¹ Balalu, Yesus masuk palus mitah tumpuk Yerikho. ² Hang yaru naan erang kaulun upu sa bangaran hi Zakheus, Hanye yiru pamimpin panagis sukai nelang erang kaulun sa tatau. ³ Hanye sini kadinung Yesus, kude puang tau dagana ulun rama; nelang tengani ime. ⁴ Balalu, hi Zakheus nempat badahulu teka ulun rama palus mamai kakau ara himpan tau ninung Yesus daya Hanye sagar mitah unengan yiru. ⁵ Hantek Yesus hampe ma unengan Zakheus hang kakau ara yiru, Hanye mihangut anri kaeau, "Zakheus, hinang minau daya anrau yina Aku hamen mamai ma lewunu." ⁶ Balalu, hi Zakheus iwawansit minau palus nahalu Yesus anri sanang atei. ⁷ Kude, tawuk katuluh ulun kadinung yiru, here balalu murumunyum nelang kaeau, Hanye jari tamu hang lewu erang kaulun sa badusa." ⁸ Udi yiru, hi Zakheus minri palus kaeau ma Tuhan, "Tuhan, dinung, saparu teka harataku sagar na sadakah ma ulun paua, anri amun aku naan ngalap harata wat hie eleh, aku sagar ngampudini 4 kalini." ⁹ Balalu, Yesus kaeau ma hi Zakheus, "Hang anru yina, kasalamaten haut hampe ma lewu yina daya hanyu yina pada turunan Abraham. ¹⁰ Sabab, Anak Murunsia hawi lepuh ngantara nelang manyalamat ulun sa wawai." Palayan sa Satia anri Palayan sa Jahat ¹¹ Padingian here nyanrengei urasni yiru, Yesus nampalus anri ma ngesah isa rarapisan daya Hanye haut rupak Yerusalem nelang daya here mina amun Karajaan Alatalla sagar hawi. ¹² Dagana yiru, Hanye pada kaeau, "Erang kaulun bangsawan tulak ma nagara sa lawit neu nadudus jari raja, udi yiru hanye sagar mudi. ¹³ Dami hiye, tuan yiru ngumpul sapuluh kaulun palayanni palus ngami duit 10 mina. Eauni ma hare, 'Badagangleh makai duit yena hampe aku hawi.' ¹⁴ Kude, kawan panduduk hang nagarani muar anri hanye, dami hanye tulak here ngirim utusan nelang kaeau, 'Kami puang hamen ulun yiri jari raja kami' ¹⁵ Udi na dudus jari raja, bangsawan yiru mulek balalu nerau kawan palayan sa haut na amini duit, mahadap hanye himpan tau karasa pire kauntungen iyuh here hingka badagang. ¹⁶ Palayan sapalanungkai hawi anri kaeau, 'Tuan, duit 1 mina watnu yiru haut bahujung jari 10 mina.' ¹⁷ Raja yiru kaeau ma hanye,'Maeh tu'u, hanyu palayan sa maeh! Dagana hanyu satia hang wuang urusan sa rumis, hanyu sagar mamarintah hang sapuluh tumpuk.' ¹⁸ Palayan sa ka rueh hawi pada anri kaeau, 'Tuan, duit 1 mina watnu yiru haut bahujung jari 5 mina.' ¹⁹ Balalu, raja yiru kaeau ma palayan yiru, 'Mamarintahleh hanyu hang 5 tumpuk.' ²⁰ Udi yiru, hawi pada palayan sa lainni anri kaeau, 'Tuan, iri duit 1 mina watnu sa simuhku hang wuang sapu tangan. ²¹ Aku puang heei anri hanyu daya hanyu ulun sa karas. Hanyu ngalap inun sa puang watnu nelang ngutik inun sa puang suah na amulenu.' ²² Balalu, raja yiru kaeau ma hanye, 'U palayan sa jahat! Aku sagar nukum hanyu sarurui anri lengannu. Jari, hanyu karasa amun aku ulun sa karas, sa ngalap inun sa puang watku anri ngutik inun sa puang suah na amuleku? ²³ Amun kala yiru, daya inun hanyu puang namasuk duitku yiru ma bank himpan hantek aku mulek, aku sagar ngalap duitku amput bungani?' ²⁴ Balalu, raja yiru kaeau ma kawan ulun sa minri hang yiru, 'Alap duit hingka hanyeri palus ami ma ulun sa kaiyuh 10 mina.' ²⁵ Kude, here kaeau ma raja yiru, 'Tuan, palayan yiru haut kaiyuh 10 mina.' ²⁶ Raja yiru nyangai, 'Aku kaeau ma hanyu, tatiap ka ulun sa naan akalni na ami labis, kude hingka ulun sa mahi inun apani, katuluh sa naan hang hanye sagar na alap. ²⁷ Balalu itati, hie eleh kawan musuhku sa puang hamen aku jari raja here, enei mayati palus wunu here hang hadapanku.'" Yesus na Samut Ialah Raja ²⁸ Udi Yesus iwara kawan hal yiru, Hanye takia hang hadapan nuju Yerusalem. ²⁹ Hantek Hanye hampe hang riet tumpuk Betfage anri Betania, rupak bukit sa bangaran Bukit Zaitun, Hanye ngutus rueh kaulun murid-Ni. ³⁰ Eau-Ni ma here, "Hulu tulak ma tumpuk sa naan hang hadapan takam yiru. Balalu, hantek hanyu masuk ma yaru, hanyu sagar kadinung erang ka ukui anak keledai sa na awet nelang huan suah na sungkat ulun. Uka awetan anak keledai yiru palus enei ma yati. ³¹ Amun naan ulun sa nunti pi hanyu, 'Daya inun hanyu ngenei keledai yiru?', eauleh kala yina: Tuhan mamarluni." ³² Balalu, tulak ba rueh murid sa na utus-Ni yiru nelang kahaba inun eleh iyalah sa na eau-Ni ma here. ³³ padingian here nguka awetan anak keledai yiru, ulun sa ampun nunti anri here, "Daya inun hanyu nguka awetan anak keledai yiru?" ³⁴ Balalu here nyangai, "Tuhan mamarluni." ³⁵ palus,here ngenei anak keledai yiru ma Yesus nelang namik kawan jubah here hang amau anak keledai yiru, balalu Yesus sungkat hang amauni. ³⁶ Tawuk Yesus mitah makai keledai yiru, kawan ulun merang jubah here hang penah lalan. ³⁷ Hantek Yesus kai hampe hang Yerusalem, hang lalan sa minau hingka arah Bukit Zaitun, uras ulun sa uma Hanye mulai nawat Alatalla nelang arai atei anri lengan sa mehet. Here ngantuh tarimekasis ma Alatalla daya haut ngami ka ajaiban sa haut na dinung here. ³⁸ Here kaeau, "Na berkat Raja sa hawi hang wuang ngaran Tuhan, sanang marauh hang surga nelang tawat hormat hang unengan sa panga amau!' Mazmur 118:26 ³⁹ Papire kaulun Farisi hang penah ulun rama yiru kaeau ma Yesus, "Guru, iyai kawan murid-Nu." ⁴⁰ Kude, Yesus nyangai, amun here suni, kawan watu yiti sa sagar miuik." Yesus Itungkau Yerusalem ⁴¹ Tawuk Yesus magin rupak Yerusalem anri ka dinung tumpuk yiru, Hanye palus nungkau. ⁴² Eau-Ni, "Umpamani anrau yina hanyu kataru inun sa tau ngenei sanang marauh hang amaunu. Kude, itati kawan hal yiru na sanina hingka matenu. ⁴³ Daya sagar hawi wayahni hantek kawan musuhnu sagar ngapinri punte-walewe ngawariung hanyu nelang mukah hanyu hingka katuluh unengan. ⁴⁴ Here sagar ngampi hansur hanyu, amput kawan anaknu sa sanina hang pipiknu. nelang, here puang sagar nanan isa watu jua sa ipasusun hang unenganni dagana hanyu puang mantaru tawuk Alatalla hawi neu nyalamat hanyu." Yesus Ngunur Kawan Ulun sa Miarian hang Bait Allah ⁴⁵ Balalu, Yesus masuk ma Bait Allah palus ngunur kawan ulun sa miarian hang yiru. ⁴⁶ Eau-Ni ma hare, "Naan nasurat: 'Lewu-Ku sagar jari unengan laku dua,' kude hanyu haut ngulah unengan hanai parampok!" ⁴⁷ Balalu, Yesus tiap anrau ngajar hang Bait Allah. kude, kawan pamimpin imam, kawan panai Taurat, anri kawan pamimpin bangsa yiru ngantara sara munu Hanye. ⁴⁸ Kude, Here puang kahaba sarani daya katuluh ulun negei lengan Yesus.