Pelayanan Hi Yohanes Pembaptis ¹ Yenalah awalni Injil Yesus Kristus, Iya Alatalla, ² Ialah kala sa nasurat wuang kitab Nabi Yesaya: "Dinung! Aku ngirim utusan-Ku badahulu teka Hanyu sa sagar mempersiapkan lalan ma-Hanyu. Maleakhi 3:1 ³ Naan lengan ulun kamiak-miak hang pulau haket: 'Siapkanlah lalan ma Tuhan, nasanjari lalan-Ni sa lurus'" Yesaya 40:3 ⁴ Jari hi Yohanes ngapandrus kawan ulun hang pulau haket nelang bakhotbah hal pandrusan pertobatan nampan dosa na ampuni. ⁵ Balalu, katuluh penduduk Yudea andri katuluh ulun Yerusalem hawi nunung hi Yohanes. Hanye ngapandrus here hang hungei Yordan, palus here mangaku dosa-dosani. ⁶ Hi Yohanes makai wulu unta andri huruk pingangni teka kudit. Hanye kuman belalang andri madu hutan. ⁷ Hi Yohanes bakhotbah andri kaeau, "Udi aku sagar hawi Erang kaulun sa labih bakuasa teka aku. Aku puang layak membungkuk andri napas tadi sanal-Ni. ⁸ Aku ngapandrus hanyu andri ranu, kude Hanye sagar ngapandrus hanyu andri Roh Barasis. "Hi Yohanes Ngapandrus Yesus ⁹ Andri, terjadilah andrau yeru, Yesus hawi teka Nazaret, wilayah Galilea, balalu napandrus deya hi Yohanes hang hungei Yordan. ¹⁰ Udi balua hingka ranu Yesus nantau langit puhi balalu Roh ialah burung merpati minau ma amau-Ni. ¹¹ Andri, narengei lengan hawi teka surga, "Hanyu adalah Anak sa Kukasihi. Ma Hanyu ai Aku berkenan." Yesus Nacoba deya Iblis ¹² Udi yeru; Roh ngenei Yesus ma pulau haket. ¹³ Hanye muneng hang pulau haket salawah epat pulu andrau nelang nacoba deya Iblis. Yesus muneng hang helang pulau satua liar andri para malaikat melayani Hanye. Yesus Nampihabar Injil Alatalla hang Galilea ¹⁴ Udi hi Yohanes na penjara, Yesus tulak ma wilayah Galilea andri nampihabar Injil Alatalla. ¹⁵ Hanye kaeau, '"Haut ganap waktuni, Kerajaan Alatalla haut ri'et. Batobatlah andri parsayalah ma Injil!" Yesus Midi Papire Murid ¹⁶ Hantek Yesus takia hang iring danau Galilea, Hanye kadinung hi Simon andri Andreas, pulaksanaini, here rahat malunta hang danau deya here tukang ngakali kenah. ¹⁷ Balalu, Yesus kaeau ma here, "Uma Aku leh naun, himpan Aku nasanjari naun tukang lunta murunsia." ¹⁸ Hi Simon andri hi Andreas wansit nanan lunta ni balalu uma-Ni. ¹⁹ Dami Hanye tulak magin lawit lagi, Hanye kadinung hi Yakobus, iak Zebedeus, andri hi Yohanes, pulaksanaini, sa naan hang jukung rahat nangkaeh lunta. ²⁰ Udi yeru, Yesus nerau here balalu here nanan amah here, hi Zebedeus, hang jukung baya kawan buruh sa naupani, balalu tulak uma Yesus. Yesus Mangajar nelang Penu Kuasa ²¹ Udi yeru, here hampe hang Kapernaum andri hampe tiba andrau sabat, Yesus masuk ma sinagoge andri mangajar. ²² Here wauh nyanrengei ajaran-Ni deya Hanye mangajar sameh ulun sa ampun kuasa, puang kala kawan ahli Taurat. ²³ Hantek yeru, hang sinagoge naan isa kaulun upu sa karasukan roh raat andri hanye kamiak, ²⁴ eauni, "Inun urusan Hanyu andri kami, Yesus teka Nazaret? Inun Hanyu hawi sagar membinasakan kami? Aku kataru hie Hanyu na. Hanyu adalah Sa Barasis teka Alatalla!" ²⁵ Kude, Yesus maharek hanye, eau-Ni, "Muku! Balua teka ulun ina!" ²⁶ Udi roh najis yeru ngagunsang gunsang hanye nelang kamiak andri lengan hante, balualah roh yeru teka hanye. ²⁷ Here katuluh wauh nelang nunti isa andri sa lain, eauni, "Inun yena? isa ajaran wa'u andri penu kuasa! Hanye bahkan marintah kawan roh najis nelang here nu'u ma-Hanye." ²⁸ Balalu, habar hal Hanye hinang tasiar ma awe-awe hampe ma katuluh wilayah Galilea. Ineh Kasian hi Simon andri Ulun Rama Nasamare ²⁹ Hinang udi Yesus andri kawan murid-Ni nanan sinagoge, here masuk ma lewu hi Simon andri Andreas, baya Yakobus andri Yohanes. ³⁰ Kude, Ineh kasian hi Simon ganyah mangkading deya mekum, makani here hinang mawara wangunni ma Yesus. ³¹ Yesus pun nunung hanye nelang negei tanganni balalu ngarawah hanye mindri. Hantek yeru jua mekumni wawai andri wawei yeru palus melayani here. ³² Hantek haut kamalem, udi mate andrau leteng, here ngenei ma Yesus ulun sa sakit andri karasukan roh raat. ³³ Balalu, katuluh penduduk kota bakumpul hang muka manawang lewu yeru. ³⁴ Yesus nyamare rama ulun sakit sa rama masam panyakit nelang mangusir rama setan. Kude, Hanye nguring kawan setan yeru bapaner, deya here karasa Hanye. Yesus Badoa andri Nampihabar Firman ³⁵ Ka'ayat tu'u, hantek andrau masih ma'ieng, Yesus kaelan andri tulak ma uneng sa suni, ³⁶ balalu Hanye badoa hang yaru. Udi yeru hi Simon andri kawan ulun sa sindrahni ngantara Yesus. ³⁷ Hantek here kahaba Yesus, here kaeau, "Katuluh ulun ngantara Hanyu!" ³⁸ Udi yeru, Yesus kaeau, "Hayu takam tulak ma kota-kota sa riet himpan aku pada ta'u bakhotbah ma kawan ulun hang yaru. Deya, itilah alasan Aku hawi." ³⁹ Deya yeru, Yesus tulak nangkah katuluh wilayah Galilea. Hanye mambaritakan firman hang sinagoge-sinagoge here andri mangusir kawan setan. Ulun Kusta Nasamare ⁴⁰ Balalu, naan erangkaulun sa sakit kusta hawi ma Yesus. Hanye mamohon andri basujud nahadap Hanye andri kaeau, "Amun Hanyu hakun, Hanyu ta'u nampi tahir aku." ⁴¹ Tagarak deya rasa belas kasihan, Yesus nampiulur tangan-Ni andri negei ulun yeru nelang kaeau, "Aku hakun. Jarileh tahir!" ⁴² Hantek yeru jua, panyakit kustani wawai andri ulun yeru jari tahir. ⁴³ Yesus hinang nunyu ulun yeru tulak nelang nampiitung hanye tu'u. ⁴⁴ Yesus kaeau ma hanye, "Ada ngantuh inun-inun ma hie pun hal yena. Kude, tulakleh, nasantarang tenganu ma imam, andri naulah persembahan kurban deya hanyu haut ware sameh ialah sanahuyu deya Musa himpan jari saksi neu here." ⁴⁵ Kude yeru, ulun iru tulak andri mulai mambaritakannya andri manyabarkan barita yeru sara luas andri tarang-tarangan. Dagana yeru Yesus puang ta'u lagi masuk bebas ma kota, kude muneng hang luar, hang daerah sa suni. Kude, kawan ulun hingka katuluh uneng tatap nunung Hanye.