KABAR KAELAN'EN YESUS ¹ Hang andrau partama minggu yiru, hantek kaayat subuh,kawan wawei yiru tulak ma pasaran Yesus nelang ngen'ei kawan rarampah sa haut na sadia here. ² Nelang here kadinung watu panutup pasaran haut pasasar hingka pasaran. ³ Kude, hantek here masuk, here puang kahaba bangkai Tuhan Yesus. ⁴ Hantek here lagi wa'uh tatu'u hal yiru, salenga na'an rueh kaulun bapakai'an bakilu'an mindri hang lapeh here. ⁵ Kawan wawei yiru takut tatu'u nelang suntup uruwawa here, kude karueh ulun yiru kaeyau,"Daya inun naun ngantara ulun sa welum hingka penah kawan ulun matei? ⁶ Yesus pauweng hang yiti, hanye haut amuan . Itung inun sa haut na eyau Ni ma naun hantek hanye masih hang Galilea. ⁷ Hanye kaeyau amun Anak Murunsia puang iyuh ang nasarah ma tangan kawan ulun badusa, nabalasangar,nelang kaelan welum hang andrau sakatelu." ⁸ Balalu kawan wawei yiru kaitung ne'u paneran Yesus. ⁹ Dami here mudi hingka pasaran Yesus, here nyarita katuluh kajadian yiru ma kasawalas rasul andri ma katuluh ulun sa uma Yesus salainni. ¹⁰ Kawan wawei sa nyarita kajadian yiru ma para rasul hanye yiru Maria Magdalena, Yohana, Maria ibu Yakobus, andri papire wawei salain. ¹¹ kude, paneran kawan wawei yiru ipusu angap kawan para rasul andri here puang parisaya ma kawan wawei yiru. ¹² kude, Petrus mindri palus nempat ma pasaran Yesus. Hanye ijuku nelang nantau ma wuang, kude hanye ekat kahaba kain linen pamungkus bangkai. Udiyiru, Petrus mudi nelang wa'uh tatu'u andri inun sa haut tajadi. YESUS NANTARANG TENGA NI MA KAWAN MURID NI HANG LALAN NUJU EMAUS ¹³ Hang andrau yiru jua , 2 kaulun murid Yesus tulak ma isa tumpuk sa bangaran Emaus sa lawitni kakira km hingka kota Yerusalem. ¹⁴ Karueh ulun yiru bapaner hal katuluh paritiwa sa tajadi. ¹⁵ Hantek here rahat bapaner bagurayang, Yesus raerai hawi nyariet nelang takia sindrah here. ¹⁶ Kude, mate here kai'ni Yesus kude naan sanahalang balalu here puang kataru Hanye. ¹⁷ Yesus kaeyau ma here," inun sanapaner naun rueh nelang takia ?" Karueh ulun yiru tarie nelang uruwawa tuu mahanang atei. ¹⁸ Isa hingka here sa bangaran Kleopas kaeyau ma Hanye," Inunkah Hanyu isa kaulun asing hang Yerusalem sapuang karasa hal inun sahaut tajadi hang yaru wau yiti?" ¹⁹ Yesus kaeyau," kajadian inun?" Here kaeyau ma Hanye, " kajadian Yesus hingka Nazaret. Hanye erang kaulun Nabi sa penu kuasa hang wuang paneran andri ulah gawi Ni hang hadapan Alahtalla andri hang hadapan katuluh bangsa kami. ²⁰ Kude, kawan imam kepala andri kawan pamimpin kami nyarah Hanye ne'u na hukum matei, nelang here mantak hang kayu balasangar Hanye. ²¹ Sabujurni kami baharap Hanye sagar mambebas bangsa Israel. Kude andrau yiti andrau katelu hingka mulai katuluhni yiru tajadi. ²² Kude, papire wawei kawan hengau kami ngulah kami em'ah. Hantek here naan hang pasaran ka'ayat subuh, ²³ Here pauweng kahaba bangkai Yesus. Balalu, here mulek nelang kaeyau here haut kadinung penampakan kawan malaikat, sa iwara amun Hanye welum. ²⁴ Udiyiru, papire hingka kami tulak ma pasaran nelang kadinung pada kala sana paner daya kawan wawei yiru. Kude, here puang kadinung Yesus." ²⁵ Udiyiru Yesus kaeyau ma here, "Eh , tuu lunga naun nelang kajut unte ne'u parisaya katuluh sa haut na wara daya kawan nabi ²⁶ Angneh Kristus puang iyuh'ang kainam kahanagen yiti andri masuk ma wuang kemuliaan Ni." ²⁷ Balalu , Yesus manarang katuluh sanatulis hangwuang Buku barasis ne'u tenga-Ni, Nuku hingka Buku Moses hampe katuluh buku kawan nabi. ²⁸ Hantek here haut riet ma tumpuk Emaus, Yesus takia iyalah kai tampalus kia'an-Ni. ²⁹ Kude, here nangke Hanye nelang kaeyau, "Munengleh baya kami daya andrau haut kai kamalem andri mate andrau kai leteng." Balalu, Yesus masuk ne'u muneng baya here. ³⁰ hantek Hanye bakumpul andri here hang meja makan, Yesus ngalap rute nelang maberkatini. Hanye miah rute balalu ngami ma here. ³¹ Hantek yiru mate here pauka andri here kataru Yesus. Kude Hanye sakatika wawai hingka paninungan here. ³² Udi yiru, bapaner here isa andri salain,"Puangkah atei takam arai mihewu hantek Hanye bapaner anri takam salawah pakia'an andri katika Hanye manarang Buku Barasis ma takam?" ³³ Hantek yiru jua, here mindri balalu mulek ma Yerusalem. Here manalu kasawalas murid andri kawan ulun sa baya here sa lagi rama bakumpul. ³⁴ Kawan marid yiru kaeyau ma here rueh,"Tuhan tu'u haut amuan welum nantarang tenga ma hi Simon!" ³⁵ Karueh kaulun sa um'a Yesus yiru nyarita inun sa haut tajadi hang wuang pakia'an here. Here nyarita kala'awe here kataru Yesus hantek Hanye miah rute. YESUS NANTARANG TENGA-NI MA KAWAN MURID-NI ³⁶ hantek rueh kaulun yiru masih bakesah halyiru, Yesus mindri hang penah here nelang kaeyau ma here , "damai baya naun." ³⁷ Kude, here em'ah nelang takut. Here min'a amun here ga'nyah kai'ni alah. ³⁸ Udiyiru, Yesus kaeyau ma here, "dainun naun em'ah nelang bemang hang atei naun? ³⁹ Dinung tangan andri pe'e-Ku. iri tuu Aku. Kam'a Aku nelang dinung, alah pauweng daging andri taulang kala sa dinung naun hang Aku." ⁴⁰ Udi Yesus iwara iti, Hanye nantarang tangan andri pee-Ni ma here. ⁴¹ Samantara here huan parisaya daya mihewu nelang wauh tatu'u, Yesus nunti ma here, "Inun hang yiti naun naan sa tau na kuta? ⁴² Balalu here ngami erang kasayat kenah bagoreng ma Hanye. ⁴³ Yesus ngalap kenah yiru palus nguta hang hadapan here. ⁴⁴ Udiyiru, Yesus kaeyau ma here, iti sahaut nawara-Ku ma naun hantek -Aku masih baya andri naun. Katuluh sa natulis ne'u-Aku hang wuang hukum Taurat Moses, buku para nabi, andri Mazmur puang iyuh'ang na ganapi." ⁴⁵ Udiyiru Yesus nguka pikiran here himpan here tau kataru isi Buku Barasis. ⁴⁶ Yesus kaeyau ma here, "naan natulis amun Kristus puang iyuh'ang sansara andri kaelan welum teka padang ulun matei hang andrau katelu. ⁴⁷ Andri, batobat ne'u pangampunan dosa sagar na wara hang wuang ngaran-Ni ma katuluh Bangsa, mulai hingka Yerusalem. ⁴⁸ Naun kawan saksi hingka katuluh yiti. ⁴⁹ Aku sagar ngirim janji Amah-Ku ma naun. Kude, unengleh hang kota Yerusalem hampe naun naperlengkapi andri kuasa sa hingka amau." YESUS PAENAT MA SURGA ⁵⁰ Udiyiru, Yesus ngenei kawan here sauma Hanye kaluar kota hampe hang Betania. Hang yaru, Hanye ngenat tangan Ni mambarkati here. ⁵¹ hantek Yesus mambarkati here, Hanye bapisah andri here nelang paenat ma surga. ⁵² Balalu, here ileku nyamah- Hanye, udiyiru mudi ma Yerusalem andri atei sa arai tatu'u. ⁵³ Here balalu muneng hang Bait Allah nelang nawat Alahtalla.