¹ Bahkan, janji sa uhang pun baisi neu aturan sambahyang pada uneng kudus sa naan hang tane. ² Daya kalayiruleh Kemah Alatalla napersiapkan: intangan luar, pada naan lampu, meja, pada rote sajian, sanaantuh Unengan Kudus. ³ Hang wading tirai karueh adalah bagian kemah sa naantuh Ruang Palingkudus, ⁴ hang uneng yiru naan altar pedupaan sa naulah hingka amas pada Tabut Perjanjian sa katuluh sisini nalapisi andri amas. Hang wuang tabut yiru, naan erangkawua kendi amas sa baisi manna, tungkeh Harun sa suah ba pusuk, baya rueh tipak watu perjanjian. ⁵ Hang amauni naan rueh kerub kemuliaan sa nyalumu Tutup Perdamaian, kude wayah yina puang tepat waktuni manerni secara rinci. ⁶ Udi katuluhni yiru napersiapkan kalayiru wangun, kawan imam masuk ma bagian numur isa hingka kemah yiru secara rutin, nampan ngulah pelayanan sambayang ma Alatalla. ⁷ Kude, ekat imam hante ai sa iuh masuk ma bagian karueh hingka kemah yiru,yiru gin ekat erangtaun hindra, nelang ngenei ira nampan naparapah ma Alatalla ma tengani raerai pada ma kawan dosa umat sa naulah puang singaja. ⁸ Roh Kudus iwara ma takam bahwa lalan nuju Ruang Palingkudus huan tauka amun Ruang Kudus masih naan, ⁹ hal yiru adalah kiasan neu zaman yina. Kalayiru pada bamasam pangamian pada kawan kurban sa naparapah puang kaiyuh menyempurnakan atei akal kawan ulun sa sambayang, ¹⁰ daya ekat bahubungan andri panguta, uuten, pada ritual piwuian ma tenga daging sa balaku hampe hawini waktu pembaharuan. Sambahyang hangwuang Janji sa Wau ¹¹ Kude, dami Kristus hawi jari Imam Hante hang amau kawan hal maeh sa sagar hawi, Hanye masuk mitah Uneng Kudus sa labih hante pada labih sampurna; sa puang na ulah daya tangan murunsia pada puang banda sanaulah. ¹² Hanye masuk ma Ruang Palingkudus hindra ma kalalawahni, puang andri ngenei ira kaming upu pada ira anak sapi, kude andri ngenei ira-Ni raerai jari kaiuh panewuhan sa kekal. ¹³ Sabab, amun tampitikan ira kaming upu pada sapi upu, pada habu anak sapi wawei ma ulun sa najis tau ngabarasis tenga jasmani here, ¹⁴ labih-labih lagi ira Kristus, hanyeyiru Hanye sa mitah Roh sa kekal mempersembahkan tenga-Ni jari parapah sa puang bacacat ma Alatalla pakai ngabarasis atei nurani naun hingka ulahan puang bariran nampan naun kaiuh melayani Alatalla sa welum. ¹⁵ Ma alasan yina Kristus jari Penghubung hingka janji sa wau nampan here sa haut naherau Alatalla iuh narime warisan kekal sa haut najanjikan-Ni; sabab hindra pampatei haut terjadi nampam newuh here hingka kawan pelanggaran sa naulah daya here hang ime perjanjian sa kaisa. ¹⁶ Amun naan surat wasiat, maka harus naan samatei hingka ulun sa ngulahni. ¹⁷ Sabab, surat wasial bariran amun ulun sangulahni haut matei; surat yiru puang uweng kuasa amun ulun sangulahni masih welum. ¹⁸ Iruleh sababni, inun ngulah perjanjian numur isa puang berlaku amun puanguweng kurban ira. ¹⁹ Sabab, udi hi Musa iwara kawan parintah hangwuang Hukum Taurat ma umat Israel, hanye ngalap ira anak sapi andri kaming balalu nyampurni andri ranu. Balalu, makai kain wol mariang baya erangkakau hisop, hanye nampitikni ma Kitab Taurat pada ma katuluh umat ²⁰ nelang kaeau,''Inalah ira hingka perjanjian sa haut Alatalla parintahkan ma naun alutlah.'' ²¹ Andri sara sa sameh, Musa pada nampitik Kemah Suci pada katuluh perlengkapan sa napakai hangwuang sambahyang andri ira. ²² Manurut Hukum Taurat, bilang katuluhni harus nasucikan andri ira, amun puang uweng tunrak ira, puang sagar naan pengampunan. Yesus Kristus adalah Parapah Pamuhut Dosa ²³ Daya yiru, katuluh sa melambangkan kawan hal surgawi tuu perlu nabarasis andri hal yina, kede katuluh sa hang surga nabarasis andri kurban sa labih maeh. ²⁴ Sabab, Kristus puang masuk ma wuang Ruang Palingkudus sa na ulah daya tangan murunsia, sa ekat ngalut hingka sa bujurni, kude Hanye masuk ma wuang surga yiru raerai pada itati naan hang hadapan Alatalla demi takam. ²⁵ Kristus pada puang mempersembahkan tenga-Ni bakali-kali, ialah imam hante sa harus masuk ma Ruang Palingkudus hingka taun ma taun andri ngenei ira sa puang irani raerai. ²⁶ Amun kalayiru, Kristus harus Manderita baulang kali hingka dunia naulah. Kude, Kristus ekat nyarah tenga-Ni hindra ai ma kalalawahni hang zaman akhir yina pakai muhut dosa, andri sara mempersembahkan tenga-Ni raerai ²⁷ Ialah murunsia, sanatentukan nampan matei hindra ai balalu udiyiru mahadap penghakiman, ²⁸ kalayiru pada Kristus; Hanye napersembahkan ekat hindra ai pakai nangung dosa ulun hene, pada sagar hawi ma karueh kalini, puang nampan nangung dosa, kude nampan ngenei kasalamatan ma here sa ngandrei Hanye.