¹ Udi sungkat mawuang jukung, Yesus nyabarang danau balalu hampe hang tumpuk natat-Ni. ² Hang yaru, ulun nginsing nunung Hanye erang kaulun lumpuh sa mangkading hang patah. Dami Yesus kadinung kaparisayaan here, Yesus kaeau nengkan ulun lumpuh yiru, "Ampi kuat ateinu, anak-Ku, dosanu haut naampuni." ³ Udi yiru, papire kaulun guru agama kaeau hang wuang atei here, "Ulun yiti mahina Alatalla!" ⁴ Kude, Yesus karasa pikiran here, eau-Ni, "Dainun naun mamikir sa jahat hang wuang atei naun? ⁵ Saawe sa labis murah, ngantuh, "Kawan dosanu haut naampuni,' atawa ngantuh 'Ambuan hulu takia'? ⁶ Kude nampan naun karasa amun hang ambau tane Anak murunsia bakuasa ngampun dosa." Balalu, Yesus kaeau nengkan ulun lumpuh yiru, "Ambuan, enat patahnu, hulu mudi!" ⁷ Balalu ulun lumpuh yiru ambuan palus mudi. ⁸ Kude, tawuk ulun rama kadinung kajadian yiru, here tuu mandam palus nawat Alatalla sa ngami kuasa kala yiru hanteni ma murunsia. Matius tukang tagis pajak umba Yesus ⁹ Udi Yesus tulak teka unengan yiru, Hanye kadinung erang kaulun sa naherau Matius ganyah maharung hang unengan ulun nagis pajak. Yesus kaeau nengkan hanye, "Hayu umba Aku." Balalu hi Matius minri palus umba Yesus ¹⁰ Tawuk Yesus maharung kuman hang lewu Matius, rama hawi kawan tukang tagis pajak anri kawan ulun badosa, balalu umba maharung kuman baya Yesus anri kawan murid-Ni. ¹¹ Dami kawan ulun Farisi kadinung hal yiru, balalu here kaeau ma kawan murid Yesus, "Daya inun Guru naun kuman baya anri kawan tukang tagis pajak nelang anri kawan ulun badosa?" ¹² Kude, Yesus karengei hal yiru, balalu nuing, "Ulun sehat puang parlu tabib, ekat ulun sa sakit. ¹³ Pantaru inun arati lengan Alatalla sa kaeau kalayiti, 'Ahilelo sa nakabahumenKu, puang ekat parapah,' daya Aku hawi puang lepuh nerau kawan ulun sa nganggap dirini maeh, malengkan ma kawan ulun badosa." Tuntian hal bapuasa ¹⁴ Udi yiru, kawan murid Yohanes hawi nunung Yesus babalu here nunti, "Wuah inun kami anri kawan ulun Farisi puasa, kude kawan murid-Nu puang puasa? ¹⁵ Yesus nuing, "Taulah kawan hengau pangantin mahanang atei amun pangantin upu magun naan baya anri here? Kude, naan wayahni pangantin upu yiru naalap teka here, tawuk yiru wau here bapuasa. ¹⁶ Puang uweng ulun numpang kain sa wau ma pama sa uhang, daya kain yiru sagar nyansitat pama sa uhang balalu magin hante sitatni. ¹⁷ Kala yiru pada, puang uweng ulun sa nuang anggur wau mawuang kantung kudit sa uhang. Daya, kantung kudit yiru sagar pairah, balalu anggurni tunrak, nelang kantung yiru bungkas. Kude, ulun nyimuh anggur wau ma kantung kudit sa wau pada nampan kararuehni tatap maeh." Yesus ngambuan ulun matei nelang nyamare ulun sakit ¹⁸ Rahat Yesus bapaner anri kawan ulun rama, hawi erang kaulun pamimpin lewu sumbayang palus nyambah Yesus, eauni, "Anakku sa wawei wau budas matei. Kude, awat hawi lepuh ngandak tanggan-Nu hang ambau hanye, nampan hanye welum kamulek." ¹⁹ Balalu Yesus ambuan palus tulak umba ulun yiru, kala yiru pada anri kawan murid Yesus. ²⁰ Naan erang kaulun wawei sa haut rueh walas taun lawahni uyuh ngaret mahanang daya pandarahan, hawi naripi Yesus hingka wading palus negei hujung jubah-Ni, ²¹ Daya pikir wawei yiru, "Amun aku kaiyuh sunah nyawir hujung jubah-Ni, aku sagar ware." ²² Kude, Yesus iwaleng palus kadinung wawei yiru, balalu kaeau, "Ampi kuat ateinu, anak-Ku, kaparisayaannu haut nyamare hanyu." Hang tawuk yiru jua wawei yiru ware. ²³ Dami Yesus hampe hang lewu pamimpin lewu sambayang yiru balalu kadinung kawan ulun sa niup suling nelang kawan ulun rama sa ngulah rawek rukah, ²⁴ Hanye kaeau ma here, "Kaluar naun katuluh, daya iya wawei yina puang matei, hanye manre." Balalu here katuluh kakihi karengei Yesus kaeau kalayiru. ²⁵ Udi ulun rama yiru nausir maluar, Yesus masuk palus negei tangan anak yiru, balalu iya wawei yiru ambuan. ²⁶ Habar yiru tasiar ma katuluh daerah yiru. Yesus nyamare rueh kaulun pehe ²⁷ Tawuk Yesus tulak teka yiru, rueh kaulun pehe naharak Hanye nelang nanterau mamehet, "Palelo kami, Anak Dawid." ²⁸ Dami Hanye masuk mawuang lewu, kararueh ulun pehe yiru nien hawi nunung Hanye balalu Yesus nunti teka here, "Inun naun parisaya Aku tau nyamare naun?" Here rueh nuing, "Kami parisaya, Tuhan!" ²⁹ Balalu, Yesus manjamah mate here,nelang kaeau, "Daya naun parisaya, maka jari inun sa naharap daya naun." ³⁰ Balalu here rueh tau kadinung. Yesus bahimat ngampi itung here rueh, "Ada budas iwawara ma hie-hie hal yiru." ³¹ Kude, here rueh tulak nelang iwara kabar neu Yesus ma katuluh daerah yiru. Yesus Nyamare Ulun Muna ³² Tawuk rueh kaulun yiru tulak, erang kaulun muna sa karasukan roh jahat nainsing nunung Yesus. ³³ Dami roh jahat yiru nausir, tawuk yiru jua ulun muna yiru tau bapaner. Ulun rama yiru wauh nelang kaeau, "Huan suah kami kadinung kajadian kala yiti hang Israel." ³⁴ Kude kawan ulun Farisi kaeau, "anri kuasa panghulu roh jahat Hanye ngusir kawan roh jahat yiru." Hene Wasian Kude Butit Tukang Wasi ³⁵ Yesus tulak bakaliling ma katuluh tumpuk anri ma katuluh desa nelang ngajar hang kawan lewu sumbayang, palus iwara Kabar Maeh neu Karajaan Sorga, palus nyamare hene masam panyakit anri kahanangen. ³⁶ Tawuk Yesus kadinung ulun rama yiru, Hanye tuu palelo ma here, daya here puang badaya nelang puang paurus kala kawan babiri sa puang nasaga. ³⁷ Balalu Hanye kaeau nengkan kawan murid-Ni, "Wasian hene, kude ulun tukang wasi butit." ³⁸ Daya yiru, laku ma Tuhan sa ampun wasian, nampan ngirim kawan ulun pakai masi."