PETRUS MULEK MA YERUSALEM ¹ Hang helang yiru, kawan rasul anri kawan ulun sa parisaya hang Yudea karengei bahwa kawan ulun sa puang Yahudi pada haut narime lengan Alatalla. ² Daya yiru, hantek hi Petrus tulak ma Yerusalem, kawan ulun basunat puang susuk panner anri hanye, ³ nelang kaeyau, "Hanyu tulak baya kawan ulun puang basunat nelang kuman baya here." ⁴ Daya yiru, hi Petrus manarang secara baurutan ma here katuluh nelang kaeyau, ⁵ " Aku rahat badoa hang Yope, nelang hang wuang keadaan puang sadar, aku nantau isa paninungan, iyalah erang kalammar kain hante naampinau, sa paului anri kaepat pusingni teka langit, nelang banna iru nyanriet aku. ⁶ Hantek aku ninungi, Aku nyampining nelang kadinung kawan satua bapee epat hang ammau tane, kawan satua liar, kawan satua ilansar, anri kawan wurung samiding. ⁷ Balalu aku karengei naan lengan sa kaeau ma aku, ' Hayu Ammuan, Petrus, Samalis kawan satua palus na kuta !. ⁸ Kude aku nuing, Puang Alatalla! huan suah aku nguta kawan kutaen sa haram nelang padi palus ma wawa ⁹ Kude lengan yiru kaeau lagi teka langit, ' Barang sa haut naeau daya Alatalla halal ada naantuh haram! ¹⁰ Aku kadinung hal yiru hampe telu kali balalu akhirni katuluhni paenat mulek ma surga. ¹¹ Hang tawuk yiru pada telu kaulun teka Kaisarea, sa nautus nunung aku, hampe hang lewu unenganku amalem. ¹² Balalu ruh Alatalla nunyu aku tulak sinrah baya here anri puang ragu-ragu. Kaenem pulaksanai yiru pada umma baya aku, nelang kami katuluh masuk mawuang lewu . ¹³ Udi yiru hanye nyarita ma kami wanguni hanye kadinung erang kaulun malekat minri hang lewu ni nelang kaeau , ' Huyu ulun ma Yope nerau erang ka ulun upu bangaran hi Simon Petrus hawi ma ina. ¹⁴ Hanye sagar nampe ma naun nyalamat hanyu anri katuluh ulun sa muneng hang lewunu. ¹⁵ Nelang tawuk aku mulai bapaner kalayiru, Ruh barasis hawi ma ammau here, sameh kala sa jari ma takam hang awalni tawuk hie. ¹⁶ Balalu aku kaitung, Alatalla kaeau, 'Hi Yohanes mambaptis makai ranu, kude naun sagar nabaptis makai Ruh Alatalla. ¹⁷ Jari, amun Alatalla ngami karunia sasameh ma here kala pangamian sa kala naammini ma takam hang tawuk takam parisaya ma Alatalla Yesus Kristus, Daya yiru , puang tau pada aku nguring Alatalla ! ¹⁸ Udi karengei yiru, here puang mambantah lagi. Balalu here nawat Alatalla , here kaeau" Amun kala yiru, kawan ulun sa puang Yahudi pada naammi kasampatan daya Alatalla nampan batubat teka kawan dosa here nelang ka ingkam welum sajati. ¹⁹ Dami udi, ulun-ulun tapisah,daya na aniaya sa tarjadi anri hi Stefanus hampe ma Fenisia, Siprus anri Antiokhia, Here iwara kabar teka Alatalla ekat ma kawan ulun Yahudi. ²⁰ Kude teka here sa parisaya yiru, naan sa baasal teka Siprus anri Kirene, naan pada kawan ulun sa tulak ma Antiokhia nelang iwara ma ulun-ulun Helenis, kabar maeh neu Yesus yiru ma kawan ulun sa puang baagama Yahudi. ²¹ Kuasa Alatalla naan hang here hampe rama ulun balalu parisaya nelang nyarah tenga ma Alatalla. ²² Sarita neu kawan kajadian yiru hampe pada ma ungkup hang Yerusalem . Daya yiru balalu ngutus Hi Barnabas ma Antiokhia. ²³ Nelang tawuk yiru Hi Barnabas hampe yaru, balalu kadinung kaawe wangun Alatalla mambarkati kawan ulun yiru, hanye tuu arai. Balalu hanye ilaku nampan here tuu-tuu satia ma Alatalla anri sagalis atei. ²⁴ Sabab hi Barnabas yiti ulun sa maeh atei nelang nakuasa daya Ruh Alatalla nelang tuu parisaya ma Alatalla hampe rama ulun parisaya ma Alatalla. ²⁵ Kamulek hi Barnabas , tulak ma Tarsus ngantara hi Saulus. ²⁶ Udi panalu hi Saulus, hanye ngising hi Saulus ma Antiokhia pas erang taun lawahni here bakumpul baya ungkup hang yaru nelang ngajar rama ulun, Hang Antiokhia yiru kawan sa parisaya ma Yesus Kristus palanungkai kala iti naantuh kawan ulun Kristen. ²⁷ Tawuk yiru naan papire nabi hawi teka Yerusalem ma Antiokhia. ²⁸ Teka here yiru naan sa bangaran hi Agabus, daya kabahumen Ruh Alatalla hanye nuju hang litar dunia , nelang hang tawuk Kaisar Klaudius marentah. ²⁹ Balalu katuluh kawan ulun sa umma Yesus yiru mira pakat neu ngirim bantuan ma kawan pulaksanai here sa muneng hang Yudea, tiap tenga ngami kamampuanni ³⁰ Pipakatan yiru natampalus, ngirim bantuani ma matuhe ungkup metah tangan hi Barnabas anri hi Saulus.