¹ Naan erang kaulun upu sa rahat mekum, ngaranni hi Lazarus teka tumpuk Betania, tumpuk hi Maria anri pulaksanaini, hi Marta. ² Hi Maria yina erang kaulun wawei sa suah ngilau pee Yesus makai ilau harum balalu muhutni makai wuluni, pulaksanaini hi Lazarus, hantek yiru rahat mekum. ³ Daya yiru, karueh pulaksanai yina ngirim habar ma Hanye, sa kalayina eyauni, "Tuhan, ulun sa na sintanu rahat mekum." ⁴ Dami Yesus nyanrengei habar yiru, Hanye kaeyau, "Mekumni yiru puang sagar ngulah pampatei, kude sagar jari tawat ma Alatalla hampan Iya Alatalla na tawat pada mitah hal yiru." ⁵ Yesus mula tu'u sinta baya hi Marta anri pulaksanaini sa wawei kalahie pada anri hi Lazarus. ⁶ Jari, dami Yesus nyarengei habar hi Lazarus mekum, tihajaNi muneng rueh anrau lagi hang unengan yiru. ⁷ Udihie Yesus kaeyau ma kawan muridNi, "Hayu takam mulek ma tumpuk Yudea." ⁸ Kawan murid kaeyau ma Hanye, "Guru, kawan ulun Yahudi wau yari hamen medak Hanyu makai watu, inun sah Hanyu tatap hamen ma yaru lagi?" ⁹ Yesus kaeyau, "Angneh naan ruehwalas jam hang erang anrau? Amun erang kaulun takia hantek anrau mara'ai, hanye puang pasepak watu daya hanye nantau pira'ai dunia yena. ¹⁰ Kalahie pada erang kaulun sa takia hantek anrau maiyeng, hanye sagar pasepak watu daya pira'ai yiru mahi witu hanye." ¹¹ Dami udi Yesus kaeyau kalayiru, Hanye kaeyau pada ma here, "Hengau takam, hi Lazarus rahat manre, kude aku sagar hawi ne'u ngele' hanye." ¹² Kawan murid kaeyau ma Hanye, "Tuhan, amun hanye rahat manre, hanye sagar ware." ¹³ Sa kapinu'uni Yesus rahat bapanner ne'u pampatei hi Lazarus, kude kawan muridNi min'na Hanye bapanner ne'u sa'anre sa aratini istirahat. ¹⁴ Daya yiru, Yesus balalu iwara sa kapinu'uni ma here, hi Lazarus haut matei, ¹⁵ Aku arai daya ne'u ma naun, Aku mahi hang yaru hampan naun magun parisaya. Jari, ware takam tulak nunung hanye." ¹⁶ Hi Tomas sa na herau Didimus, kaeyau ma kawan murid sa lain, "Ware takam pada tulak hampan takam kaiyuh matei baya Hanye." ¹⁷ Dami Yesus hampe, Hanye nantau hi Lazarus sa haut na pasar epat anrau lawahni. ¹⁸ Tumpuk Betania yiru dime walas stadia lawitni teka tumpuk Yerusalem. ¹⁹ Wahai kawan ulun Yahudi hawi nunung hi Maria baya hi Marta, ne'u mahibur here daya pampatei pulaksanai here yiru. ²⁰ Hantek here nyanrengei Yesus haut hawi, hi Marta tulak ne'u manalu Hanye, kude hi Maria tatap muneng hang lewu. ²¹ Hi Marta kaeyau ma Yesus, "Tuhan, jaka hantek yiru Hanyu naan hang yati, pulaksanaiku puang sagar matei. ²² Kude, aku parisaya inunpun sa na lakuNu teka Alatalla, Alatalla sagar ngamini ma Hanyu." ²³ Yesus kaeyau ma hanye, "Pulaksanainu sagar welum." ²⁴ Marta kaeyau ma Hanye, "Aku karasa amun hanye sagar welum hang akhir zaman die." ²⁵ Yesus kaeyau ma hanye, "Akuleh kebangkitan baya pamelum; hieleh sa parisaya ma Aku, hanye tatap welum biarpun hanye haut matei, ²⁶ kalahie pada tiap ulun sa welum nelang parisaya ma Aku puang sagar matei. Parisaya sah hanyu ne'u hal yina?" ²⁷ Hi Marta kaeyau ma Hanye, "Hiai Tuhan, aku parisaya Hanyuleh Kristus, Iya Alatalla, sa hawi ma dunia." YESUS NUNGKAU ²⁸ Udi kaeyau hal yiru, hi Marta tulak lepuh nerau hi Maria, pulaksanaini, iwara ma hanye, "Guru naan hang yati Hanye nerau hanyu." ²⁹ Nyanrengei hal yiru, hi Maria hinang minri balalu manalu Yesus. ³⁰ Hantek yiru, Yesus huan hampe ma wuang tumpuk, masih hang unengan hi Marta manalu Hanye. ³¹ Kawan ulun Yahudi sa baya hi Maria hang lewu yiru, sa rahat mahibur hanye, nantau hi Maria hinang minri balalu tulak; here pada umma hang wadingni daya min'na hanye hamen tulak ma pasaran lepuh nungkau hang yaru. ³² Hantek hi Maria hampe hang unengan Yesus nganrei, hanye nantau Yesus balalu suruk sam'mah hang pe'eNi, nelang kaeyau "Tuhan, jaka Hanyu naan hang yati hantek yiru, himat pulaksanaiku yena puang sagar matei." ³³ Hantek Yesus nantau hi Maria nungkau kalahie pada kawan ulun Yahudi sa baya hanye, marista pada Yesus hang wuang Ruh Barasis. ³⁴ Balalu Yesus nunti, "Hang awe hi Lazarus na pasar?" Here kaeyau ma Hanye, "Tuhan, umma kami, tantauleh." ³⁵ Yesus balalu nungkau. ³⁶ Balalu, kawan ulun Yahudi kaeyau, "Tantau naun! Tu'u Hanye sinta baya hi Lazarus!" ³⁷ Kude, papire kaulun hang penah here kaeyau, "Puang tau sah Hanye sa haut nyamare ulun pehe yina pada ngulah hampan hi Lazarus puang matei?" ³⁸ Yesus, kamulek marista, hanye tulak ma pasaran. Pasaran yiru erang kawua luwang gua nelang naan watu sa nutup hang hadapan luwang yiru. ³⁹ Yesus kaeyau, "Singkir watu yiru!" Hi Marta, sa pulaksanaini matei yiru kaeyau ma Hanye, "Tuhan, taati himat haut maenguh buruk daya hanye haut mate epat anrau." ⁴⁰ Yesus kaeyau ma hanye, "Angneh Aku haut kaeyau ma hanyu amun hanyu parisaya, hanyu sagar nantau tawat ma Alatalla?" Balalu, here ngenat watu yiru. Yesus lakudoa nelang kaeyau, "Alatalla Ammah, Aku basyukur ma Hanyu daya Hanyu haut nyanrengei Aku. ⁴² Aku karasa amun Hanyu himat nyanrengei AKu, kude daya kawan ulun sa minri hang manriung Aku na, Aku kaeyau hal yina hampan here parisaya amun Hanyu sa nunyu Aku." ⁴³ Udi kaeyau hal yiru, Yesus nantiak anri lengan sa mehet, "Lazarus, ware hanyu kaluar!" ⁴⁴ Ulun sa haut matei yiru kaluar, pe'e tanganni masih pa huruk kain kafan, kalahie pada uruwawani. Yesus kaeyau ma here, "Uka kawan hurukan kain yiru teka hanye hampan hanye tau tulak." ⁴⁵ Kawan ulun Yahudi sa hawi nyuwuk hi Maria, here nantau inun sa na karaja Yesus balalu here parisaya anri Hanye. ⁴⁶ Kude, papire kaulun teka here hawi nunung kawan ulun Farisi balalu iwara inun sa haut na karaja Yesus. ⁴⁷ Kawan imam kapala baya kawan ulun Farisi bakumpul hang pertemuan Sanhedrin nelang kaeyau, "Inun sa harus na karaja daya takam? Ulun yina haut ngaraja wahai siri ajaib. ⁴⁸ Amun takam maladar Hanye kalairu eleh, katuluh ulun sagar parisaya ma Hanye nelang kawan ulun Roma sagar hawi ne'u ngalap anri paksa unengan yena anri bangsa takam," ⁴⁹ Erang kaulun bangaran hi Kayafas, hanye imam hante hang taun yiru, kaeyau ma here, "Naun puang kataru inun-inun, ⁵⁰ sa awe sa na pidi erang kaulun matei ne'u katuluh bangsa, atawa katuluh bangsa rupuh." ⁵¹ Hanye puang iwara hal yiru ne'u tengani raerai, kude ne'u jabatan Imam Besarni taun yiru, hanye kaeyau amun Yesus sagar matei ne'u bangsa yiru. ⁵² Puang ekat ma bangsa Yahudileh, kude pada ne'u ngumpul jari isa kawan iya Alatalla sa pahammur ma yaru ma yati. ⁵³ Teka anrau yiru, here mapakat ne'u munnu Yesus. ⁵⁴ Daya yiru, Yesus puang lagi takia hang penah kawan ulun Yahudi, Hanye tulak teka yiru ma daerah riet padang jumpun haket ma tumpuk bangaran Efraim; balalu Hanye muneng hang yiru baya kawan muridNi. ⁵⁵ Hantek yiru, Paskah ulun Yahudi haut riet, wahai ulun teka daerah yiru tulak ma tumpuk Yerusalem sahuan Paskah ne'u ngampibarasis tenga here. ⁵⁶ Here ngantara Yesus nelang basurah hang wuang Lewu Alatalla here ipanunti sameh here, "Kalaawe manurut naun? Inun Hanye na sagar puang hawi ma perayaan yina?" ⁵⁷ Kawan imam kapala baya kawan ulun Farisi haut ngaluar parentah ma hie sa karasa hang awe Hanye muneng, ulun yiru harus iwara hampan here tau nyamma Hanye.