Yesus Naenat ma Surga andri Janji Hawi ni Roh Barasis ¹ Hang huang suratku sa huan ni, Teofilus, hal sa katuluh mulai naulah andri naajar Yesus, ² hampe ma andrau hanye naenat, udik Hanye ngami perintah, mitah Roh Barasis, ma rasul-rasul sa haut napidi Ni. ³ Ma here Hanye nantarang tengak-Ni bahwa Hanye welum sa udik Hanye rara, andri rama bukti, palus nantarang tengak Ni salawah epat pulu andrau nelang bapaner soal karajaan Alla ta Alla. ⁴ Rahat baya here, Hanye nguring here tulak hingka Yerusalem, kude ngandrei janji Amah, sa eau-Ni. "Hanyu karengei teka Aku, ⁵ daya Yohanes napandrus andri ranu, kude hanyu die napandrus andri Roh Barasis, puang lawah teka taati." Yesus Tapaenat ma Surga ⁶ Maka yiru, hantek here bakumpul, here nunti ma Hanye, "Tuhan, inunkah iti wayahni hanyu nangkaeh karajaan Israel?" ⁷ Hanye iwara ma here, "Puang haknu mangarasa hantek awe wayahni sa haut na tukas daya Amah hang huang kuasa-Ni. ⁸ Kude yiru, die hanyu sagar narime kuasa amun Roh Barasis hawik ma hanyu, balalu hanyu sagar jari saksi-Ku hang Yerusalem, Yudea andri Samaria, hampe iring dunia." ⁹ Udik Hanye iwara kalayiru, hang helang here rahat ninung Ni, Hanye tapaenat balalu awan ngenei Hanye wawai hingka paninungan here. ¹⁰ balalu hantek here ninung ma langit, rahat Hanye tulak, dinung, naan rueh kaulun upu makai pama mahilak mindri tuhi here, ¹¹ balalu kaeau,"Eh naun ulun Galilea, daya inun ulah naun nantau ma langit? Yesus yena, sa haut paenat ma surga sagar molek lagi iyalah naun haut kadinung hanye mamai ma surga." ¹² Udi yeru, here molek ma Yerusalem hingka wungkur sa naantuh Zaitun, sa riet Yerusalem, sa lawitni kiaan erang minggu. ¹³ Hantek here masuk, here mamai ma ruang entu, oneng here moneng. Petrus, anri Yohanes, balalu Yakobus anri Andreas, Filipus, andri Tomas, Bartolomeus, anri Matius, Yakobus iak Alfeus, anri Simon ulun Zelot, anri Yudas iak Yakobus. ¹⁴ Here katuluh isa atei hang huang doa baya kawan wawei, anri Maria, ineh Yesus, anri katuluh palaksana'i-Ni. ¹⁵ Pas andrau-andrau yeru, Petrus mindri hang penah palaksana'i ni saiman ( ulun rama kira-kira jatuh ruang pulu kaulun jumlah ni ) nelang kaeau, ¹⁶ "Kawan palaksana'i harus ganap inun sa naan hang Kitab Suci sa haut na antuh daya Roh Barasis itah wawa Daud hal hi Yudas, sa jari pamimpin ulun rama sa nyama Yesus. ¹⁷ Daya hanye dahulu tahitung hang penah takam, nelang kaiyuh bagian hang pelayanan yena. ¹⁸ Wayah yena, hanye midi tane hingka upa kejahatan ni, balalu udik ulu ni labu badahulu, hang penah tenga ni darai, anri katuluh hang wuang wuntung ni taburai. ¹⁹ Daya hal yeru haut na karasa ulun katuluh ni sa muneng hang Yerusalem. Maka ni tane yeru hang basa here na antuh Hakal-Dama, sa artini, 'Tane Ira'. ²⁰ Kude hal yeru, haut na tulis hang wuang kitab Mazmur: "Elahni unengni jari suni, andri elahni hang yaru paueng isa kaulun sa muneng hang wuangni; Mazmur 69:26 anri, 'Elahni ulun lain ngalap jabatan-ni.' Mazmur 109:8 ²¹ Da gana yeru, isa ka ulun hingka here sa naan eleh baya takam mulai Tuhan Yesus masuk anri kaluar hingka penah takam, ²² mulai hingka pandrusan Yohanes hampe ma andrau Hanye naenat hingka penah takam, isa kaulun hingka here yena harus jari saksi hal Kebangkitan-Ni baya takam." ²³ Balalu here mangusul rueh kaulun, hanye yeru Yusuf sa naantuh Barsabas, sa naantuh pada Yustus, anri Matias. ²⁴ Udi yeru, here laku doa, "Hanyu, Tuhan sa karasa atei katuluh ulun. Tutui ma kami hie kakira hingka here rueh na sa haut na pidi-Nu, ²⁵ ne'u narime bagian pelayanan iti anri jabatan rasul, hingka Yudas sa haut manyimpang ne'u tulak ma onengni re'eray." ²⁶ Balalu para rasul midi hingka here rueh maka tapidi hi Matias balalu hanye masuk hang wuang bilangan kasawalas rasul.