' ⁴ Udihie, here tulak balalu kahaba isakaukui keledai iya sa tahuruk hang nawang. hang luar, hang lalan, balalu here napasni. ⁵ Papire ulun sa mindri hang yaru nunti ma here, "Inun sa haut hanyu ulah salenga napas keledai yiru?" ⁶ Here nyangai ialah kala sa haut Yesus kaeau ma here, balalu, kawan ulun yiru maladar here tulak. ⁷ Udihie, here ngenei keledai yiru ma Yesus, nganak jubah here hang amau keledai yiru, balalu Yesus maharung hang amauni. ⁸ Andri, rama ulun ngansang jubah here hang lalan, andri sa lainni ngamur kawan ra'an sa here enei teka ume. ⁹ Ulun rama sa takia hang muka andri sa ngiring Hanye mi'arai mi'hewu, '''Hosana! Nabarakatilah Hanye sa hawi wuang ngaran Tuhan. Mazmur 118:25-26 ¹⁰ Nabarakatilah pihawian kerajaan hi Daud, nini muyang takam! Hosana, hang uneng sa pangaamau!" ¹¹ Udihie, Yesus masuk ma Yerusalem balalu tulak ma Bait Alatalla. Balalu, udi nantau katuluh hal hang kuliling yiru, Hanye tulak ma Betania sindrah karue walas murid-Ni deya andrau haut maieng. Yesus Mangutuk Kakau Ara ¹² Balalu, andrau ke'unini, hantek here haut nanan Betania, Yesus ngingkam kalauan. ¹³ Udi kadinung isa kakau ara sa barawen labat hingka lawit, Hanye tulak neu nantau bahara naan wua sa ta'u Hanye iyuh hingka kakau yiru. Hantek Hanye hampe hang kakau yiru, Hanye puang kahaba inun-inun kasuali kawan rawenni ai deya hantek yiru hu'an musim wua ara. ¹⁴ Dagana iru, Yesus kaeau ma kakau yiru, "Ada naan lagi ulun sa ta'u nguta wua teka hanyu hampe salawah-lawahni." Andri, kawan murid-Ni nyandrengei. Yesus Tulak ma Bait Alatalla ¹⁵ Udihie, here hampe hang Yerusalem. Balalu, Yesus masuk ma Bait Alatalla nelang ngunur kawan ulun sa ganyah bajualan hang Bait Alatalla. Hanye mambalik kawan meja pakai bahurup duit andri kawan kursi ulun sa ngari kawan wurung merpati, ¹⁶ balalu Hanye nguring ulun ngenei kawan barana mitah Bait Alatalla. ¹⁷ Udihie, Yesus ngajar here andri kaeau, "Angsah haut nasurat, 'Lewu-Ku sagar naantuh lewu doa ma katuluh bangsa'? Kude, hanyu haut ngubahni jari sarang perampok." ¹⁸ Balalu, kawan imam kepala andri kawan ahli Taurat nyandrengeini udihie here ngantara sara kalaawe munu-Ni. Deya, here takut ma Hanye dagana ulun rama yiru wauh andri inun sa na ajar-Ni. ¹⁹ Balalu, hantek andrau mulai kamalem, Yesus andri kawan murid-Ni nanan kota yiru. Harus Naan Iman hang Wuang Alatalla ²⁰ Udihie, ka'ayat tu'u hantek here mitah, here nantau kakau ara sa haut karing hampe ma kapanan wakatni. ²¹ Hi Petrus kaitung andri kaeau ma Yesus, "Rabi, dinung! Kakau ara sa Hanyu kutuk haut jari karing!" ²² Balalu, Yesus nyangai here, "Harus naan iman hang wuang Alatalla. ²³ Aku kaeau sabujurni ma hanyu, hie pun sa kaeau ma gunung ati, 'Tapaenat andri tapedak ma wuang laut,' andri mahi ragu hang wuang ateini, nelang parasaya ma inun sa haut hanye antuh sagar terjadi, maka hal yiru sagar terjadi mahanye. ²⁴ Deya yiru, Aku kaeau ma hanyu, inun eleh sa hanyu laku wuang doanu, parasaya leh hanyu haut narimeni, maka hal yiru sagar naami ma hanyu. ²⁵ Balalu, amun hanyu mindri laku doa, ampunilah dami hanyu nyimuh masalah andrl isakaulun, himpan Ambahnu sa naan hang surga pada sagar mengampuni kehalaan-kehalaannu. ²⁶ Kude, dami hanyu puang mengampuni, Ambahnu sa naan hang surga pada puang sagar mengampuni kehalaan-kehalaannu." Pamimpin Yahudi Nunti hal Kuasa Yesus ²⁷ Udihie, here hawi pudi ma Yerusalem. Hantek Yesus takia hang Bait Alatalla, kawan Imam kepala, kawan ahli Taurat, andri kawan tua Yahudi hawi nunung Hanye. ²⁸ Balalu, here kaeau ma Hanye, "Andri kuasa inun Hanyu ngulah kawan hal yiru, atawa hie sa ngami-Nu kuasa pakai ngulahni?" ²⁹ Yesus kaeau ma here, "Aku ka'i nunti isa hal ma hanyu. Suba sangai Aku, die Aku iwara naun andri kuasa inun Aku ngulah kawan hal yiru. ³⁰ Inunkah pandrusan hi Yohanes baasal hingka surga atawa teka murunsia? Sangai Aku!" ³¹ Here mapakat isa andri salain nelang kaeau, "Dami takam nyangai, 'hingka surga,' Hanye sagar kaeau, 'Balalu, dayainun hanyu puang parasaya ma hanye?' ³² Kude, dami takam nyangai, 'hingka murunsia'?" Kawan pemimpin yiru takut ma ulun rama deya here katuluh nganggap hi Yohanes yiru tu'u isakaulun nabi. ³³ Deya yiru, here nyangai Yesus, "Kami puang karasa," Udihie, Yesus kaeau ma here, "Kalahie pada Aku, Aku pada puang sagar iwara ma naun andri kuasa inun Aku ngulah kawan hal yiru."