¹ Soda molek neme Paulus, dahena lia nai hahuku lalange hu nakalalako Yesus Kristus dadea nafadan, no neme Timotius, ita nano kamahahelen, neu Filemon, tialai ma nano matui manamafada ita sue lain, ² boe ma neu Apfia, ita feto na,boe ma neu Arkhipus, ita nano manamatui manamafada, no neu dahena lia tunga Lamatuak tei esa dalek esa nai uma ma dale. ³ Babati papala no soda molek neu ko neme Lamatuak mai, ita Ama na, no neme lamatuak Yesus Kristus. ⁴ Au huke makasi neu Lamatuak kela nafalalene ko nai au hule haladoi ka dale, ⁵ hulia au kamanene kemi namahahele ma no sasue lalai lia kemi manun nai Lamatuak Yesus dale ma neu basa dahena mangamoi nai Lamatuak dale. ⁶ Au huke ma haladoi kela kemi namahahele ma natea do nakamepe babaluk do malela enoma malole lia ita tanuna hu Kristus. ⁷ Au kamahoko kan ia neu kemi sasue do lalaima neme kemi, tolanong kemin, dahena dale lo do matetu ka natea do nakamepe selu. ⁸ Hulia, leo mae au kanu namahahele bauina nai Kristus dale no kela paleta kemi moi tao hata bea lia kemi moi taon, ⁹ tehu no sasue ma lalaik, de lia na au huke neu kemi. Au, Paulus -- ho lia lasi so, no besa'ia dadi neu dahena hahuku malalange hu Kristus Yesus. ¹⁰ Au hule haladoi neti ko neu au ananga, Onesimus, ho lia au hapun nai hahuku lalange ka dale, ¹¹ nai makulun lia au dadi neu dahena manadadi ta neu ko, tehu besa'ia au dadi neu dahena manadadi, batineu ko ma neu au boe. ¹² Au kadenu lia, au ana babonginga, fali leo ko neu, ¹³ ho lia tateana au tanau fen fali ho kela leo no au ho kela lia ngati ko lelu natanae au neme au nai hahuku lalange ka dale hu Lamatuak dadea nafadan.* ¹⁴ Leo mae, ita beta takakaketu nanoi esa, au tanau koi hataesa boe ho kela malole lia au koinana esa ta nadenu au boe, tehu neme au hahi nanau mesanga. ¹⁵ Onesimus sangaeno ho kela boso nakababua no ko fai esa dua ho kela ko sipoman makababua losa dadona neu, ¹⁶ tehu tadadi neu ata so, te dadi lena neme lia mai, ho lia dadi neu tolano sasuek, ta soa neu au boe, te neu ko boe, malole nai soda aopa ka dale ma nai Lamatua ka dale. ¹⁷ Makaneni ma kemi au nana nano nanoi tatao, sipo mala Onesimus saman leo kemi sipo au boe. ¹⁸ Makaneni ma lia tao sala' kemi do nahuta dube mesan neu kemi, au tangon basa lia. ¹⁹ Au ia Paulus, au dui ia pake au lima nga: neu ko au bae Onesimus huta nala, au ta tatui esa boe kae kemi mahuta au, ho lia kemi soda mesa ma. ²⁰ Kela nai Lamatua ka dale, au hapu malole neme kemi amai. Malaloa au dalenga nai Kristus dale. ²¹ Hu au kamahele kemi makananete do makatataka, hu au babuluk kemi neu ko moi tao lena au huhuke nga. ²² Neme lia mai, kemi bati fe au kama hu au kamahena hahule haladoi neme kemi a mai neu ko, Lamatua ka napoi au keti. ²³ Au nanong nai bui dale, Epafras nai Yesus Kristus, haitua hala soda molek neu kemi, ²⁴ leo lia boe Markus, Aristarkhus, Demas, no Lukas, au nanong manatungadea. ²⁵ Babati do papala neme Yesus Kristus mai nasulu nahapa ko.