Panalu hang Yerusalem ¹ yiru, papire kaulun minau teka Yudea balalu ngajar kawan pulaksanai sa parisaya, "Amun naun puang na sunat sasuai andri adat istiadat Moses, naun puang tau nasalamatkan." ² Balalu, dami naan salisih aheng andri puang mira pakat antara hi Paulus andri hi Barnabas andri kawan ulun yiru, here manantu nampe hi Paulus andri hi Barnabas, baya papire kaulun sa lain ni teka here, harus mamai ma Yerusalem nampe panalu andri kawan rasul nelang andri kawan tueh ungkup neo hal yiru. ³ Balalu, udi na atet hang lalan daya kawan ungkup, here mitah Fenisia andri Samaria nelang nyarita andri tu'u hal batubat kawan bangsa sa lain, hal yiru ngenei kaarayen atei sa hante ma katuluh pulaksanai sa parisaya. ⁴ Dami here hampe hang Yerusalem, here na tarime da kawan ungkup, kawan rasul, andri kawan tueh ungkup, balalu here nyarita katantuluh sa haut naulah daya Alatalla mitah here. ⁵ Kude, papire kaulun teka golongan Farisi sa haut parisaya mindri nelang kaeau, "Penting manyunat here andri nuyu here na mamatuhi Hukum Moses!" ⁶ Kawan rasul andri tueh ungkup panalu sasameh nampan bapaner hal yiti. ⁷ Udi lawah here bagurayang hang yaru, hi Petrus mindri balalu kaeau ma here, "Kawan pulaksanai katuluh, naun karasa amun zaman sadi Alatalla haut ngulah pidian hang penah naun mitah wawaku, kawan bangsa lain sagar karengei Kabar Maeh palus jari parisaya. ⁸ Nelang, Alatalla, sa kataru atei murunsia, haut basaksi ma here andri ngami Roh Barasis ma here, sameh ialah sa haut na karaja-Ni ma takam, ⁹ andri Hanye puang ngabalain takam andri here, udi Hanye ngabarasis atei here sa parisaya. ¹⁰ Jari taati, dainun hanyu nawan Alatalla andri nganak kuk sa maweat hang diung kawan ungkup, padahal datu nini takam andri takam raerai sika puang suah kaule mananggungni? ¹¹ Kude, takam parisaya daya takam naselamatkan mitah ahi lelu Tuhan Yesus, kala yiru pada here." ¹² Udi yiru, katuluh kawan ulun yiru suni balalu here nyandrengei hi Barnabas andri hi Paulus, padingian karueh rasul yiru nyarita katuluh siri andri kaajaiban sa haut na karaja daya Alatalla mitah here hang penah kawan bangsa lain. ¹³ Udi here taduh bapaner, hi Yakobus kaeau, " Pulaksanai katuluh, sanrengei aku. ¹⁴ Hi Simon udi nantarang kaawe Alatalla teka awal haut ninung kawan bangsa lain, nampe ngalap teka penah bangsa yiru isa umat neo ngaran-Ni ¹⁵ Paneran kawan nabi manyatujui hal yiru, sameh sa natulis, ¹⁶ 'Udi yiti, Aku sagar mulek. balalu sagar ngamuan kamulek Kemah Daud sa haut runtun. Aku sagar ngamuan kamulek kawan piruntunanni balalu Aku sagar ngampi kaeh ni, ¹⁷ nampe kawan murunsia sa balee kaiyuh ngantara Tuhan, andri katuluh bangsa lain sa na heraw mitah ngaran-Ku, sa ngaraja katuluh ni,' Lengan Alatalla, sa ngaraka katantuluhni, ¹⁸ haut na rasa hingka jaman sadi. ¹⁹ Jari, manurut ku takam saharusni puang ngampi hadin kawan ulun teka bangsa lain sa haut mulek ma Alatalla. ²⁰ Kude, takam harus manulis ma here nampe here nyanawit tenga daging teka kawan hal sa puang maeh teka kawan barhala, andri teka kawan dusa sa cabul, andri teka inun sa haut na keat, andri teka ira. ²¹ Daya, teka jaman sadi hi Moses haut ngarasa, hang tiap tumpuk, kawan ulun sa nyaritani daya na basa hang uneng sambayang tiap andrau ahad." Surat ma kawan ulun parisaya sa puang Yahudi ²² Balalu, na dinung maeh daya kawan rasul, andri tueh ungkup, andri katuluh ungkup, here midi kawan ulun teka penah here nampe nautus ma Antiokhia baya Paulus andi Barnabas. Here ngutus hi Yudas, andri hi Silas, kawan pamimpin teka penah pulkasanai sa parisaya, ²³ nelang here raerai s manulis surat, eau ni kaina: "Teka Kawan rasul andri tueh ungkup, katuluh pulaksanai sa parisaya, ma katuluh pulaksanai sa parisaya puang Yahudi hang Antiokhia, andri Siria, andri Kilika, tabe! ²⁴ Daya kami haut karengei papire kaulun teka penah kami, sa ma here kami mahi ngami mandat, haut nganggu naun andri ajaran here sa tau ngampi leme amirue naun, ²⁵ hal yiti dinung kami maeh ma naun, jari kami ipakat, midi kawan ulun andri ngutus here na sindrah naun kawan pulaksanai sa na ahi Lelu d kami, hi Barnabas andri hi Paulus, ²⁶ sa haut nyarah pamelum here neo ngaran Tuhan takam, Kristus Yesus. ²⁷ Daya hal yiru, kami ngutus hi Yudas andri hi Silas, here raerai sagar nampe palus bapaner kawan hal sa sameh. ²⁸ Daya, tu'u samaeh ma Roh Barasis andri ma kami nampe nyarah kawan weat teka amau naun sa puang labih maweat teka sa na perlu yina, ²⁹ nampe naun ngampi lawit tenga daging teka sa haut sa sarah ma barhala, andri teka ira, andri teka inun sa matei na keat, andri teka kawan dusa sa cabul. Amun naun tau nyaga tenga naun raerai teka hal yiru, naun haut nampalus sa maeh. Hampe panalu!" ³⁰ Udi here parumisi, here minau ma Antiokhia, balalu udi here ngumpul kawan ungkup, here nampe surat yiru. ³¹ Dami kawan ulun sa parisaya mambasani, here miarai daya rariu. ³² Hi Yudas andri hi Silas, here raerai pada nabi, ngampi samangat andri ngampi kuat kawan pulaksanai sa parisaya mitah hene papaneran. ³³ Balalu, udi here muneng hang yaru papire lawah, kawan ulun sa parisaya ngirim here mulek andri marauh atei ma kawan ulun sa haut ngutus here. ³⁴ [Kude, naanggap maeh ma hi Silas amun hanye tatap muneng hang yaru] ³⁵ Kude, hi Paulus andri hi Barnabas muneng hang Antiokhia, nelang ngajar palus nampe lengan Tuhan baya andri kawan ulun rama. Paulus andri Barnabas bapisah ³⁶ Udi papire andrau, hi Paulus kaeau ma hi Barnabas, "Hayu tareh mulek palus ganta kawan pulaksanai sa parisaya hang tiap tumpuk, uneng tareh nampe lengan Tuhan palus ninung kaawe wangun keadaan here." ³⁷ Hi Barnabas hamen ngenei pada hi Yohanes sa na heraw Markus. ³⁸ Kude, hi Paulus kaingkam amun puang perlu ngenei ulun sa haut nanan here hang Pamfilia balalu puang tulak sindrah here hang gawian yiru. ³⁹ Balalu, here basualan hampe here bapisah isa andri sa lain. Hi Barnabas ngenei hi Markus balalu balayar ma wilayah Siprus, ⁴⁰ kude hi Paulus midi hi Silas balalu tulak, udi na sarah kawan pulaksanai sa parisaya hang wuang ahi lelu Tuhan. ⁴¹ Balalu, hanye mitah Siria andri Kilika nelang ngampi kuat kawan ungkup.