¹ Balalu ba kajadian, hang Ikonium, hi Paulus andri hi Barnabas sindrah mamai ma sinagoge ulun Yahudi palus bapaner rama hang yaru, hampe rama ulun Yahudi andri ulun sa puang Yahudi, jari parisaya. ² Kude, kawan ulun Yahudi sa puang parisaya mahasut ulun sa puang Yahudi balalu ngampi rasun utek here nawan kawan ulun sa parisaya. ³ Daya yiru, here lawah muneng hang yaru nelang andri heei here bapaner neu Tuhan, sa ngami kasaksian kabar maeh-Ni, nelang ngami siri-siri ajaib andri mukjizat-mukjizat mitah tangan here. ⁴ Kude, kawan ulun hang tumpuk yiru pasai darai, pulak ni uma ma kawan ulun Yahudi andri pulak ni ma kawan rasul. ⁵ Dami isa usaha na pakat, daya kawan ulun Yahudi andri kawan ulun puang Yahudi, andri kawan pamimpin here, nampan manyiksa nelang medak kawan rasul andri watu, ⁶ udi hi Paulus andri hi Barnabas karasa hal yaru balalu here ba singkir ma Listra andri Derbe, tumpuk-tiumpuk hang Likaonia, andri ma daerah sakitarni. ⁷ Balalu, hang yaru, here palus nampe Kabar Maeh. ⁸ Hang Listra, naan erang kaulun ganyah maharung da pee ni meleme, lumpuh teka nakayaan ineh ni andri puang suah takia. ⁹ Ulun yiru nyandrengei hi Paulus bapaner, udi hi Paulus kadinung ulun iru parisaya nampe na samare, 10 Hi Paulus bapaner andri lengan mehet, "Mindri wawitu andri pee nu." Udi hie, ulun iru nanturak palus mulai takia. ¹¹ Dami kawan ulun rama kadinung inun sa na ulah daya Paulus, here bapaner hang bahasa Likaonia, "Kawan Dewa haut minau ma penah-penah takam palus jari kalawangun tenga murunsia!" ¹² Kawan ulun yiru ngampi ngaran hi Barnabas ru hi Zeus andri hi Paulus ru hi Hermes daya hanye sa pakai paner. ¹³ Imam Dewa Zeus, sa kuilni naan hang luar tumpuk, ngenei kawan sapi upu andri kawan wunge ma pintu gerbang tumpuk. Hanye andri ulun rama hamen nyarah parapah ma hi Paulus andri hi Barnabas. ¹⁴ Kude, dami rasul Barnabas andri rasul Paulus karengei yiru, here ngirah pama here nelang nempat ma penah-penah ulun sa rama yiru, andri lengan mehet, ¹⁵ balalu kaeau, "Pulaksanai katuluh, dainun naun ngulah katuluh yina? Kami na sameh pada murunsia kala naun andri ngenei kabar maeh ma naun nampe naun nanan kawan hal sa puang bariran yiti nuju ma Alatalla sa welum, sa haut ngulah langit, andri bumi, andri laut, andri katuluh inun sa naan hang wuangni. ¹⁶ Hang wayah sa haut paitah, Hanye maladar katuluh bangsa takia manurut lalan-lalan here raerai. ¹⁷ Kude, Hanye puang maladar diri-Ni pauweng bukti. Daya, Haye ngaraja sa maeh andri ngami ma naun uran teka langit andri kawan musim wua sa nampuas atei naun andri kutaen nelang kasanangan atei. ¹⁸ Kude andri katuluh lengan yiru, here magun mahadin nahalang ulun rama yiru nampe puang ngami parapah kurban ma here. ¹⁹ Kude, papire ulun Yahudi hawi teka Antiokhia andri Ikonium, balalu udi here nantiring ulun rama yiru, here medak hi Pulus makai watu balalu mait hanye maluar tumpuk daya kira here hi Paulus haut matei. ²⁰ Kude, dami kawan murid ngaliling hi Paulus, hanye amuan mindri dan mulek masuk ma wuang tumpuk. Kaayat ketuni ni hanye tulak andri hi Barnabas ma Derbe. Mulek ma tumpuk Antiokhia hang Wilayah Siria. ²¹ Udi here nampe Kabar Maeh hang tumpuk yiru balalu udi ngulah hene ulun parisaya, here mulek ma Listra, andri ma Ikonium, andri ma Antiokhia, ²² nelang ngampi kuat atei kawan ulun parisaya, ngampi samangat nampe here tatap hang wuang iman, balalu kaeau amun takam na haut masuk hang wuang Karajaan Alatalla mitah hene kahanangen. ²³ Dami hi Paulus andri hi Barnabas midi kawan tueh ungkup ma here hang tiap jemaat, udi ba doa nelang miaret, here nyarah kawan tueh ungkup yiru ma Alatalla, daya ekat ma Hanye here haut parisaya. ²⁴ Udi yiru, here mitah Pisidia balalu hampe hang Pamfilia. ²⁵ Balalu, udi here haut ngabar lengan Alatalla hang Perga, here minau ma Atalia. ²⁶ Hingka yaru, here balayar ma Antiokhia, uneng here nasarah ma ahi lelu Alatalla neo kia karaja ulah ngawi sa haut luput da here. ²⁷ Dami here hampe palus bakumpul sasameh andri kawan ungkup, here iwara katantuluh hal inun sa haut naulah daya Alatalla mitah here. ²⁸ Balalu, here lawah muneng baya kawan ungkup sa parisaya.