¹ Fa gny fazaka gny lagnisy dra manahaky gny topon-tany ze nandeha vao maraindraim-be hagnakara piasa ho agny tanim-bolobony. ² Gny fa avy nifagnaraky tamin'ereo piasa izy fa ho denaria raiky isan'andro gny karamman'ereo,dra nalefany tagny amy tanim-bolobony ereo. ³ Niboaky draiky izy tamy lera fahatelo dra nahita piasa hafa nisangasanga tao an-tsena. ⁴ Ho izy tamin'ereo ho: Andrareo koa,mandehana agny amy tanim-boloboky,dra ze an-kevony mary dra homeko andrareo.'Dra nandeha niasa ereo. ⁵ Bo niboaky draiky izy teo ho eo amy lera faheny dra tamy lera fahasivy,dra nanao manahaky anizay avo. ⁶ Tamy lera faharaiky amby folo dra niboaky piasa hafa nisangasanga .Ho izy tamin'ereo ho:''Nanao akory andrareo gny misanga eto mandrisy gny andro raiky?' ⁷ Ho izy reo taminazy ho:'Sy misy olo magnakarama zahay.' Ho izy tamin'ereo ho:'Andrareo avo koa mandehana agny amy tanim-boloboko.' ⁸ Gny fa avy gny hariva,dra nizaka tamy mpitandrin-draharahany gny toponigny tanim-boloboky ho:'Tokavo reo piasa dra haloavo gny karaman'ereo,manomboky laha tamy farany magnygny amy volohany.' ⁹ Gny fa avy reo piasa ze nala tamy lera faharaiky ambiny folo,dra nahazo denaria kirairaiky aby ereo. ¹⁰ Gny fa avy reo piasa volohany,dra nihevisy fa ahazo mihoasy ereo,kanefa ereo avo koa dra nahazo dinaria kirairaiky aby. ¹¹ Gny fa nahazo gny karamany ereo,dra nitaray momba gny topon-tany ereo. ¹² Ho izy reo ho:'Reo piasa farany reo dra niasa lera raiky avo,nefa dra nampitovizinao taminay ereo,zahay ze nisaka gny vesasy gny totolo andro vo niharisy taninandroky.' ¹³ Fa namaly gny topon-tany dra nizaka tamy raiky tamin'ereo ho:'Ry sakaiza,sy manao ze sy mety aminao zaho.Sy denaria raiky seky gny nifagnarahanao taminahy? ¹⁴ Rambeso ze anao dra zory gny lalanao.Zaho dra nifily gny hagnome ho an'ereo piasa nikarama farany manahaky gny anao avo. ¹⁵ Sy mana-zo hanao araky ze tiako amin'izay anahy seky zaho?Sa mialo se andrareo satria malala-tagna zaho?' ¹⁶ Dra gny farany dra ho volohany,dra gny volohany ho farany.''[ Fagnmariha: Gyn dika-zaka taloha soa indrindra dra mangalaky gny ho:''Maro gny nitokavy fa keliky gny voafily.''] ¹⁷ Raha hiala ho agny Jeresalema Jesosy, dra nangalaky gny ro ambiny folo teo agnilany Izy,dra tegny an-dala Izy nizaka tamin'ereo ho: ¹⁸ ''Indro,hiakasy ho agny Jeresalema isika,dra gny Zanak'olo dra hanolosy eo amy loha gny mpisoro vo reo mpanora-dala.Izy reo dra hagnameloky anazy ho maty ¹⁹ dra hanolosy Anazy amin'ereo Zetilisa ba hiomeheza, ho tera,dra hanomboha Anazy amy hazofizalia.Fa amy andro fahatelo dra hasanga draiky Izy.'' ²⁰ Laha teo renen'ereo zanadahin'i Zebedio nagnato an'i Jesosy niaraky tamin'ereo zanadahiny. Nandohaliky teo anatrehany izy dra nangataky raha laha taminazy. ²¹ Hoy Jesosy taminazy ho:''Ino gny irinao?''Ho izy taminazy ho:''Mandidia ba hipetrahan'itaho zanako ro lahy tahoky,gny raiky eo an-tagnano ankavana dra gny raiky ro an-tagnanao ankavia,ao amy fazakanao.'' ²² Fa Jesosy namaly dra nizaka ho:''Sy fatasindrareo gny raha angatahindrareo. Afaky gny hino gny kapoaky ze ho nomiko se andrareo?''Namaly ereo ho:''Afaky zahay.'' ²³ Ho Izy tamin'ereo ho:''Hino gny kapoako tokoa andrareo.Fa gny hipetraky veo an-tagnako ankavanako vo ankaviako dra sy azarako gny magnome,fa an'ereo ze fa nomanigny Rako.'' ²⁴ Gny fa nahare anizay reo mpianasy folo lahy hafa,dra ory fatrasy tamin'ereo mpirahalahy ro. ²⁵ Fa Jesosy nitoka anazy reo hagneo aminazy dra nizaka ho:''Fatandrareo fa reo mpanapak'ireo Zetilisa dra hagnalaibe anazy reo,dra gny lelahy mana-dazan'ereo dra hapiasy gny fahefany eo amin'ereo. ²⁶ Fa sy tokony ho manahaky anizay gny amindrareo.Mifanohisy amin'izay ,dre iza dre iza magniry gni ho lasa lahibe amindrareo dra sy maisy ho mpanompondrareo, ²⁷ dre iza dre iza magniry gny ho volohany eo amindrareo dra sy maisy ho panopondrareo, ²⁸ tahaky gny Zanak'olo sy avy ho topo,fa ho avy hanopo,dra hagnome gny ainy ba ho vilim-pagnavosy ho agny maro.'' ²⁹ Raha niboaky laha tagny Jeriko ereo,dra vahoaky maro gny nagnaraky Anazy. ³⁰ Nisy lelahy poaky ro nipetraky teo amoron-dala.Gny fa nahare fa miriosy Jesosy,dra nikoraky fatrasy ereo ho:''Topo,zanak'i Davida ,mamindra fo aminay''. ³¹ Nagnahy anazy gny vahoaly,nizaka anazy reo ba hangy,kanefa vao maiky ereo nitokatoka fatrasy ho:''Topo,zanak'i Davida ,mamindra fo aminay.'' ³² Lala teo Jesosy nizano dra nitoka anazy reo sady nizaka ho:''Ino gny irindrareo ho ataoko amindrareo?'' ³³ Ho izy ereo taminazy ho:''Topo,ba hahrasy gny masonay'' ³⁴ Laha teo Jesosy,nangoraky, dra nisampa gny mason'ereo.Dra avy dra nahirasy ereo dra nagnaraky Anazy.