¹ Tafaran'izay raha zay dra nagnety zaho,dra nahita vatrangara raiky nisokasy tegny amigny lagnisy . Gny feo volohany ze reko dra niresaky taminahy manahaky gny trompetra ,nanao hô: '' Miakara etihô,dra ho aboako anao ze sy maisy hisy afaran'ereo .'' ² Nisy fotoa zaho voatariky gny fagnahy,dra nahita fa nisy seza fiandriana nipetraky tegny amigny lagnisy ,nisy olo nipetraky teo agn'abonin'izay. ³ Gny raiky ze nipetraky teo agn'abony dra miendriky tahaky gny jaspa vô karneola. Nisy avana nagnodidy gny seza fiandriana , Gny avana dra miendriky manahaky gny emeraoda. ⁴ Nisy seza fiandriana efasy amby rôpolo nagnodidy gny seza fiandriana ,dra loholo efasy amby rôpolo gny nipetraky teo agn'abon'ereo seza fiandriana,niakazo fosy,niaraky tamigny satro-boninahisy volamena tegny amigny lohan'ereo . ⁵ Baka tamigny seza fiandriana gny nisy helasy fahazava, kotroka, dra kotro-barasy . Nisy ziro fito nirehisy teo alohany seza fiandriana ,ziro ze fagnahy fiton'agnahary ⁶ Teo alohagn'ny seza fiandriana dra nisy ranomasy fitarasy ,manahaky gny kristaly. Reo raha-managn'ay efasy dra teo agnevogn'ny seza fiandriana vô nagnodidy anizay ,feno maso ,teo agnoloany vô tao an-damosiny. ⁷ Gny raha-managn'ay volohany dra manahaky gny liona ,gny raha -mahagn'ay faharô manahaky gny zanak'ambomby,gny raha managn'ay fahatelo dra manahaky gny olo,dra gny raha managn'ay fahefasy manahaky gny voro-mahery mitily. ⁸ Reo raha-managn'ay efasy dra samy mana elasy enina aby, feno maso gny agn'abony vô gny ambany. Andro vô hariva ereo dra sy mizano mizaka hô:'' Masy ,masy, masy gny Topo zagnary sitoha ze nisy, vô misy, dra bô ho avy." ⁹ Dre ombia dre ombia gny raha managn'ay dra hagnome voninahisy ,laza,dra fisaora agny raiky ze mipetraky eo amigny seza fiandrianana , gny raiky ze velo mandrakizay doria, ¹⁰ reo loholo efasy amby rôpolo dra nampiankohoky gny vatan'ereo eo anoloagn'ny raiky ze mipetraky eo amigny seza fiandrianana. Mandohaliky eo amign'ny ze velo mandrakizay doria ereo, sady nanoraky gny satro-boninahisin'ereo teo agnoloagn'ny seza fiandrianana, mazaka hô: ¹¹ '' Mendriky anao,toponay vô Zagnahary, handray gny voninahisy vô gny laza sady gny hery . Fa anao gny namoro gny raha iaby,sady tamign'ny alalagn'ny sitraponao,dra nisy tinezà nereo.''