¹ Dami, andrau Sabat haut paitah, niba kaayat subuh, hang andrau kaisa mingu yiru, Maria Magdalena andri Maria sa lain tulak lepuh naua pasaran yiru. ² Salenga, gempa bumi tamam tuu malekat Tuhan minau tika surga, hawi ngaguling watu yiru, balalu maharung hang amauni. ³ Uruwawani ialah kelat pakaianni mahilak ialah salju. ⁴ Daya takut tuu kadinung yiru, kawan penjaga hang yiru hampe neter balalu jari ialah kawan ulun matei. ⁵ Balalu, malekat yiru kaeau ma kawan wawei yiru, ''Ada takut daya aku karasa amun naun ngantara Yesus sa haut nabalasangar. ⁶ Hanye puang uweng hang yina daya Hanye haut amuan tika pampatei ialah sa haut na eau-Ni. Ayu, dinung unengNi mangkading. ⁷ Hinang tulak wara ma kawan murid-Ni bahwa Hanye haut amuan hingka padang ulun matei, dinung, Hanye dahulu tika naun ma Galilea. Hang yaru naun akan kadinung Hanye. Itung, aku haut kaeauni manaun.'' ⁸ Balalu, here wawansit nanan pasaran yiru nelang takut nelang arai mihewu; balalu nempat lepuh iwara yiru ma kawan murid-Ni. ⁹ Salenga, dinung, Yesus manalu here nelang kaeau, ''Tabe!'' Balalu, here hawi nunung Yesus, negei pee-Ni, nyamah Hanye. ¹⁰ Udiyiru, Yesus kaeau ma here,''Ada takut; tulak wara ma kawan pulaksanai-Ku lepuh tulak ma Galilea, hang yaru, here akan kadinung Aku.'' Kawan Panjaga Pasaran Nabayar nampan Ipusu ¹¹ Dami kawan wawei yiru tulak, papire penjaga yiru tulak ma tumpuk iwara ma kawan imam kepala neu katuluh sa haut jari. ¹² Dami, here bakumpul kawan pemimpin Yahudi. Udi here mapakat, here ngami duit hene ma kawan penjaga yiru, ¹³ nelang kaeau, ''Wara ma kawan ulun, Kawan murid Yesus hawi kamalem ganyah kami mandre ngalat bangkai Yesus,' ¹⁴ Amun, gubernur karengei hal yina, kami akan ngararumuk hanye nampan naun puang wuah kesulitan.'' ¹⁵ Balalu, here narime duit yiru ngulah iah sa haut naajar ma here,' sarita yiru masih tasiar hang padang ulun Yahudi hampe andrau yina. Amanat Agung Yesus ¹⁶ Udiyiru, kasawalas murid tulak ma Galilea, ma bukit sa haut na tutui Yesus ma here. ¹⁷ Dami here kadinung Hanye, here nyamah Hanye. Kude, naan tika here sa ragu-ragu. ¹⁸ Balalu, Yesus hawi kaeau ma here, '' Katuluh kuasa haut naami ma-Aku, hang sorga maupun hang amau tane. ¹⁹ Daya yiru, tulak kia ma katuluh bangsa sanyari here jari murid-Ku, baptis here hangwuang ngaran Amah, Anak, andri Roh Barasis, ²⁰ ajar here ngalut nuu sa haut na pirintah Ku ma naun; itung, Aku saratang nyindrah naun, hampe pijumpuhan alam.''