(Soda mole neme Paulus no Timotius) ¹ Neme Paulus no Timotius ata neme Yesus Kristus mai, soa neu basa dahena lo mangamoi kala, nai Lamatua Tuhan Yesus dale ho lia manai Filipi. Boema soa neu basa manafo do manalolo neu manatunga dea neme Yesus mai. ² Babati ma papala mole ma dame neme Amamanatulain mai boema ita Lamatuan Tuhan Yesus Kristus sama-sama no kemi losa ³ Tunga-tunga fai au kafalene kemi au huke makasih neu au mana adu do mana taong. ⁴ Nai au hule do hala doing dale soa neu kemi, au huke hala doi no namahoko do natadale. ⁵ Hu ita lope lima takabua ma ngani ei takesa nai tui do tafada Lamatua ka hala lin neme fai maka sososa ka losa besa ia. ⁶ Au kamahele tebe-tebe Lamatua ka nonoi do tatao malolen moli ma dadi nai kemi talada. Lia lian tao nan nantetu ma nala losa Lamatua Yesus Kristus fai ma- main na. ⁷ Au namemedanga tetean na leo lia soa neu kemi. Hu kemi basa nai au dalenga. Leo mae au be nai bui a, losa au fe natetea do na memepe neu susula mangamoi ka isi do lin, kemi dadi neu au tolanong nai Ama manatulain babatin do papalan dale. ⁸ Ama manatulain mana bubulu do nalela neu au, au kafalene neu kemi basa nai ita Lamatuan Tuhan Yesus Kristus dale. ⁹ Au huke ma hala doi : Kela leo bea na kemi nasue do nalai aom boe namabauina neni basa duduka ma a'afi ma nama hehele. ¹⁰ Ho kela kemi tenga do hele mala hata lia malole ; kela kemi masoda nai lo do mangamoi ka dale no tamanu sala singo nai Lamatua ka fai mamai na; ¹¹ kela kemi soda ma henu no buna do boa lo do matetu neme Yesus babati do papalan mai. neni malela do masa ma kikio do o opa soa neu Ama manatulain. ¹² Tolanong kemin, au kahi kemi bubulu hata lia moli ma dadi neu au neni nama loa do nama dalu neu Lamatua dedea do nafadan, ¹³ ho kela basa manea nai mane ka uman bama dehena feke kala babulu do lalela huku do lange au soa neu Kristus. ¹⁴ Dehena kama hehele ka kadodo na nai Lamatua ka dale boe lamahele leo Lamatua ka neu hu no huhuku do lalange neu au, boe lapalani tui do lafada Lamatua ka dedea do nafadan ta bi do lamataku fa. ¹⁵ Dehena tui lafada Kristus boe, hu lakamuti ma laka hehe bao, te hu hapu dahena boe tui lafada no dale malole. ¹⁶ Dehena lia nonoi do tatao malole hu susue do lalai sila babulu do lalela fe au mai ia kuni natetea do namemepe neu Lamatua ka hala lin na. ¹⁷ Te noi lia ta lanu dale malole sila loi tao nana tunga sila natutua do nadedema aon na, ta lanu dale lo do matetu. Neme sila duduka do a'afin mai tuti do popo fe au eno nakaleo nai bui dale. ¹⁸ Boe ma neneni na dube ? Leo bea mesan, neni eno dube, muni dale takadalu do malole tui do tafada Kristus naden na. hu lia au kamahoko ma katadale. Tebe au kamahoko do katadale. ¹⁹ Hu au bubulu neme kemi huhule do haladoin ma tutulu fafali neme Lamatua Tuhan Yesus mai. Hata lia moli ma dadi neu au neu ko napoi nala au. ²⁰ Namahena do nakabani lia dadi au dalenga ta hapu namumulu do naka mamae au hapu napa lalani neme Kristus mai sama leo besa kia, kio opa neu Lamatua ka naden na nai au aopang ia nakalo. Leo mae au be kasoda do au mate. ²¹ Bati neu au masoda ia nana hu Kristus boe ma mamate ia nana au kaua do kanale. ²² Te hu makaneni au be kasoda nai ao pa ia, au koi ma tao neni buna ma boa. Besa ka au hi do hele bea ? Au ta bubulu. ²³ Au kakatoka ma kakala doa nai hihi do hehele ia. malole neu au lako kela masoda ia ku ko Kristus. ²⁴ Te hu malole lena soa neu kemi au be kasoda teli nai kemi talada. ²⁵ No nama hehele ia, au bubulu au leo do kapalasa nai kemi basa talada no namahoko ma natadale ma nama hehele neu Lamatua ka. ²⁶ makaneni ma au fali selu leo kemi basa talada mai na kemi nama hehelem boe natea do namepe neu Lamatua Tuhan Yesus hu au. (Makabua Mahele Moi Tao Makalo) ²⁷ leo mae leo lia masoda ma mole tunga eno malole soa neu Kristus hala lin ho kela au mai kaneta ko kemi, do leo mae au ta mai fa, au kama nene nai lia kemi mapa dei mahele nai Dula dale esa no duduka aafi esa kela moi ma tao noku-noku bati neu nama hehele neme susula mangamoi ka mai. ²⁸ boso kemi fe musu mala laka bani kemi hu lia nana funu do tana esa ma ma binga do nabati soa neu sila, tehu soda mole soa neu kemi, funu do tana lia boe o neme Lamatua ka mai. ²⁹ Hu no Kristus nade na kemi hapu babati ma papala ta kada noi kela mamahele neu kana, te kemi boe o neu ko mameda doi doso bati neu lia. ³⁰ Hu no lia kemi masasale mo bela do bau ho lia deta do sama leo au kaneta do katongo kon, boma sama leo besa ka kemi mamanenen au bei kahele.