¹ "Katuluhni haut na waraKu ma naun, hampan naun puang emmah. ² Here sagar nunyu naun tulak teka sinagoge. Hampe katekani tiap ulun sa munnu naun bapikir amun here haut ngalut inun sa na eyau daya Alatalla. ³ Yiru na karaja here daya here puang kataru anri Aku kalahie pada anri Alatalla Ammah. ⁴ Katuluh hal yina na waraKu ma naun hampan naun kaitung amun katekani haut hampe. Aku puang iwara kawan hal yiru teka pamulaanni daya Aku masih baya naun. ⁵ Taati Aku sagar tulak nunung Hanye sa nunyu Aku, mahi erang kaulunpun teka naun sa nunti anri Aku 'Ma awe Hanyu sagar tulak?' ⁶ Daya Aku haut iwara katuluhni ma naun, naun sagar mahanang atei. ⁷ Aku iwara sa kapinu'uni ma naun : mula labis maeh ma naun amun Aku tulak, daya amun Aku puang tulak Pangarawah yiru puang sagar hawi nunung naun; kude amun Aku tulak, Aku sagar nunyu Hanye nunung naun. ⁸ Dami Pangarawah yiru hawi, Hanye sagar mantaru ma dunia ne'u hal dusa, kapinu'uni, anri penghakiman; ⁹ ne'u hal dusa daya here puang parisaya anri Aku; ¹⁰ ne'u hal kapinu'uni daya Aku sagar tulak nunung Alatalla AmmahKu nelang naun pada puang sagar nantau Aku lagi, ¹¹ ne'u hal penghakiman daya panguasa dunia yena sagar na hakimi. Kairu rama hal sa hamen na waraKu ma naun, kude naun puang kaiyuh nyannangni taati. ¹³ Kude, hantek Hanye, Roh Kapinu'uni yiru hawi, Hanye sa mambimbing naun ma wuang hal kapinu'uni. Hanye puang iwara ahengNi raerai, kude iwara hal sa haut na sanrengeiNi, yiru pada sa na waraNi; Hanye pada iwara kawan hal sa sagar terjadi. ¹⁴ Hanye sagar nawat Aku daya Hanye narime inun sa na tarimeKu, palus iwara hal yiru ma naun. ¹⁵ Katuluh wat Alatalla AmmahKu hanye yiru watKu pada. Daya yiru, Aku iwara amun Roh Kapinu'uni sagar iwara ma naun hal sa haut na tarimeNi teka Aku." HANANG ATEI JARI ARAI ATEI ¹⁶ "Puang lawah lagi naun puang sagar nantau Aku, kalahie pada puang lawah lagi naun sagar nantau Aku." ¹⁷ Papire kaulun murid Yesus ipanunti, "Inun maksudNi Hanye kaeyau ma takam, 'Puang lawah lagi, naun sagar puang nantau Aku; pada kaeyau, puang lawah lagi naun sagar nantau Aku?' daya 'Aku sagar tulak nunung Alatalla AmmahKu'?" ¹⁸ Here nunti "Inun sa na ahengNi anri eyauan 'puang lawah lagi'? Takam puang kataru inun sa na eyauNi. ¹⁹ Yesus karasa amun kawan muridNi hamen nunti hal yiru ma Hanye, jari Hanye kaeyau ma here, "Inun naun ipanunti ne'u hal sa na eyauKu, 'Puang lawah lagi naun puang sagar nantau Aku, pada puang lawah lagi naun sagar nantau AKu?' Anri kapinu'uni Aku iwara ma naun, naun sagar nungkau nelang mahanang atei kude dunia sagar mihewu. Naun mahanang atei kude hanang atei naun sagar baubah jari mihewu. ²¹ Iyalah erang kaulun wawei mihawuntung, hanye kahanangen hampe katekani bagenna; kude dami hanye haut bagenna puang ni kaitung lagi kahanangenni, daya kairu arai mihewuni ne'u genna yiru. ²² Kalahie pada naun nginam kahanangen hang kateka yena, kude Aku sagar hawi nunung naun lagi hampan atei naun arai mihewu, nelang mahi erang kaulunpun sa tau ngalap kaarayen naun yiru. ²³ Hang anrau yiru, naun puang sagar nunti inunpun anri Aku. Anri kapinuuni Aku iwara ma naun, inunleh sa na laku naun ma Alatalla AmahKu hang wuang ngaranKu, sagar na amiNi ma naun. ²⁴ Hampe taati naun puang suah laku inunpun hang wuang ngaranKu. Lakuleh, naun sagar narimeni hampan karaayen naun penu." ²⁵ "Aku haut iwara kawan hal yina ma naun mitah rarapisan; Katikani sagar hampe Aku puang lagi bapaner anri naun makai rarapisan kude bapaner sa kapinuuni neu Alatalla Amah. ²⁶ Hang anrau yiru, naun sagar ilaku hang wuang ngaranKu, kude Aku puang iwara amun Aku lakudoa ma naun nadap Alatalla Amah. ²⁷ Alatalla Amah ngalelu naun daya naun ngalelu Aku nelang parisaya amun Aku yina hawi teka Alatalla Amah. ²⁸ Asal pihawianKu ma dunia yena teka Alatalla Amah, Aku sagar nanan dunia yena muleng ma Alatalla Amah." ²⁹ Kawan muridNi kaeyau, "Taati Hanyu haut bapaner sa kapinuuni puang makai rarapisan lagi. ³⁰ Hanyu karasa neu katuluh hal, kami parisaya tuu amun Hanyu mula hawi teka Alatalla Amah." ³¹ Yesus kaeyau ma here, "Parisaya sah naun taati? ³² Tantauleh! Katikani sagar hampe, nelang pada haut hampe ma naun neu bapisah, asing-asing mulek ma piunenganni, nanan Aku raerai. Kude Aku puang raerai daya Alatalla Amah baya Aku. ³³ Katuluhni na waraKu ma naun hampan hawuang Aku, naun muneng hang damai sejahtera. Hang dunia naun sagar na kahanangen, kude naun harus tatap segah atei! Aku haut ngampitalau dunia!"