¹ Sahuan anrau Paskah, Yesus karasa amun katikaNi haut hampe, Hanye sagar nanan dunia yena mulek ma Alatalla Ammah, Hanye sinta ma katuluh murunsia hang dunia yena, Hanye sinta ma here hampe pangalisanni. ² Salawah here kuman malem yiru, setan haut masuk ma atei hi Yudas Iskariot, iya hi Simon ne'u bakhianat anri Yesus. ³ Yesus, hantek karasa Alatalla Ammah haut nyarah katuluhni ma wuang tanganNi, Hanye sa asal mula ni teka Alatalla Ammah, sagar mulek ma Alatalla Ammah, ⁴ Hanye minri teka jamuan kuman malem yiru, napas jubahNi, ngalap tetek kain linen palus nuruk ma pingangNi. ⁵ Udi hie, Hanye mawak ranu ma wuang gadur palus mulai mu'i pe'e kawan muridNi nelang nangkaring pe'e here makai kain sa na huruk hang pingangNi. ⁶ Dami hampe ma hi Simon Petrus, hanye kaeyau ma Yesus, "Tuhan, Hanyu mu'i pe'eku?" ⁷ Eyau Yesus ma hanye, "Inun sa na karajaku taati, naun masih huan paham, die naan katikani naun sagar paham." ⁸ Hi Petrus kaeyau, "Ada hampe Hanyu mu'i pe'eku!" Yesus kaeyau, "Amun Aku puang mu'i pe'enu, hanyu puang sagar kaiyuh bagian hang wuang aku." ⁹ Hi Simon Petrus kaeyau kamulek ma Hanye, "Amun kala yiru Tuhan, ada ekat pe'ekuleh, kude pada tangan baya uluku!" ¹⁰ Yesus kaeyau ma hanye, "Ulun sa haut manrus ekat perlu na wu'i pe'eni ai, daya uras haut barasis. Naun haut barasis, kude puang katuluh naun sa barasis." ¹¹ Daya Yesus karasa hie sa sagar bakhianat nadap Hanye, iru sababni Hanye kaeyau, "Puang katuluh naun barasis." ¹² Dami Yesus luput mu'i pe'e kawan muridNi, Hanye makai kamulek jubahNi, maharung hang piharunganNi, nelang kaeyau ma here, "Naan sah naun kataru inun sa haut na karajaKu nadap naun? ¹³ Naun nereau Aku Guru anri Tuhan. Iru tu'u bujur daya Aku mula Guru anri Tuhan. ¹⁴ Amun Aku, sa Tuhan anri Guru naun, haut mu'i pe'e naun, kalahie pada naun harus ipamu'i pe'e. ¹⁵ Daya Aku haut ngami suntu ma naun hampan naun pada ngaraja iyalah sa haut na karajaKu nadap naun. Anri kapinu'uni, Aku iwara ma naun, erang kaulun walah puang labis tamam teka ampuni, kalahie pada erang kaulun sa na huyu puang labis tamam teka ulun sa nunyu hanye. ¹⁷ Amun naun haut karasa katuluhni, naun na berkati dami naun ngarajani. ¹⁸ Aku puang bapanner ne'u naun katuluh. Aku haut karasa hie sa haut na pidiKu, kude nas ina harus na ampi ganap, 'Ulun sa nguta roteKu haut ngenat tumitni nadap aku'. ¹⁹ Aku iwara ma naun taati, sahuan hal yiru jari hampan katika hal yiru jari, naun sagar parisaya amun Aku ina Hanye. ²⁰ Anri kapinu'uni, Aku iwara ma naun, tiap ulun sa narime ulun sa na huyuKu, hanye narime Aku; kalahie pada ulun sa narime Aku, narime Hanye sa nunyu Aku." ²¹ Udi Yesus kaeyau kalayiru, Hanye puang marauh kunu hang wuang Ruh Barasis balalu kaeyau, "Sa kapinu'uni Aku iwara ma naun, erang kaulun teka naun sagar bakhianat anri Aku." ²² Kawan murid sameh ikulik ma sa lain anri bingung ne'u hie sa na surah dayaNi. ²³ Erang kaulun muridNi maharung mihanri hang dada Yesus. Hanye yiru erang kaulun murid sa tu'u na sayang daya Yesus. ²⁴ Udi hie, hi Simon Petrus ngami siri ma hanye hampan nunti ma Yesus ne'u hie sa na maksud dayaNi. ²⁵ Balalu, murid sa lagi mihanri hang dada Yesus yiru nuni ma Hanye, "Tuhan, hie sah ulun sa na eyauNu yiru?" ²⁶ Yesus kaeyau, "Ulun sa ma hanye Aku ngami tetekan rote sa na sulupKu. " Udi nyulup tetekan rote yiru, Yesus ngamini ma hi Yudas, anak hi Simon Iskariot. ²⁷ Udi hi Yudas narime tetekan rote yiru, iblis marasuk hanye. Daya yiru, Yesus kaeyau ma hanye, "Inun sa hamen na ulahnu, ware na karaja taati!" ²⁸ Mahi erang kaulunpun teka here sa paham inun sa na panner Yesus nadap hi Yudas. ²⁹ Papire teka here mina daya hi Yudas sa negei unengan duit balalu Yesus kaeyau kalayiru ma hanye, "Widi hal" sa perlu ma takam ne'u perayaan," atawa hampan hanye ngammi ma kawan ulun pauwa. ³⁰ Jari, dami narime tetekan rote yiru, hi Yudas palus kaluar malem yiru pada. ³¹ Udi hi Yudas tulak, Yesus kaeyau, "Taati katikani Iya Murunsia na ampihante kalahie pada Alatalla Ammah na ampi hante mitah Hanye. ³² Dami Alatalla na ampihante hang wuang Hanye, Alatalla pada ngampihante Hanye hang wuang diriNi. ³³ Kawan iyaKu, ekat erang pitus lagi Aku muneng baya naun. Naun sagar ngantara Aku, iyalah sa haut na waraKu ma kawan ulun Yahudi, ina Aku iwara pada ma naun, 'Ma awe Aku tulak, naun puang sagar kaiyuh nunung.' ³⁴ Isa parentah wau na amiKu ma naun, hampan naun tatap saling pamalelu, sameh iyalah Aku haut malelu naun, kalayiru pada naun saling pamalelu. ³⁵ Daya hal yiru, katuluh ulun sagar karasa amun naun yiru kawan muridKu, katika naun saling pamalelu." ³⁶ Hi Simon Petrus nunti ma Yesus, "Tuhan, ma awe Hanyu sagar tulak?" Eyau Yesus ma hanye, "Ma awe Aku tulak, hanyu puang kaiyuh umma Aku lagi, kude yati ni hanyu sagar umma Aku." ³⁷ Hi Petrus kamulek nunti pi Hanye, "Tuhan daya inun aku puang tau umma Hanyu taati? Aku sagar nyarah amirueku ma Hanyu!" ³⁸ Eyau Yesus, "Hanyu sagar nyarah amiruenu ma Aku? Anri kapinu'uni Aku iwara ma hanyu, sahuan manu nanru' hanyu haut puang mangakui Aku telu kali."