¹ "Ang usah naun puang marauh kunu; parisayaleh ma Alatalla Ammah, parisayaleh ma Aku. ² Hang lewu Alatalla AmmahKu wahai unengan muneng; amun puang kalayiru, Aku himat haut iwara ma naun daya Aku tulak lepuh nyadia unengan ma naun, ³ Amun Aku tulak lepuh nyadia unengan ma naun, Aku pada sagar hawi kamulek lepuh ngennei naun hampan hang awe Aku naan, naun pada baya Aku. ⁴ Naun pada karasa lalan ma awe Aku tulak." ⁵ Balalu eyau hi Tomas ma Hanye, "Tuhan, kami puang karasa ma awe Hanyu tulak, kalaawe kami tau karasa lalan nunung Hanyu?" ⁶ Eyau Yesus ma hanye, "Aku ina lalan anri kapinu'uni, pada pamelum. Mahi erang kaulun murunsia sa hawi nadap Alatalla Ammah, amun puang mitah Aku. ⁷ Amun naun haut kataru anri Aku, naun pada himat kataru anri Alatalla AmmahKu; taati, naun sa haut kataru anri Alatalla Ammah pada haut nantau Hanye," ⁸ Hi Filipus kaeyau ma Hanye, "Tuhan, awat nantarang Alatalla Ammah ma kami, daya yiru haut sukup ma kami." ⁹ Eyau Yesus, "Filipus, haut kairu lawah Aku baya naun, kude naun masih puang kataru anri Aku? Hie sa haut nantau Aku, hanye haut pada nantau Alatalla Ammah, kalaawe wangun salenga hanyu kaeyau, 'Tantarang Alatalla Ammah ma kami?' ¹⁰ Inun naun puang parisaya amun Aku hang wuang Alatalla Ammah kalahie pada Alatalla Ammah hang wuang Aku? Kawan piwaraanKu ma naun, Aku puang iwara ne'u diriKu raerai, kude Alatalla Ammah sa muneng hang wuang Aku sa ngaraja pigawianNi. ¹¹ Parisayaleh ma Aku, amun Aku hang wuang Alatalla Ammah kalahie pada Alatalla Ammah hang wuang Aku; atawa paling puang, parisayaleh daya kawan pigawian yiru raerai. ¹² Anri kapinu'uni, Aku iwara ma naun, tiap ulun sa parisaya ma Aku, kawan pigawian sa na karajaKu, hanye pada sagar ngarajani; nelang kawan pigawian sa labis hante teka katuluh yiru daya Aku sagar tulak nuju Alatalla Ammah. ¹³ Inunpun sa na laku naun hang wuang ngaranKu, yiru sagar na karajaKu hampan Alatalla Ammah na ampi hante hang wuang Iya. ¹⁴ Amun naun laku inunpun anri Aku hang wuang ngaranKu, Aku sagar ngarajani. ¹⁵ "Amun naun pamalelu anri Aku, naun sagar nu'u katuluh parentahKu. ¹⁶ Aku sagar laku ma Alatalla Ammah, hampan Hanye ngammi ma naun Pangarawah sa lain,m hampan Hanye baya naun hampe kalalawahni, ¹⁷ hanye yiru Ruh Kapinu'uni, sa puang na tarime dunia, daya dunia puang nantau Hanye atawa puang kataru anri Hanye; kude naun kataru anri Hanye daya Hanye muneng baya naun palus naan hang wuang naun. ¹⁸ Aku puang sagar nanan naun iyalah anule pahatu; Aku sagar hawi ma naun. ¹⁹ Erang pitus lagi, dunia puang nantau Aku, kude naun sagar tatap nantau Aku; daya Aku welum, naun pada sagar welum. ²⁰ Hang anrau yiru, naun sagar karasa amun Aku hang wuang Alatalla AmmahKu, naun hang wuang Aku anri Aku hang wuang naun. ²¹ Hieleh sa negei parentahKu palus ngarajani, hanye ngalelu Aku; ulun sa ngalelu Aku sagar na kalelu daya Alatalla AmmahKu, Aku sagar ngalelu hanye nelang pada nantarang diriKu ma hanye." ²² Hi Yudas, sa lain Iskariot, kaeyau ma Hanye, "Tuhan, kalaawe Hanyu nantarang diriNu ma kami kude puang ma dunia yena?" ²³ Yesus kaeyau ma hanye, "Amun erang kaulun ngalelu Aku, hanye sagar nu'u lenganKu; kalahie pada Alatalla AmmahKu sagar ngalelu hanye, Kami sagar hawi nunung palus muneng baya hanye. ²⁴ Kude, ulun sa puang ngalelu Aku, puang sagar nu'u lenganKu. Lengan sa na rengei naun yiru puang teka Aku, kude teka Alatalla Ammah sa nunyu Aku. ²⁵ Katuluh hal yiru haut na waraku ma naun salawah Aku baya naun. ²⁶ Kude, Pangarawah yiru hanye Ruh Barasis, sa na huyu Alatalla Ammah hang wuang ngaranKu, Hanye sagar ngajar katuluh hal ma naun, palus ngampiitung naun ma katuluh hal sa haut na waraKu ma naun. ²⁷ Damai sejahtera tananKu ma naun; damai sejahteraku amiKu ma naun, puang iyalah sa na ami dunia inun sa na amiKu ma naun. Ada hampe atei naun puang marauh atawa matakut. ²⁸ Naun haut karengei Aku kaeyau ma naun, 'Aku sagar tulak, kude Aku pada sagar hawi kamulek.' Amun naun ngalelu Aku, naun sagar arai mihewu daya Aku tulak nunung Alatalla Ammah, daya Alatalla Ammah labis hante teka Aku. ²⁹ Aku haut iwara ma naun kapihuan hal yiru jari hampan hantek hal yiru jari, naun tau parisaya. ³⁰ Aku puang bapaner wahal hal lagi daya panguasa dunia yena rahat ma yati. Mahi butitpun kuasani nadap Aku. ³¹ Kude hampan dunia karasa aku ngalelu Alatalla Ammah, Aku ngaraja iyalah inun sa na parentahNi ma Aku. Amuan, ware takam tulak."