¹ Udi yiru, Yesus nyarita isa rarapisan ma kawan murid-Ni himpan here saratang laku dua nelang ada putus asa. Eau-Ni,"Hang isa tumpuk, naan erang kaulun hakim sa puang takut anri Alaltalla nelang puang mahormat ulun lain. ³ Hang tumpuk yiru, naan erang kaulun wawei walu sa tatarusan hawi nunung hakim yiru anri kaeau, 'Ami kaadilan ma aku nadap musuhku.' ⁴ Hang papire lawah, hakim yiru puang hamen ngarawah wawei walu yiru. Balalu, hakim yiru kaeau hawuang ateini, 'Biar aku puang takut anri Alatalla nelang puang hormat anri hie-hie, ⁵ kude gana wawei walu yiru tatarusan maur aku, ware aku ngami kaadilan ma hanye himpan hanye puang lagi ngampi daur aku anri pihawianni sa tatarusan yiru.'" ⁶ Balalu, Tuhan kaeau,"Rengeileh inun sa na eau hakim sa puang adil yiru. ⁷ Inun Alatalla puang sagar ngami kaadilan ma kawan ulun pidian-Ni sa ilaku ma Hanye ka anrau ka malem? Inun Hanye sagar ngulur hampe lawah wau ngarawah here? ⁸ Aku kaeau ma hanyu, Hanye sagar hinang ngami kaadilan ma here. Kude, hantek Anak Murunsia hawi, inunkah hanye sagar kaiuh iman hang amau tane?" Rarapisan neu Ulun Farisi anri Panagis Sukai. ⁹ Yesus pada nahampe rarapisan yiti ma papire ka ulun sa kaingkam diri here maeh anri sa ninung ranah ma ulun lain. ¹⁰ Naan rueh kaulun tulak ma bait Allah lepuh laku dua. Sa isa ulun Farisi anri sa lainni erang kaulun panagis sukai. ¹¹ Ulun Farisi yiru minri palus laku dua neu dirini, 'U, Alatalla, aku ngantuh tarimekasis ma Hanyu daya aku puang ialah ulun lain; sa sarakah, sulas, ibela, atawa diwi teka yiru ialah panagis sukai yiti. ¹² Aku puasa rueh kali erang mingu, aku nyarah parpuluhan teka katuluh iyuh-juatku.' ¹³ Balalu, hi panagis sukai minri lawit butit, likan puang heei mihangut ma langit. Nelang napuk-napuk dadani palus kaeau. 'U, Alatalla. Palelu aku, ulun sa badusa yina.' ¹⁴ Aku kaeau ma hanyu, tawuk here mudi ma lewu, panagis sukai yiru sa labis natarime na baning ulun Farisi yiru daya ulun sa ngampi amau dirini sagar na ampi ranah, anri ulun sa ngampi ranah dirini sagar na ampi amau." Yesus anri Kawan Iya. ¹⁵ Balalu, kawan ulun ngenei kawan iya rumis hawi nunung Yesus himpan Hanye manjamah here. kude, tawuk kawan murid kadinung, here nyangit kawan ulun yiru. ¹⁶ Balalu, Yesus nerau kawan iya yiru himpan hawi nunung Hanye nelang kaeau, "Elah kawan iya yiru hawi nunung Aku, ada na uring dagana Karajaan Alatalla wat kawan ulun ialah here yina. ¹⁷ Aku kaeau sa sabujurni ma naun, hie eleh sa puang narime Karajaan Alatalla ialah erang kaulun kawan iya, hanye puang sagar tau masuk ma wuangni." Ulun Tatau anri Karajaan Alatalla ¹⁸ Naan erang kaulun pamimpin nunti ma Yesus,"Guru sa maeh, inun sa musti na ulahku himpan kaiuh mawaris pamelum sa kalalawahni?" ¹⁹ Sangai Yesus ma hanye, "Daya inun hanyu ngantuh Aku maeh? mahi erang kaulun jua sa maeh ka suali Alatalla raerai. ²⁰ Hanyu karasa neu kawan hukum yena: 'Ada ibela, ada munu ulun, ada ngalat, ada ipusu, nelang hurmat ma amah anri inehnu.'" ²¹ Sangai ulun yiru, "Aku haut nampalus urasni yiru hingka aku lagi iya." ²² Hantek Yesus karengei kala yiru, Hanye kaeau ma ulun yiru, "Magun naan sa kurangni. Ari katuluh haratanu palus ami ma kawan ulun paua, balalu hanyu sagar kaiuh harata hang surga; udi yiru hayu, uma aku." ²³ Hantek ulun yiru karengei lengan Yesus yiru, hanye mahanang atei daya hanye yiru tatau tu'u. ²⁴ Balalu Yesus ngulik ma hanye palus kaeau, "Mahadin tu'u ma kawan ulun tatau tau masuk ma wuang Karajaan Alatalla! ²⁵ Hampe labis sutil erang kaukui unta masuk mitah luwang pilus teka erang kaulun sa tatau masuk ma wuang Karajaan Alatalla." Ulun sa Uma Yesus Sagar Narime pamelum sa Kalalawah ²⁶ Kawan ulun sa karengei lengan yiru kaeau,"Amun kala yiru, hie sa tau na salamat?" ²⁷ Sangai Yesus, "Inun sa mustahil ma murunsia puang mustahil ma alatalla." ²⁸ Balalu, hi Petrus kaeau, "Dinung, kami haut nanan inun eleh wat kami himpan uma Hanyu." ²⁹ Yesus kaeau ma here, "Aku iwara sa sabujurni ma hanyu, puang erang kaulun jua sa haut nanan lewu, darangan, pulaksanai, ineh amah, atawa kawan anakni daya malayani Alatalla, ³⁰ sa puang sagar narime kawan hal yiru papire kali likan hang wayah itati, anri hang wayah sa sagar hawi, hanye yiru pamelum sa kalalawahni." Piwaraan neu Pampatei anri Yesus Welum Kamulek. ³¹ Balalu, Yesus ngumpul ka rueh walas murid-Ni anri kaeau ma here, "Rengei, Takam sagar nuju ma Yerusalem nelang inun eleh sa haut na surat daya kawan nabi neu Anak Murunsia sagar na tampalus. ³² Hanye sagar na sarah ma kawan ulun sa puang kataru Alatalla. Hanye sagar na kakeyak, na kahanang, anri na rura. ³³ Nelang, udi here manyiksa Hanye, here sagar munu Hanye. Kude, hang anrau ka telu, Hanye sagar welum kamulek." ³⁴ Kude, kawan murid-Ni mahi sa kataru sunah isa kawan hal yiru. Arti kawan lengan yiru na dina ma here hampe here puang kataru inun sa na paner yiru. Yesus Nyamare Ulun Pehe ³⁵ Tawuk Yesus kai hampe hang tumpuk Yerikho, naan erang kaulun pehe sa ganyah maharung hang iring lalan laku sadakah. ³⁶ Hantek ulun pehe yiru karengei hene kawan ulun mitah, hanye nunti naan inun. ³⁷ Balalu, kawan ulun kaeau ma hanye, "Yesus hingka Nazaret ganyah mitah." ³⁸ Palus, tanterau ulun pehe yiru, "Yesus Anak Dawid, palelu aku!" ³⁹ Kawan ulun sa takia hang hadapan,nyangit ulun pehe yiru nunyu hanye suni. Kude, hanye batamah mehet, "Anak Dawid, palelu aku!" ⁴⁰ Balalu Yesus tarie nelang nunyu himpan ulun pehe yiru na enei nunung Hanye. Hantek ulun pehe yiru nyanriet, Hanye kaeau, ⁴¹ "Inun sa na kabahumennu sa na ulahku ma hanyu?" Ulun pehe yiru nyangai, "Tuhan, aku hamen mateku tau kadinung." ⁴² Yesus kaeau ma hanye, "Kadinungleh, imannu haut nyamare hanyu." ⁴³ Hantek yiru pada, hanye tau ninung palus hanye uma Yesus nelang nawat Alatalla. Hantek ulun rama kadinung hal yiru, hare pada nawat Alatalla.