Kasalamatan Besar ¹ Lantaran itu, kita harus labih taliti maitihi apa nang sudah kita fangar suoaya kita kada taseret arus ² Sabab, bila ajaran nang disampaiakan uleh buhan malaikat tabukti kada kawa diubah, wan satiap palanggaran atawa nang kada taat pacangan manarima hukuman nang adil, ³ Nang kaya apa kita kawa lolos pabila kita manyapeleakan kasalamatan nang besar itu? Yaitu, kasalamatan nang partama-tama dihabarakan uleh Tuhan, wan sudah dibuktiakan bujur lawan kita uleh urang-urang mandangar-Sidin. ⁴ Salain itu, Allah jua mambari kasaksian malalui tanda-tanda wan hal-hal ajaib, bamacam mujizat wan karunia-karunia Roh Kudus nang di bagiakan manurut kahandak-Sidin. Yesus Manjadi Sama nangkaya Manusia gasan Manyalamatakan Manusia. ⁵ Allah kada manyarahakan dunia nang pacangan datang, yaitu dunia nang rahat kita panderakan, gasan buhan malaikat ⁶ Tatapi, ada satu urang nang sudah mambari kasaksian dalam sabuah nas: "Siapa garang manusia sampai Pian mamikirakannya? Siapa garang anak manusia sampai Pian paduli? ⁷ Untuk samantara, Pian maulah inya labih randah pada malaikat; Pian mamahkotai inya lawan kamuliaan wan hurmat. ⁸ Pian manyarahakan sagala sasuatu di bawah batis inya."Mazmur 8:5-7 Sabab, imbah manyarahakan sabarataannya di bawah batis-Sidin, maka Allah kada mambiarakan sabuting-buting nang kada takluk lawan-Sidin. Akan tatapi, wayahini kita balum malihat sabarataan takluk lawan-Sidin. ⁹ Tatapi, kita sudah malihat Yesus nang gasan samantara diulah labih randah daripada buhan malaikat, yaitu Yesus nang dimahkotai lawan kamuliaan wan hurmat lantaran sudah mandarita kamatian supaya uleh anugerah Allah, Inya kawa marasaakan kamatian gasan sabarataan urang. ¹⁰ Sudah sapantasnya Sidin-nang gasan Sidin wan malalui Sidin sagala sasuatu ada-manyampurnaakan Parintis Kasalamatan anak-anak-Sidin malalui pandaritaan, gasan mambawa buhannya ka kamuliaan. ¹¹ Sabab, baik Sidin nang manyuciakan atawa buhannya nang disuciakan, sabarataannya baasal mata satu Bapa; itulah sababnya Yesus kada supan manyambat buhannya dinsanak-dinsanak - Sidin ¹² lawan baucap: 'Aku cagar manyataakan ngaran-Pian gasan dinsanak-dinsanak-Ku. Ditangah-tangah sabarataan umat-Pian, Aku cagar manyanyiakan lagu gasan-Pian. 'Mazmur22:23 ¹³ Wan lagi: "Aku cagar maandak kayakinan-Ku wan Allah."Yesaya 8:17 Wan lagi, "Inilah Aku, baimbai anak-anak nang sudah dibariakan Allah gasan-Ku. "Yesaya 8:18 ¹⁴ Lantaran anak-anak itu adalah manusia nag baisi darah wan daging, maka Yesus jua maambil bagian dalam kaadaan buhannya supya malalui kamatian-Nya, Sidin kawa mambinasaakan inya nang baisi kuasa atas kamatian, yaitu iblis. ¹⁵ Wan, mambibasakan buhannya nang saumur hidupnya diperbudak uleh katakutan lawan kamatian. ¹⁶ Jadi, jalas sudah bahwa Sidin kada manolong buhan malaikat, tatapi manolong katurunan Abraham. ¹⁷ Lantaran itu, dalam sabarataan hal Yesus harus manjadi nangkaya dinsanak-dinsanak-Nya, supaya Sidin kawa manjadi Imam Besar nang limpuar kasih wan satia dalam palayanan gasan Allah. Lantaran itu, Sidin kawa manabus dosa-dosa umat. ¹⁸ Sabab, Yesus sorangan mandarita rahat dicobai, maka Sidin kawa manolong buhannya nang rahat dicobai.