¹ Ka misara, dra sy hosara andrareo. ² Fa amy fisara nataondrareo, gny hisara andrareo, dra amy fandrefesa andrefesandrareo, gnby handrefesa andrareo. ³ Manao akory anao gny magnety gny singa-mololo masaiky ze ao agnatiny masony gny rahalahinao, nefa sy sikarisinao gny andry ao agnaty masonao? ⁴ Nanao akory gny hizakanao gny rahalahinay ho: 'Angao zaho hangalaky gny sing-mololo ao agnatiny masonao,'raha bo ao agnatiny masonao gny halify? ⁵ Ry piasaravelasihy! Alao aloha gny halify ze ao agnaty masonao, dra laha teo anao hahita soa fa gny mangalaky gny singa-mololo ze eo amy maso gny rahalahinao. ⁶ Ka ome gny aboa ze masy, dra ka hatoraky eo anoloany koso gny vatosoandrareo. Raha sy zay dra mety ho voahisany gny tombon'ereo, dra laha teo hifotisy vo hamiravira andrareo amy fahapotehany. ⁷ Mangataha, dra omeo andrareo zay. Mitaliava, dra hahita andrareo. Dodogny, fa hisokaky ho andrareo zay. ⁸ Fa zay aby mangataky, dra mahazo;reo aby ze mitalia, dra mahits; dra ho agny olo mandondo, dra ho sokafy. ⁹ Sa iza amindrareo, raha angataha gny zanany mofo, gny hanolosy vato ho anazy? ¹⁰ Dre koa raha nangatahiny trondro, dra hanolosy raharaha anazy? ¹¹ Noho zay, raha andrareo ze rasy avo mahay magnome reo fagnomeza ze soa ho agny zanakindrareo, moa sy lahibe mihoasy se gny raha soa omeny Randrareo ze agny an-dagnisy ho an'ereo ze mangataky aminazy? ¹² Noho zay, dre ino dre ino raha tiandrareo ho ataony gny olo amy vatandrareo, dra tokony hanao manahaky anizay amin'ereo avo koa andrareo, fa zay gny lala vo reo paminany. ¹³ Milira amy fefy tery. Fa lahibe gny fefy dra malalaky gny lala minday agny amy fahavereza, dra maro reo olo ze mandeha amin'izay. ¹⁴ Fa tery gny fefy dra sarosy gny lala ze mitariky magnagny amy fiaigna, dra keliky reo ze mahita anizay. ¹⁵ Mitandrema amin'ireo paminany sandoky, zay magnato andrareo amy fiakazoan'ondry nefa amboa tena pihaza. ¹⁶ Amy alalany gny tegnany gny hahafatarandrareo anazy reo. Mamboly voloboky egny amy silo seky gny olo, dre koa aviavy egny amy songosongo? ¹⁷ Mitovy amin'izay, gny hazo soa iaby dra mamokasy tegnany soa, fa gny hazo rasy dra mamokasy tegnany rasy. ¹⁸ Gny hazo soa dra sy afaky gny hamokasy tegnany rasy, dre gny hazo rasy koa sy afaky mamokasy tegnany soa. ¹⁹ Gny hazo iaby ze sy mamokasy tegnany soa dra ho tapahy dra hatoraky agny agnatiny afo. ²⁰ Dra noho zay, ho fatandrareo reo amy alalany gny tegnany. ²¹ Sy reo aby zay mizaka aminahy ho:'Topo, Topo,'dra hilisy gny fazakany gny lagnisy, fa reo ze manao gny sitrapony Rako ze agny an-dagnisy avo. ²² Maro reo olo hizaka aminahy amin'izay andro zay ho:'Topo, Topo,sy fa naminany tamy agnaranao se zahay, sy fa namoaky reo demonia tamy agnaranao, dra nanao reo asa lahibe tamy agnaranao?' ²³ Laha teo Zaho hagnambara amin'ereo apahibemaso ho:'Sy nahafatasy andrareo mihisy Zaho!'Miala lavisy anahy, ry panao rasy!' ²⁴ Noho zay, reo aby ze mahare gny zakako dra makato anizay dra hitovy gny olo hendry ze nagnory gny tragnony egny agn'abony vatolapy. ²⁵ Lasaky ora, avy gny tondra-drano, dra nifofofofo vo nandrbaky gny tragno gny sioky, fa sy nilavo zay, satria nahory teo agn'abony vatolapy. ²⁶ Fa ze mahare gny zakako dra sy makato anazy reo dra manahaky gny olo mola ze magnory gny tragnony egny agn'abony fasiky. ²⁷ Nilasaky gny ora, avy gny tondra-drano, dra nifofofofo vo namely gny tragno gny sioky, dra lavo zay, dra feno gny faharavany.'' ²⁸ Dra gny fa avy nagnambara reo zaka reo Jesosy, talazo tamy gny fampianarany reo vahoaky, ²⁹ satria nampianasy anazy reo manahaky gny olo ze mana fahefa Izy, fa sy manahaky reo panora-dalan'ereo.