अध्याय – 9
1
तो तिहीने आगला जातलो ताहा जोल्मोमेने आंदलो एक माअहु तियाल देखयो.
2
ताहा तिया चेलाहा तियाल फुच्यो, “रब्बी, केडा पापाकी तो एहेकी आंदलो जोल्मोम आलहो ? तिया की का तिया याहाकी बाहाका की ?”
3
येशुय उत्तर देदो, “इयाय नाहा तिया याहाकी बाहाकय पाप केयो एहकी नाहा, ता तिया इहिमे देवा नाव उच्चो वेरा खातोर तियाल आ एहेकी जल्माम आलो.”
4
जीयाय माल मोकल्यो तिया काम दिही हा तावलुगू आपूहुन केरा जोजे. रात आवणारी हाय, तियाम केडोबी कामे केता आवनारो नाहा.
5
आय दुनियाम हाय तावलुग आय दुनिया उजवाडो हाय.
6
ऐहेकी गोगीन तो तोरतीपे थुपो आने थुपीन तियाय डोरो केअयो, तो डोरो तिया डोवाहाल लागव्यो.
7
आने तियाल आख्यो, “जो शिलोह नावा तालावाम तुवीले.” (अया अर्थ मोकलावलो) आने तिया जायन तुवी लेदा आने तो डोवाहाकी वेरा लाग्यो.
8
आने तिया पाहील्या आने जीयहाय तियाल मागीन खानाराल पेला वेलो आथो तियाही आख्यो, “तो जो बाेहिन मागीन खानारो तो आज ने ?
9
केडाय आख्यो, ओ तोज हाय. बिहीराय आख्यो, नाहा ओ तिया होच हाय. पेन तियाय आख्यो, “आय तोज हाय.”
10
इयापेने तियाही तियाल आख्यो, “हाती तो डोआ केल्ली रीते उगड्या ?”
11
तियाय जाबाब देदो, “येशु नावा माहाय डोरो किन मा डोओवाहान लागव्यो, आने तियाय मान आख्यो, “ शिलोहो तालावाम जायन तुवे, मायुय जायन तुव्यो आने मान देखाया लाग्यो.”
12
ताहा तियाल आख्यो, “ तो काही हाय ?” तियाय आख्यो, “मालुम नाहा.”
13
तो जो पेअला आंदलो आथो तियाही तियाल पारुश्यापाही ली गिया,
14
ज्यादिही येशुय डोरो किईन तिया डोअवाहा उगड्य तो दिही शब्बाथ आथो.
15
तियाहाल परुश्याही तिया फाचे फुच्यो, “तुल केहेकी देखाया लाग्यो ?” आने तियाय तियाहान आख्यो , “तियाय माआ डोअहान डोरो लागव्यो, तो मायुय तुवी टाक्यो आन माल देखाया लाग्यो.”
16
ताहा परुश्याहामने थोडाकाहाय आख्यो, “ओ माअहू देवाहायने नाहा, काहाका ओ शब्बाथ पालतो नाहा.”
17
पेन बीहीराय आख्यो, “जो माअहु पापी हाय, तो एहेडे कामे केहेकी किसकेहे ? ताहा फाचे ते तियाल आदलाल आख्यो, “ तियाय जाहा तो डोआ उगडाव्या ताहा तु तिया बोददल काय आखतोहो ?” तिया आख्यो, “तो एक संदेष्टो हाय.”
18
ताहा यहुदी अधिकाऱ्याही जियाल नोजर आलली आथी तियाल तिया याहाकी बाहाकाल हादीन होद फुस केअई तावलुगू तो पेअला आंदलो आथो ओन आमी देखतो वेयो हाय तियावे भोरुसो थोव्यो नाहा.
19
तियाहाय तियाहान फुच्यो, “तुमा जो पोयरो आंदलो जल्मामने आथो एहेकी तुमा आखतुला तो ओज हाय का ? आने आमी तीयाल केहेकी देखहाय ?”
20
तिया याहाकी बाहाकाय उत्तर देदो, “ओ आमज पोयरो हाय, आने ओ आंदलो जोल्माम आलेलो आथो ऐहेकी आमहान मालुम हाय,”
21
तेबी आमी तियाल केहेकी देखाया लाग्यो इ आमाहान मालुन नाहा काहाका तिया डोआ केडाय उगडाव्या इबी आमाहान मालुन नाहा,” तियालुज फुचा तो उबरीम आलेलो हाय, तो तियाबोद्दल आखी.”
22
तिया याहाकी बाहाकाल यहुदी अधिकाऱ्याहा बीख आथी तियाहाल एहेकी आख्यो काहाका तो ख्रिस्त हाय एहेकी केडो मानी तियाल सभास्थानामेने काडी देवाम आवी एहेकी यहुदृया पेलाज एकुज मत वि गेहेलो आथो.
23
इया खातोर तिया याहाकी बाहाकाय आख्यो, “तो उबरिम आलेलो हाय तियालुज फुचा”
24
ताहा जो माअहु आंदलो आथो तिया तियाहाय बिहीरादाव हाद्यो आने तियाय तियाल आख्यो, “ देवा गौरव केरा, इ माअहु पापी हाय इ आमा जांताहा”
25
इयापेने तियाय उत्त्र देदेा, “तो पापी हाय का नाहा इ आय जांतो नाहा, आय एक गोठ जोहू, आय पेला आंदलो आथो आने आमी माल देखाहाय.”
26
ताहा तियाहाय आख्यो तियाय तुल काय केएयो ? तियाय तो डोआ केहेकी उगडाव्या ?
27
तियाल तियाहान उत्तर देदो, “मायुय तुमाहान आमीज आख्यो तेबी तुमा उनाया नाहा, तो फाचे उनाया काहा होदताहा ? तुमाबी तियाचेला वेरा होदतो का ?
28
ताहा तियाहाय तियाल दोष दिईन आने तियाहाय तियाल आख्यो, “तु तिया चेला हाय, आमा मोशे चेला हाय.”
29
देव मोशे आरी गोगलो इ आमाहान मालुम हाय ओ किहीने हाय इ आमाहान मालुम नाहा.”
30
तिई माहाय तियाहान उत्तर देदो, “ इज तो मोठो खुब नोवाय हाय का ओ कीहीने हाय इ तुमाहान मालुम नाहा, आने तेबी तियाय डोआ उगडाव्या,
31
आपुहूल इं मालुम हाय का देव पापी लोकाहा उनातो नाहा ता जो माअहु देवा भक्ती केअनरा हाय आने जो तिया मोरजीकाही केहे तिया तो उनायेहे,
32
आंदलो जोल्मामेने केडा डोआ उगडाव्या इ दुनिया सुरवातीहिने कीधी केडाहाकी उनायाम आलो नाहा,
33
ओ जर देवाहीने नय रेतो तर इयाल काय केता आवतो नाय,
34
तियाय तियाल आख्यो, “तु ता बिलकुल पापाहिमे जोल्मोहा आने तु आमाहल हिकवुतोहा का ? आने तियाही तियाल बारे काडी देदो,
35
तियाही तीयाह बारे काडो देदो इ येशुय उनायो, आने तियाल तो सापड्यो ताहा तियाल आख्यो , तु ता माअहा पोयरावे विश्वास थोवतो का ?”
36
तिया उत्तर देदो, साहेब आय तियावे विश्वास थोवा एहेकी तो केडा हाय ?”
37
येशुय आख्यो, “ तुयुय तियाला वेलो हाय आने तो आरी आमी गोगीरेहेलो हाय तोज तो हाय,”
38
तियाय आख्यो “प्रभुजी, आय भोरुसो थोवुहू.” आने तियाय तियाल पागे पोड्यो.
39
ताहा येशुय आख्यो, “आय न्यायनिवाडो केरा खातोर इ दुन्याम आलो इयाखातोर जियाहान देखाते नाहा तियाहान देखाया जोजे अने जियाहान देखाहाय ते आंदला वेरा जोजे.”
40
ताहा परुश्याहामेने जे तियआरी आथे तियाहाय अे गोठ्या उनाया, आने तियाय तियाल आख्यो “आमाबी आंदले हाय का ?”
41
येशुय तियाहान आख्यो, “ तुमा आंदला रेता ता तुमाम पाप नाय रेतो, पेन तुाम आखताहा का आमाहान आमी देखाहे तियाहाल तुमा पाप तेहेकीज रेहे.”