¹ Tamin'izay fotoa zay avo dra avy teo amin'i Jesosy mpianany dra nizaka ho:''Iza gny lahibe indrindra agny amy fazaka gny lagnisy?'' ² Jesosy nitoka zaza masaiky ho eo aminazy,nametraky anazy teo amin'ereo, ³ dra nizaka ho:''Zakako mary amindrareo,fa raha sy miova manahaky reo zaza masaiky andrareo, dra sy hisy hevisy gny hilindrareo agny amy fazaka gny lagnisy. ⁴ Noho zay,dre iza dre iza manolo-vata manahaky gny zaza masaiky itiho dra lahibe indrndra izy agny aminigny Fazakanigny lagnisy. ⁵ Dre iza dre iza mandramby gny mota manahaky anizao amy agnarako dra mandramby Anazy. ⁶ Fa dre iza dre iza mahavy gny raiky amin'ireo mota tahoky ze mino Anahy hanota,dra ho soasoa ho anahy gny hiatognanigny fikosoham-bary lahibe eo amy vozony,dra haletiky agny amy ranomasy laliky izy. ⁷ Loza ho an'izao totolo zao nohony gny fotoany gny fanafitohigna!Fa taliavy gny ahavy anizay fotoa zay,nefa loza ho agny olo ze niavian'izay fotoa zay! ⁸ Raha miteraky fanafitohigna ho anao gny tagnanao dre gny tombonao,dra tapaho zay dra alao eo aminao. Soasoa ho anao gny milisy kilemay dre mandringa agny amy fiaigna mandrakizay noho gny ho levo agny aminigny afo sy mety maty amy fanagna tagna ro na tomboky ro. ⁹ Raha miteraky fanafitohigna ho anao gny masonao raiky,homboty zay dra alao aminao eo. Soasoa ho anao gny milisy agny amy fiaigna mandrakizay miaraky amy maso ila noho gny ho levo agny aminigny afo sy mety maty miaraky amy maso ro. ¹⁰ Tandremo sy hanao sinosino reo zaza maliniky reo andrareo.Fa mizaka amindrareo Zaho fa agny an-dagnisy reo azeliny dra magnety avo gny endriky gny rako ze agny an-dagnisy . ¹¹ [ Fanamarigna: Gny dika-zaka taloha soa be dra sy ahita gny fehezateny ze miseho manahaky gny v.11.ho:''Fa gny Zanak'olo dra avy ba hamozy ze levo.''] ¹² Ino gny eriserindrareo? Raha misy mana agn'ondry zato,dra mandeha aminigny tokony sy handehany gny raiky amin'ireo,dra sy hagnenga gny sivy amby sivifolo eo amy avoa se izy dra andeha hitalia gny raiky ze nandeha aminigny tokony sy andehanany? ¹³ Raha hitany zay,dra zakako mary amindrareo,fa mifaly amin'izay mihoasy noho reo sivy amby sivifolo ze sy levo amy lala-diso izy. ¹⁴ Manahaky anizay avo ko,sy sitrany gny Randrareo agny an-dagnisy gny hahalevo gny raiky amin'ireo maliniky reo. ¹⁵ Raha manota aminao gny rahalahinao,mandehana dra zakao anazy gny hadisoany,aminao izy raiky avo.Raha miteno anao izy ,dra hifakahazo amy rahalahinao draiky anao. ¹⁶ Kanefa raha sy miteno anao izy,dra mangala raiky na ro hafa miaraky aminao,amin'izay ba amy vavan'ereo vavolombelo ro dre telo gny ahafaha magnamary gny zaka aby. ¹⁷ Dra raha manda gny hiteno anazy reo izy, dra zakao amy fiangona gny raha misy.Raha sy mety hiteno gny fiangona avo koa izy,dra angao izy hanahaky gny zetilisa vo gny mpamory hetra. ¹⁸ Zakako mary amindrareo ,dre ino dre ino fehezindrareo etiho an-tany dra ho fehizindrareo agny an-dagnisy; dre ino dre ino avelandrareo eto an-tany dra ho voavela agny an-dagnisy. ¹⁹ Dra bo zakako amindrareo draiky ho:''Raha misy ro amindrareo mety eto an-tany gny amin'izay ze angatahan'ereo,dra ho atao ho anazy reo zay amy alalanigny Rako ze agny an-dagnisy. ²⁰ Fa dre iza misy ro na telo miaraky mivory aminigny Agnarako,dra eo agnevon'ereo eo Zaho.'' ²¹ Laha teo nagnato Petera dra nizaka tamin'i Jesosy ho:''Topo,ipiry hanota aminahy gny rahalahiko dra hamela anazy zaho? Hatramy ipito se?'' ²² Jesosy nizaka anazy ho:''Sy mizaka aminao zaho ho ipito,fa hatraminigny fitopolo ipito. ²³ Noho zay gny fazaka gny lagnisy dra mitovy amy pazaka raiky ze tehifandamy ara-bola miaraky amin'ereo mpanompony. ²⁴ Raha vao nanomboky gny fandamina izy,dra nisy panopo raiky nandesiny teo aminazy ze nanagnany taleta raiky . ²⁵ Nefa sy nana fomba handoava anizay izy,dra nandidy gny hamarota anazy gny topony,miaraky amy valiny vo reo zanany dra ze hanagnany aby,dra ho vita gny fandoava-trosa. ²⁶ Noho zay dra nihondriky gny mpanompo,dra nandohaliky teo alohany,dra nizaka ho:Topo,managna fahareta aminahy ,dra haloako aminao gny raha iaby.' ²⁷ Noho zay gny topon'izay panopo zay,dra omeny,dra nagnafaky anazy dra nagnenga gny trosa taminazy. ²⁸ Fa niboaky io panopo io dra nahita gny raiky tamin'ereo piara-manopo aminazy,zay nanagnany dinaria zato. Nisamboriny izy ,nirambesiny tamy vozony,dra nizaka ho:'Avaho aminahy ze nitrosanao.' ²⁹ Nefa niondriky io piara-manopo aminazy io dra nandohaliky taminazy,nanao ho:''Mahalignasa anahy,dra haloako aminao zay.'' ³⁰ Kanefa nanda gny panopo volohany. Mifanohisy amin'izay, nandeha izy dra nataony tagny ampigadra gny piara-manopo aminazy mandra-pahaloany ze nitrosany. ³¹ Gny fa nahita ze niseho reo piara-manopo aminazy,dra nalahelo vatany ereo. Nandeha dra nizaka taminigny Topony iaby ze niboaky ereo. ³² Laha teo nitoka anazy gny topon'io panopo io,dra nizaka anazy ho:''Ianao ry panopo rasy fagnahy,nagnenga gny trosa iaby taminao zaho satria anao nandohaliky taminahy. ³³ Sy tokony hana famindram-po amy piara-manopo aminao seky anao,manahaky gny nanagnako famindram-po taminao?' ³⁴ Ory gny topony dra ninday anazy tagny amin'ireo papizaly mandra-pahaloany ze nitrosany iaby. ³⁵ Manahaky anizay avo koa gny ho ataony Rako agny an-dagnisy amindrareo,raha sy magnenga gny rahalahiny aminigny fony gny kirairaiky aby andrareo.''