¹ Hang anrau sa katelu, naan pesta paadu hang tumpuk Kana, hang Galilea, ineh Yesus naan hang yaru. ² Yesus baya kawan muridNi pada na herau ma pesta paadu yiru ³ Hantek ranu anggur galis, ineh Yesus kaeyau ma Hanye, "Here kagalisan ranu anggur." ⁴ Yesus kaeyau, "U ineh, inun hubunganni anri Aku? KatikaKu huan hampe." ⁵ Ineh Yesus balalu kaeyau ma kawan walah, "Inunleh sa na huyuNi ma naun, gawi iyalah inun sa na huyuNi." ⁶ Hang yiru, naan enem balanai teka watu, sa lanani na pakai daya ulun Yahudi hang asara penyucian. Asing-asing balanai muat kakira rueh hampe telu buyung. ⁷ Yesus kaeyau ma kawan walah, "Isi katuluh balanai yiru anri ranu." Here balalu ngisi kawan balanai yiru hampe penu anri ranu. ⁸ Udihie, Yesus kaeyau lagi ma here, "Taati, alapleh butit ranu teka balanai yiru balalu ennei ma pamimpin pesta." Here ngenei ranu yiru ma pamimpin pesta. ⁹ Dami pamimpin pesta nginam ranu sa haut jari anggur yiru, kude here puang karasa teka awe asal anggur yiru (ekat kawan walah sa karasa ne'u ranu yiru), balalu pamimpin pesta nerau pangantin upu, ¹⁰ nelang kaeyau ma hanye, "Tiap ulun nyurung ranu anggur sa maeh badahulu dami katuluh haut puas nguut, wau na surung anggur sa puang hampe maeh. Kude, hanyu nyimuh anggur sa maeh hampe taati." ¹¹ Siri ajaib sa pamulaanni yiru na gawi daya Yesus hang tumpuk Kana, Galilea, hampan iwara ne'u kamuliaanNi, nelang hampan kawan muridNi parisaya anri Hanye. ¹² Udihie, Yesus minau ma tumpuk Kapernaum baya inehNi, kawan pulaksanaiNi anri kawan muridNi. Here muneng papire anrau hang yiru. ¹³ Anrau Hante Paskah ulun Yahudi haut riet, Yesus balalu mamai ma tumpuk Yerusalem. ¹⁴ Hang Lewu Alatalla, Hanye nantau kawan ulun ngari kamming, babiri, baya wurung merpati, pada kawan ulun panurup duit maharung hang yiru. ¹⁵ Yesus ngulah cambuk teka tadi balalu nunyu kawan ulun kaluar teka Lewu Alatalla, katuluhni na huyu kaluar amput kawan babiri anri kamming here. Hanye pada ngumpe kawan duit logam teka here panurup duit palus maleng kawan meja here. ¹⁶ Ma kawan pangari wurung merpati, Yesus kaeyau, "Hulu ennei kaluar katuluh teka yina! Ada naun ngulah Lewu Alatalla AmmahKu jari uneng miarian!" ¹⁷ Kawan muridNi kaitung naan na surat : "Sinta ne'u lewuNu, ngampietung Aku." Mazmuer 69:10 ¹⁸ Balalu, kawan ulun Yahudi yiru kaeyau ma Hanye, "Siri ajaib inun sa tau na ulah dayaNu hampe Hanyu tau ngulah kawan hal yina nadap kami?" ¹⁹ Yesus kaeyau ma here, "Ampiruntun Lewu Alatalla yina hang wuang telu anrau Aku ngamuanni kamulek." ²⁰ Here kaeyau, "Epatpuluenem taun katika ngamuan Lewu Alatalla yina, Hanyu kaeyau sagar ngamuanni hang wuang telu anrau?" ²¹ Kude, sa na maksdu daya Yesus ne'u Lewu Alatalla hanye yiru tengaNi raerai. ²² Daya yiru, hantek Yesus amuan teka penah ulun matei, kawan muridNi kaitung ne'u piwaraanNi yiru; balalu here parisaya anri Buku Barasis baya inun sa nawara daya Yesus. ²³ Hantek Yesus hang tumpuk Yerusalem salawah parayaan Paskah, wahai ulun parisaya hang wuang ngaranNi daya nantau kawan siri ajaib sa na gawiNi. ²⁴ Kude, Yesus puang narap tengaNi ma here daya Hanye kataru katuluh ulun, ²⁵ Hanye pada puang perlu hiepun ngami kasaksian ne'u murunsia daya Hanye karasa inun sa naan hang wuang atei murunsia.