³ Dikiau Hagan Manjadi Panjala Manusia ¹ Pas wayahitu, urang banyak bakarumun mangulilingi Sidin gasan mandangarakan firman Allah, Rahat itu, Yesus badiri di pinggir danau Genezaret, ² balalu malihat dua jukung bapatak di pinggir danau itu, tatapi buhan nalayan imbah kaluar matan jukung-jukung itu wan rahat mambasuh jala buhannya. Yesus naik ka salah satu jukung, yaitu jukung Simon, wan manyuruh Simon mangayuh jukungnya sadikit bajauh matan darat. Balalu, Yesus baduduk wan mangajar urang banyak dari atas jukung. ⁴ Imbah tuntung bapander, Yesus baucap wan Simon, "Tulakankan ka wadah banyu nang tadalam wan timbaiakan jala ikam gasan manangkap iwak." ⁵ Simon manyahut, "Guru, kami tuhuk samalaman bacari , tatapi kadada kolehan apa-apa! Tatapi, lantaran Pian nang manyuruh, aku cagar manimbaiakan jala ini." ⁶ Balalu, rahat buhannya manggawinya, buhannya manangkap banyak banar iwak sampai jala buhannya mulai rabit. ⁷ Balalu, buhannya mambari isyarat gasan kakawanan nang di jukung lain supaya datang mandangani buhannya. Balalu, kakawanan buhannya datangan maisi kadua jukung itu wan iwak sampai jukung buhannya parak tinggalam. ⁸ Rahat Simon Petrus malaihat kajadian itu, inya basujud dihadapan Yesus wan baucap, " Bajauh matan aku , Tuan, sabab aku dalah urang nang badusa!" ⁹ Petrus bapander kayaitu lantaran inya wan sabarataan urang baimbai inya marasa takjub lantaran banyaknya iwak nang buhannya tangkap. ¹⁰ Kayaiti jua wan Yakobus wan Yohanes, anak-anak Zebedeus, nang bakawan wan Simon. Yesus baucap wan Simon, "Kada usah takutan. Mulai wayahini, ikam cagar manjadi panjala manusia." ¹¹ Imbah buhannya manarik jukung-jukung ka darat, buhannya maninggalakan sabarataan balalu umpat Yesus. Urang nang Sakit Kusta Disambuhakan ¹² Suatu hari, Yesus rahat di sabuah kota. Di kota itu, baisi urang nang awaknya hibak kusta. Rahat urang itu malihat Yesus, inya basujud sampai muhanya kana tanah balalu mamuhun wan Sidin, "Tuan, pabila Pian hakun, Pian kawa mantahirakan aku." ¹³ Balalu, Yesus mangulurakan tangan-Sidin wan manjapai urang itu. Ujar-Sidin, "Aku hakun, jadilah tahir." Rahat itu jua, panyakit kusta urang itu hilang. ¹⁴ Tatapi, Yesus mamarintah urang itu supaya kada mamadahi siapa haja wan bapasan, "Tulak wan tampaiakan awak ikam wan imam. Persambahakan kurban lantaran kasambuhanikam nangkaya udah diparintahakan uleh Musa sabagai bukti gasan buhannya." ¹⁵ Habar manganai Yesus sasar rame sampai banyak urang nang datang bakumpul gasan mandangarakan Sidin wan diwarasakan dari panyakit buhannya. ¹⁶ Tatapi, Yesus rancak tulak manyalinap ka wadah-wadah sunyi hagan badua. Urang nang Lumpuh Disambuhakan ¹⁷ Pada suatu hari, rahat Yesus mangajar, urang-urang Farisi wan ahli-ahli Taurat nang datang dari sabarataan kota matan wilayah Galilea, Yudea, wan Kota Yerusalem jua baduduk disana. Wan, kuasa Tuhan mairingi Yesus maulah-Sidin kawa manyambuhakan urang banyak. ¹⁸ Balalu, talihat sarumbungan urang manggutung saikung urang lunpuh diatas wadah guringnya, wan buhannya bausaha mambawainya masuk wan maandak urang itu dihadapan Yesus. ¹⁹ Tatapi, lantaran buhannya kada manamuakan jalan gasan mambawa urang itu masuk lantaran karumunan urang, naiklah buhannya ka atas atap balalu manurunakan urang lumpuh itu wan wadah guringnya ka tangah-tangah di hadapan Yesus. ²⁰ Rahat malihat iman buhannya, Yesus baucap,"Hai Dinsanak, dosa ikam udah diampuni." ²¹ Ahli-ahli-Taurat wan urang-urang Farisi mulai batakun-takun, "Siapa garang Urang nang mahujat Allah ini? Siapa garang nang kawa maampuni dosa-dosa kacuali Allah haja?" ²² Rahat Yesus tahu nang dipikirakan buhannya, Sidin baucap, "Kanapa ikam batakun nangkaya itu intang hatimu? ²³ Mana nang labih mudah , bapadah 'Dosa-dosamu udah diampuni' atawa 'Bangun wan bajalan'? ²⁴ Akan tatapi, supaya ikam paham bahwa Anak Manusia bakuasa di bumi gasan mangampuni dosa," Yesus baucap wan urang lumpuh itu, "Aku bapadah wan ikam: Badirilah, angkat wadah guring ikam wan bulik." ²⁵ Wayah itu jua, Urang itu langsung badiri di hadapan sabarataan urang wan maambil wadah guringnya, balalu bajalan bulik sambil mamuji Allah. ²⁶ Sabarataan urng di situ hiran wan mamuji Allah. Lawan dihibaki parasaan takutan wan kuasa Allah, buhannya baucap, "Hari ini kami malihat hal-hal nang luar biasa!" Lewi Maumpati Yesus ²⁷ Imbah itu, Yesus kaluar wan maliaht saurang pangumpul pajak nang bangaran Lewi nang rahat bduduk di wadah pamungutan pajak. Yesus bapander wan inya, "Umpat Aku." ²⁸ Balalu Lewi badiri, maninggalakan sabarataannya, wan maumpati Yesus. ²⁹ Imbah itu, inya maulah pesta ganal gasan Yesus di rumahinya. Banyak buhan pangumpul pajak wan urang lain nang makan baimbai buhannya. ³⁰ Akan tatapi, urang-urang Farisi wan ahli-ahli Taurat mulai manggaruru wan murid-murid Yesus, "Kanapa ikam makan wan minum lawan buhan pangumpul pajak wan urang-urang badosa?" ³¹ Yesus manjawab wan bapadah gasan buahannya, "Lain urang-urang sehat nang mamarluakan tabib, tatapi urang-urang garing. ³² Aku datang kada gasan mangiau urang bujur, tatapi gasan mangiau urang-urang badosa supaya bubannya batubat." Urang Farisi Mambandingakan Murid Yohanes wan Yesus ³³ Buhannya bapadah wan Yesus, "Murid-murid Yohanes Pambatis rancak bapuasa wan badoa. kaya itu jua murid-murid urang Farisi. Akam tatapi, murid-murid-Pian haur makan wan minum." ³⁴ Yesus bapadah wan buhannya, "Kawakah ikam manyuruh buhan nang mairingi panganten lalakian gasan bapuasa rahat panganten lalakian itu masih taimbai lawan buahnnya? ³⁵ Tatapi, hari-hari itu cagar datang, rahat panganten lalakian itu diambil matan buhannya, wan rahat hari-hari itulah buhannya cagar bapuasa." ³⁶ Yesus jua mangesahakan parumpamaan ini gasan buhannya, "Kadada urang nang marabit kain hanyar gasan ditambalakan ka baju nang lawas. Lantaran pabila kayaitu, urang itu cagar marusak baju nang hanyar, wan kain nang hanyar itu kada cocok wan baju nang lawas. ³⁷ Kayaitu jua kadada urang nang manuang anggur ka dalam wadah kulit nang lawas. Anggur nang hanyar itu cagar maulah rabit wadah kulit nang lawas maulah anggur itu cagar tumpah wan kantong kulit pacangan hancur. ³⁸ Anggur nang hanyar harus disimpan intang kantong kuli nang hanyar. ³⁹ Kadada urang nang imbah minum anggur lawas, hakun maminum anggur hanyar lantaran buhannya baucap, "Anggur nang lawas itu labih nyaman."