¹ Teka tueh ungkup ma hi Gayus, sa nasinta hang wuang kapinuui. ² Pulaksanai sa na sintaku, aku lakudoa ma hanyu hampan hanyu tatap wigas amirue tenga dagingnu. ³ Daya aku tuu arai mihewu hantek kawan pulaksanai sa hawi iwara amun hanyu tuu welum hang wuang kapinuuni. ⁴ Mahi arai hewuku sa labis hante teka hantek nyanrengei amun kawan iyaku haut welum hang wuang kapinuuni. ⁵ Pulaksanai sa na sintaku, naun tatap ngaraja anri setia katuluh usaha naun ma kawan pulaksanai sa lain, biar here yiru ulun sa puang naun kataru. haut iwara neu sintanu hadapan ungkup. ⁶ Naun haut ngaraja hal sa maeh, hantek naun ngarawah here nampalus pakiaan here makai sara sa na maeh hadapa Alatalla Amah. ⁷ Daya here haut tulak makai Ngaran yiru, pada mahi narime inunpun teka kawan ulun sa puang parisaya. ⁸ Daya yiru takam harus ngarawah kawan ulun sa iyalah here yiru hampan tau jari hengau pelayanan neu kapinuuni. ⁹ Aku haut nulis surat ma kawan ungkup, kude hi Diotrefes sa katuju baparagah hang penah here puang hakun narime kami. ¹⁰ Daya yiru amun aku hawi, aku sagar ngampiitung hanye neu gawianni sa haut namuruk kami makai eyauan sa puang maeh! Puang ekat iru ai, hanye pada puang narime kawan pulaksanai sa hawi nelang nguring here sa hamen narime kawan pulaksanai yiru pada nyadina here teka kawan ungkup. ¹¹ Pulaksanai sa na sintaku, ada naun ngalut hal sa puang maeh, ware naun ngaraja hal sa maeh. Daya ulun sa ngaraja hal sa maeh yiru asalni teka Alatalla Amah, kude kawan ulun sa ngaraja hal puang maeh yiru puang nantau Alatalla Amah. ¹² Katuluh ulun haut iwara hal maeh neu hi Demetrius pada neu hal kapinuu sa na warani. Kami pada iwara hal yiru, kami pada karasa amun inun sa na wara kami yena tuu. ¹³ Rama hal sa hamen na suratku ma naun, kude aku puang tau nyuratni ma naun makai tintah baya pulpen. ¹⁴ Aku ngaheng tau hinang manalu naun palus basurah anri naun. ¹⁵ Damai sejahtera ma naun. Kawan hengau hang yati ngirim tabe ma naun. Awat tahampe pada tabe kami ma katuluh pulaksanai hang yari.