¹ Iman adalah jaminan hang amau katuluh sa naharapkan takam, pada bukti hingka katuluh sa puang uweng kadinung. ² Sabab, daya iman here kawan ulun hang zaman dahulu kaiuh tawat. ³ Daya iman, takam kataru bahwa dunia naulah andri firman Alatalla. Jari, inun sa kadinung puang naulah daya sa kadinung pada. ⁴ Daya iman, Habel ngami ma Alatalla parapah sa labih maeh hingka sa naami daya Kain. Mitah pangamianni yiru, Habel kaiuh kesaksian samaeh tika Alatalla jari ulun sa maeh; Alatalla ngami kesaksian yiru andri narime parapah pangamianni,biarpun hanye matei, Habel masih kaiuh bapaner. ⁵ Daya iman, Henokh naangkat nampan hanye puang harus kainam pampatei pada hanye puang haba daya Tuhan haut ngangkat hanye; daya sa huan naangkat, hanye kaiuh kesaksian jari ulun sa ngampisanang Alatalla. ⁶ Puang mungkin ngampisanang Alatalla amun puang uweng iman, sabab hie pun sa nyanriet Alatalla harus parisaya bahwa Alatalla naan, pada bahwa Alatalla ngami upa ma here sa ngantara Hanye. ⁷ Daya iman, udi naampiitung daya Alatalla neu kajadian sa huan hanye kadinung, Nuh andri taat ngulah isa kapal hante pakai nyalamat keluargani. Andri yina, Nuh nukum dunia balalu jari pewaris sa wuah sesuai andri imanni. ⁸ Daya iman, Abraham dami naherau Tuhan, taat nampan tulak ma isa unengan sa sagar naami jari ampun pusakani. Pada hanye tulak, biarpun puangkarasa maawe hanye sagar tulak. ⁹ Daya iman, hanye tulak balalu muneng hang tane sa najanjikan hanyeyiru muneng hang tane asing, hanyeyiru hang wuang kemah sasameh andri Ishak pada Yakub; kawan pewaris hingka janji sa sameh, ¹⁰ sabab Abraham ganyah ngandrei isa kota sa naan fondasi, sa perensana andri ngamuanni hanyeyiru Alatalla. ¹¹ Daya iman,Sara narime kemampuan nampan mihauwuntung balalu ba anak, biar hanye tamanang nelang haut kajut matueh nampan bagena, daya Sara menganggap Hanye sa haut bajanji mahanye memang setia. ¹² Daya yiru, hingka erangkaulun sa haut matueh tuu pada haut kai matei, lahirlah katurunan sa heneni ialah wuwuhiang hang langit pada sa jumalahni puang iuh reken ialah wusi pasir hang pantai. ¹³ Here katuluh yina haut matei hangwuang iman andri puang kaiuh inun sa najanjikan, kude here ngini pada nyamut kawan janji yiru hingka lawit, andri karasa bahwa here memang kawan pendatang pada ulun asing hang tane. ¹⁴ Papaneran here sa kalayiru nutui andri jelas memang here gayah ngantara isa tane ranu ma here. ¹⁵ Daya, amun sa napikir daya here negeri sa na uneng here sa huanni, maka here tau ai mulek ma yaru. ¹⁶ Kude, here hamen isa negeri sa labih maeh, hanyeyiru negeri surgawi. Daya sabab yiru, Alatalla puang amangan naantuh jari Alatalla here sabab Hanye haut nyadiakan isa kota ma here. ¹⁷ Daya iman, dami Tuhan nguji hanye, Abraham nyarah Ishak jari parapah; hanye sa haut narime kawan janji yiru rela mempersembahkan anak tungkanni. ¹⁸ Neu anak yiru, Alatalla suah kaeau, ''Andri ngaran Ishaklah keturunannu sagar naantuh.'' ¹⁹ Abraham nganak parisayani ma Alatalla, bahkan hanye parisaya bahwa Alatalla sangup ngamuan ulun matei. Istilahni, Abraham haut kaiuh Ishak mulek hingka pampatei ²⁰ Daya iman, Ishak mamberkati hi Yakub andri hi Esau. ²¹ Daya iman, Yakub, dami hanye kai matei memberkati kawan anak Yusuf. Hanye nyamah ma Alatalla andri isandar ma ulu tungkehni. ²² Daya iman, Yusuf, hang akhir welumni, bapaner neu kaluarni bangsa Israel hingka Mesir balalu ngami parintah bahubungan andri taulang-taulangni. ²³ Daya iman, Musa, dami hanye nakayaan, nasadina salawah telu wulan daya ulun matuehni. Here kadinung bahwa hi musa memang hua sa tuu segah, pada here puang takut nadap parintah raja. ²⁴ Daya iman, Musa, dami hanye tumu mamai bujang, puang hakun naantuh anak hingka putri Firaun. ²⁵ Hanye labih midi menderita sasameh andri umat Alatalla hingka ngingkam kasanangen dosa sa ekat erangitus, ²⁶ Hanye menganggap bahwa kehinaan Kristus labih baharga hingka katuluh kakayaan Mesir sabab Musa ngini ma pahala sa sagar natarime. ²⁷ Daya iman, Musa nanan Mesir puang kainam takut nadap panyangit Raja Firaun ialahni hanye tau kadinung Hanye sa puang dinung yiru. ²⁸ Daya iman, Musa ngulah Paskah pada nampitik ira hampe malekat pampatei puang wuah bangsa Israel. ²⁹ Daya iman, bangsa Israel takia nyabarang Laut Mariang, ialah takia hang tane karing. Kude, dami kawan ulun Mesir mansuba ngulah hal sa sameh, here nasaneteng. ³⁰ Daya iman, timuk Yerikho runtun udi nakaliling salawah pitu andrau. ³¹ Daya iman, Rahab, wawei nakal yiru, puang nawunu sindrah andri kawan ulun sa puang taat daya hanye narime mata-mata Israel andri damai. ³² Pada, inun lagi sa harus naeauku? Aku puang sukup waktu nampan basarita mahanyu neu Gideon, Barak, Simson Yefta, Daud, Samuel, pada kawan nabi, ³³ sa daya iman haut menguasai kawan karajaan, ngulah kawan inun sawuah, kaiuh kawan janji, pada nutup mulut kawan singa, ³⁴ nampare lelap apui, talapas hingka rare taruh, nakuatkan hingka kalemeen here, kuat tatuu hangwuang babur, pada ngusir kawan tantara asing. ³⁵ Kawan wawei narime kamulek kawan ulun matei here mitah kebangkitan, kude naan pada sanaaniaya pada puang hakun narime pembebasan nampan here kaiuh kebangkitan hawuang pamelum sa labih maeh. ³⁶ Sementara yiru, naan pada sa nahina nelang na weweh, bahwan na huruk balalu napenjara. ³⁷ Here natetek, nagaragaji jari rueh, pada nawunu andri taruh. Naan pada sa mengembara andri makai baju hingka kudit domba atau kudit kaming; here tuu paua, natindas pada naulah babahum here. ³⁸ Dunia yina puang pantas ma here, here mengembara hang padang gurun pada hang gunung-gunung, muneng hang helang-helang watu, hang gua-gua hang ime tane. ³⁹ Biarpun kaiuh kesaksian sa maeh daya iman here naan, here puang narime inun sa najanjikan. ⁴⁰ Sabab, Alatalla nyadia kawan sa labih maeh ma takam, amun puang uweng takam, here puang sagar jari sempurna.