¹ Teka panatua, ma ineh sa napidi anri ma kawan iyani, sa kusinta wuang kebenaran, anri puang ekat aku, kude pada katuluh ulun sa kataru ma kebenaran, ² daya kebenaran sa muneng wuang takam anri sa sagar baya takam kalalawahni. ³ Ahilelo, penu sinta, anri damai sejahtera teka Alatalla Amah anri Tuhan Yesus Kristus, Sang Anak, nyindrah takam wuang kebenaran anri sinta. Welumleh Sasuai Parentah Alatalla ⁴ Aku tuu miaray daya karasa papire iyanu welum wuang kebenaran, kalaawe parentah sa haut takam tarime teka Amah Alatalla. ⁵ Itati, aku laku ma hanyu, Ineh, puang ialah aku nyurat parentah wau, kude parentah sa haut naan witu takam hantek awal, nampan takam sameh tau mangalelo. ⁶ Anri Itilah sinta, ialah takam ngalut parentah-Ni. Itilah parentah yiru, kala sa haut hanyu rengei hantek awal nampan hanyu welum hang wuangni. ⁷ Daya, rama sa ngampitawang haut hawi ma dunia, here puang parisaya Yesus ialah Kristus sa hawi wuang wujud murunsia. ⁸ Bahati-hatileh nampan hanyu ada kawawaian inun sa haut takam iyuh, kude nampan takam narime upa sa langkap. ⁹ Katuluh ulun sa takia hang luar anri puang muneng wuang ajaran Kristus, hanye mahi Alatalla. Kude, his pun sa muneng wuang ajaran yiru naan Alatalla Amah anri Anak. ¹⁰ Dami naan ulun sa hawi mahanyu anri puang ngenei ajaran iri, ada narime hanye ma wuang lewunu atawa ngami tabe inun pun. ¹¹ Daya, hie pun sa nyamut hanye baarti uma pada wuang gawian raat ulun yiru. Tabe Panutup ¹² Hene hal sa hamen nasuratku ma hanyu, kude aku pahakun ngulahni makai karatas anri tinta. Kude, aku baharap kaiyuh hawi nunung hanyu anri bapaner bahadapan nampan takam natampenu anri miaray. ¹³ Kawan iya teka pulaksanai wawei sa napidi natahampe tabe mahanyu.