¹ Yesus kaeyau, "Aku yina kakau anggur sa kapinu'uni kalahie pada Alatalla AmmahKu sa ngusahani. ² Tiap ra'an sa puang mu'a na umpe, kude tiap ra'an sa mua na barasisNi hampan ra'an yiru magin rama bawu'a. ³ Naun na barasis daya lengan sa haut na tahampe dayaKu. ⁴ Muneng hang wuang Aku kalahie pada Aku muneng hang wuang naun. Sameh iyalah ra'an puang tau mu'a amun hanye puang ireket hang kakau anggur, kalahie pada naun puang mu'a, ekat amun naun muneng hang wuang Aku. ⁵ Aku ina kakau anggur pada naun kawan ra'anni. Tiap ulun sa muneng hang wuang Aku, Aku pada hang wuang naun, wu'a naun sagar wahai kude amun naun puang muneng hang wuang Aku naun puang tau ngaraja inun-inun. ⁶ Amun erang kaulun puang muneng hang wuang AKu, hanye sagar na umpe iyalah ra'an balalu karing; sa na himpun ulun ne'u na tawut ma wuang apui galis na tutung. ⁷ Kude amun naun tatap muneng hang wuang Aku nelang tiap panneranKu muneng hang wuang naun, laku inunleh sa na aheng naun, katuluh jari iyalah sa na aheng. ⁸ Alatalla AmmahKu sagar na tawat daya hal yina, hanye yiru amun rama wuanu, nelang naun yiri kawan muridKu." PARENTAH YESUS NE'U SAMEH PAMALELU ⁹ "Iyalah Alatalla Ammah malelu Aku, kalahie pada Aku malelu naun; ware naun tatap muneng hang wuang leluKu. ¹⁰ Amun naun nu'u ngalut parentahKu, naun sagar tatap muneng hang wuang lelu sintaKu, sameh iyalah Aku nu'u ngalut parentah Alatalla Ammah pada muneng hang wuang lelu sintaNi. ¹¹ Kawan hal yina na waraKu ma naun hampan arai ateiKu naan hang wuang naun, hampan penu arai atei naun. ¹² Ina parentahKu : Naun harus pamalelu, sameh iyalah Aku haut malelu naun. ¹³ Mahi sinta sa labis hante teka sinta erang kaulun sa nyarah amirueni ma kawan hengau rietni. ¹⁴ Naun yiri hanye yiru kawan hengau rietKu amun naun ngaraja inun sa na parentahKu. ¹⁵ Aku puang ngantuh lagi naun walah daya walah puang karasa inun sa na karaja daya ampuni. Kude, Aku nerau naun hengau riet daya inun sa na sanrengeiKu teka Alatalla Ammah, haut waraKu ma naun. ¹⁶ Puang naun sa midi Aku, kude Aku sa midi naun palus nunyu naun tulak ne'u mahasilkan wua, nelang wuanu yiru puang baubah hampan inun sa na laku naun ma Alatalla Ammah hang wuang ngaranKu, Hanye sagar ngamiNi ma naun. ¹⁷ Ina parentahKu : Naun harus pamalelu!" ¹⁸ "Amun dunia muar anri naun, naun haut karasa kapihuan yiru dunia haut muar anri Aku. ¹⁹ Amun naun teka dunia, himat dunia ngalelu naun; kude daya naun puang teka dunia, nelang Aku sa haut midi naun teka dunia yena, yiru sababni dunia muar anri naun. ²⁰ Itung piwaraanKu ma naun : 'Erang kaulun walah puang labis hante teka ampu ni'. Amun here haut haut mepai Aku, here pada sagar mepai naun. Amun here nu'u lenganKu, here pada sagar nu'u lengan naun. ²¹ Kude katuluh yiru sagar na karaja here nadap naun daya ngaranKu. Daya here puang kataru anri Hanye sa haut nunyu Aku. ²² Amun Aku puang hawi nelang iwara katuluh yiru ma here, here sagar tatap muneng hang wuang pikurun. Taati here mahi alasan lagi ne'u pikurun yeru. ²³ Tiap ulun sa muar anri Aku, here pada muar anri Alatalla AmmahKu. ²⁴ Amun Aku puang ngaraja kawan pigawian sa ang suah na gawi daya ulun lain, here puang sagar muneng hang wuang pikurun. Taati here haut nantau, kude here tatap muar anri Aku baya Alatalla AmmahKu. ²⁵ Lengan isa haut na surat hang Kitab Taurat yiru harus na ampi ganap : 'Here muar anri Aku puang baalasan.' ²⁶ Hantek Pangarawah sa teka Alatalla Ammah yiru hawi, sa na huyuKu nunung naun hanye yiru Roh Kapinu'u, Hanye sagar iwara ne'u Aku. ²⁷ Naun pada sagar iwara ne'u Aku daya naun haut baya Aku teka pamulaanni."