¹ Haut rama ulun bausaha manyusun isa cataten neu kawan kajadian sa haut naan hang pena-penah takam, ² iyalah neu cataten sa haut na tahampe ma takam daya kawan ulun sa hantek palanungkai haut jari saksi mate anri pambarita Barita Salamat. ³ Daya aku haut piajar katuluhni anri taliti teka palanungkai, patut leh aku pada nyuratni baurutan ma naun, ui Teofilus sa agung, ⁴ himpan hanyu tau karasa kabujuren neu sa haut naajar mahanyu. ⁵ Hantek pamarintahan Herodes, Raja Yudea, naan erang kaulun imam bangaran Zakharia sa asalni teka pipakatan imam Abia. Matueh waweini teka tuturunan Harun, ngaranni Elisabet. ⁶ Zakharia anri Elisabet hanyeru kawan ulun sa bujur hang mate Alatalla. Here welum mahi cacat sasuai hukum anri parentah Tuhan. ⁷ Kude yeru, here mahi anak daya Elisabet mandul nelang karuehni haut matueh tuu. ⁸ Hantek niba giliran kalompokni batugas, Zakharia kaiyuh tugas jari imam hang hadapan Alatalla. ⁹ Nguma kabiasaan kaimaman, Zakharia tapidi teka hasil undi pakai masuk ma Lewu Alatalla anri nutung parapen. ¹⁰ Awuk parapen na parapah katuluh ulun lakudua hang luar. ¹¹ Nyalenga, malekat Tuhan nantarang tenga ma Zakharia anri minri tuhi kawan altar parapen. ¹² Hantek kaindi malekat ru, Zakharia neter nelang tuu takut. ¹³ Kude, malekat yeru kaeau ma hanye,"ada takut, Zakharia, dagana lakudua pilakuaannu haut na rengei. Matueh waweinu, Elisabet, sagar malaheran erang kaulun anak upu ma hanyu balalu hanyu ngami ngaranni Yohanes. ¹⁴ Hanyu sagar arai nelang mihewu, nelang hene ulun uma arai daya pihawianni. ¹⁵ Hanye sagar hante hang hadapan Tuhan nelang puang sagar nguut angur atawa uutan sa ngulah mahamui. Malah, hantek teka wuang wuntung inehni hanye sagar natampenu Ruh Barasis. ¹⁶ Hanye sagar ngulah hene ulun Israel mulek ma Tuhan, Alatalla here. ¹⁷ Hanye sagar takiya badahulu teka Tuhan anri ruh nelang kuasa Elia, pakai ngulah atei kawan amah mulek ma kawan anak here. Hanye jua sagar ngulah kawan ulun sa puang taat mulek ma hikmat kawan ulun bujur. Dagana yeru, hanye ngampisiap umat sa haut nasadia ma Tuhan." ¹⁸ Zakharia maharek ma malekat yeru,"Kalaawe aku tau karasa neu yena? Daya, aku yiti haut matueh anri matueh waweiku pada haut lanyut umur." ¹⁹ Malekat yeru kaeau, "Aku ti Gabriel, malekat sa minri hang hadapan Alatalla. Aku na utus himpan bapaner anri hanyu nelang nampe barita maeh yena mahanyu. ²⁰ Taati rengeileh, Hanyu sagar muna anri patau bapaner hampe anrau kajadian daya hanyu puang parisaya wusi panerku, sa sagar naganapi waktuni." ²¹ Helang waktu yeru, ungkup nganrei Zakharia. Here ipanunti daya inun Zakharia muneng kajut lawah hawuang Lewu Tuhan. ²² Hantek kaluar, Zakharia puang tau bapaner ma here. Here pada karasa amun Zakharia haut kaiyuh paninungen hawuang Lewu Alatalla daya hanye gutu-gutus ngulah isarat ma here, daya patau paner. ²³ Udi waktu tugas kaimananni luput, Zakharia mudi ma lewuni. ²⁴ Udi kajadian yeru, Elisabet mihawuntung balalu isanina tenga salawah dime wulan. Hanye kaeau," ²⁵ Yitileh sa haut naulah Tuhan ma aku. Hanye mamparhati aku anri mahapus amanganku teka ulun rama. ²⁶ Hantek katika Elisabet haut masuk enem wulan mihawuntung, Alatalla ngutus malekat Gabriel ma tumpuk hang wilayah Galilea, sa bangaran Nazaret. ²⁷ Hanye na utus himpan Makalu erang kaulun bujang paruna sa batunangan anri erang kaulun upu bangaran Yusuf, katurunan Dawid. Ngaran bujang paruna hanyeru Maria. ²⁸ Balalu, malekat yeru hawi ma Maria anri bapaner," Tabe, ui hanyu sa naberkati! Tuhan baya hanyu." ²⁹ Karengei eau lengan yeru, Maria basing nunti hawuang ateini neu arati tabe yeru. ³⁰ Malekat ru ngamander ma hanye,"Ada takut, Maria, daya Alatalla haut ngami sinta karuniaNi ma hanyu. ³¹ Sanrengei, hanyu sagar mihawuntung anri maleheran erang kaulun Anak upu, anri hanyu sagar ngampiranNi. Yesus. ³² Hanye sagar jari hante anri sagar na antuh Anak Alatalla Sa Tungkan. Tuhan Alatalla sagar ngami-Ni tahta Dawid, datu hiyang-Ni. ³³ Hanye sagar mamarintah amau katurunan Yakub hampe kalalawah anri karajaan-Ni puang sagar suah jumpuh." ³⁴ Balalu, Maria bapaner ma malekat yeru,"Kalaawe hal yena sagar bakajadian sadangkan aku huan badarangan?" ³⁵ Malekat yeru nyangai anri nuing ma hanye," Ruh Barasih sagar hawi amau hanyu anri kuasa Alatalla sa Pangaamau sagar nyangkuwungnu. Yeruleh sababni, Genda sa sagar lahir yeru barasih anri sagar na antuh Anak Alatalla. ³⁶ Anri, karasanuleh amun Elisabet, pulaksanainu yeru, ganyah mihawuntung pada hang umur tuehni. Hanye sa dahulu na antuh tamanang, taati haut mihawuntung enem wulan. ³⁷ Sabab, mahi naan hal sa mustahil ma Alatalla." ³⁸ Anri, aku yiti walah Alatalla. Jarileh ma aku iyalah hanyu tuing yeru." Udiyeru, malekat yeru tulak nanan hanye. ³⁹ Hang anrau-anrau yeru, Maria basasiap kai tulak ma daerah pagunungan, ma isa tumpuk hang Yehuda. ⁴⁰ Hanye masuk ma Lewu Zakharia anri ngami tabe ma Elisabet. ⁴¹ Hantek Elisabet karengei tabe teka Maria, genda hang wuang wuntungni bagarak anri Elisabet natampenu Ruh Barasih. ⁴² Udiyeru Elisabet miuwik arai anri lengan mehet," Na berkatleh hanyu teka kawan katuluh wawei, anri naberkatleh genda na malaherannu. ⁴³ Hiyesah aku yiti hampe ineh Tuhanku hawi ma aku? ⁴⁴ Tuu, hantek eau tabe nu hampe ma siluku, genda hawuang wuntungku bagarak daya mihewu. ⁴⁵ Araimihewu leh hanye parisaya inun sa na tahampe Tuhan ma hanye sagar napiganap." ⁴⁶ Balalu bapanerleh Maria," Amirueku nawat Alatalla, ⁴⁷ anri Ruhku arai mihewu hawuang Alatalla, Juru Salamatku. ⁴⁸ Daya, Alatalla haut mamparhitung walah-Ni sa hina yena. Rengeileh, mulai taati anri papalusanni, katuluh ganarasi sagar ngantuh aku arai mihewu. ⁴⁹ Daya Hanye Sa Palingkuasa haut ngulah hal-hal hante ma aku, anri barasihleh ngaran-Ni. ⁵⁰ Karunia-Ni na ami teka jaman ma jaman, ma kawan ulun sa takut anri Hanye. ⁵¹ Hanye haut nutui kuasa-Ni anri tangan-Ni. Hanye ngulah pasah darai kawan ulun sa sakah hawuang akal ateini. ⁵² Hanye ngampinau kawan panguasa teka singasana here, anri ngapamau kawan ulun sa ime atei. ⁵³ Hanye haut namising ulun sa juju anri pikaeh, tapi mugah ulun tatau tulak anri tangan lawang. ⁵⁴ Alatalla haut ngami pangarawahen ma Israel, walah-Ni, daya ngitung karunia-Ni. ⁵⁵ Iyalah sa haut nawara-Ni ma datu hiyang takam, ma Abraham anri katurunanni hampe kalalawahni. ⁵⁶ Anri, Maria muneng baya Elisabet kakira telu wulan lawahni, Balalu hanye mudi ma lewuni. Yohanes Pambaptis Nakayaan ⁵⁷ Taati hampeleh waktuni ma Elisabat malaheran anri hanye ngakayaan erang kaulun genda upu. ⁵⁸ Kawan tatangga anri kaluarga karengei amun Tuhan haut nantarang karunia-Ni sa hante ma Elisabet, anri here uma arai baya hanye. ⁵⁹ Hang anrau sa kawalu, here hawi lepuh nyunat genda yeru. Here hamen ngampingaran genda yeru Zakharia, iyalah ngaran amahni. ⁶⁰ Kude, inehni bapaner,"Puang, hanye sagar ampingaran Yohanes." ⁶¹ Kawan ulun yeru ma harek ma Elisabet,"Mahi naan erang kaulun jua hang penah pulaksanainu sa na ampingaran anri ngaran yeru." ⁶² Udiyeru, here ngami isyarat ma Zakharia lepuh nunti ma hanye, ngaran inun sa hamen na ami ma genda yeru. ⁶³ Zakharia laku erang isa papan tulis, anri manulis iyalah yena: "Ngaranni Yohanes." Anri, katuluh ulun jari heran. ⁶⁴ Sakatika yeru jua, wawa Zakharia pauka anri lelani mulek maeh. Hanye mulai bapaner anri nawat Alatalla. ⁶⁵ katuluh tatangga here jari takut anri kajadian yena ngulah jari paneran ulun hang katuluh desa parbukitan Yudea. ⁶⁶ Anri, katuluh ulun sa karengei neu yena nunti hawuang atei here,"Sagar jari inunkah genda iti yati?" Dagana, tangan Tuhan nyinrah hanye. ⁶⁷ Zakharia, amah Yohanes, pada penu anri Ruh Barasih anri banubuat, eauni, ⁶⁸ "Tawat Alatalla, Alatalla Israel, Dagana Hanye haut hawi anri nyalamat umat-Ni ⁶⁹ Hanye haut ngamuan tanuk kasalamaten ma takam teka katurunan Dawid walah-Ni, ⁷⁰ iyalah sa nampe barita salamat mitah wawa kawan nabi-Ni sa barasih teka jaman sadi hurap ⁷¹ himpan takam na salamat teka kawan musuh takam, anri teka tangan ulun sa muar takam. ⁷² Hanye ngarajani himpan nantarang karunia-Ni ma tatu hiyang takam, anri daya hanye ngitung panan parjanjian-Ni sa barasih, ⁷³ hanyeru sumpah sa Hanye tahampe ma tatu hiyang takam, Abraham, ⁷⁴ amun takam sagar bebas teka tangan kan musuh takam himpan takam kaiyuh nyambah Hanye puang naan katakuten, ⁷⁵ wuang kakudusan anri kabujuren hang hadapan-Ni, sa umur welum takam. ⁷⁶ Anri hanyu, anakku, sagar na antuh nabi Alatalla Sa Pangaamau, dagana hanyu sagar takiya badahulu teka Tuhan, pakai ngampisiap lalan ma Hanye. ⁷⁷ Himpan ngami pangartian neu kasalamaten ma utus-Ni mitah pangampunan panan dusa-dusa here. ⁷⁸ Daya karunia nelang ahi lelu Alatalla takam, sahaya mateanrau sagar nyinar takam teka unengan sa amau ⁷⁹ pakai ngampiraai here sa muneng hawuang iyeng anri sa muneng hawuang amayang pampatei, ngayak pee takam nuju ma lalan damai sajahtera." ⁸⁰ Maka, anak yeru welum sasar hante, anri sasar kuat hawuang ruh. Hanye muneng hang padang balantara hampe wayahni hawi nantarang tenga ma bangsa Israel.