¹ Tamin'izay andro zay,nisy olo sasany teo nizaka taminazy gny momba reo Galiliana ze gny lion'ereo gny nafangaron'i Pilato tamin'gny sorony manoka. ² Namaly Jesosy dra nizaka tamin'ereo ho:''Andrareo se mieriserisy fa gny Galiliana reo dra mpanota mihoasy noho reo Galiliana hafa aby satria nizaly tahaky anizay? ³ Aha,Zaho mizaka andrareo. Fa raha sy mibebaky andrareo,aby dra ho maty tahaky anizay. ⁴ Dre io olo valo ambinifolo tao Siloama ze nilavoany fiangona dra nahafaty anazy reo, mieriserisy se andrareo fa tena mpanota rasy mihoasy noho reo lelahy hafa tao Jerosalema io? ⁵ Aha,ho zaho. Fa andrareo raha sy mibebaky, andrareo aby avo koa dra ho maty.'' ⁶ Jesosy nanao zao fagnohara zao ho:''Nisy olo nana hazon'Aviavy raiky namboleny teo amy tanim-bolobony vo avt izy dra nagnety tegna-kazo teo aminazy nefa sy nahita dre ino dre ino. ⁷ Gny lelahy dra nizaka tamin'gny mpanao zaridaina ho:'Indro, avy teto zaho nandrisy gny telo taona dra niezaky nitalia tegnany tamin'itiho hazo aviavy itiho kanefa sy nahita mihisy. Tapao io. Nanao akory io gny anga manimba gny tany?' ⁸ Namaly gny mpanao zaridaina dra nizaka ho:''Angao ho eo aloha amin'itiho tao itiho mandra-pihaliko magnodidy anazy vo hagnasiako zeziky eo aminazy. ⁹ Raha mamoa izy amin'gny tao magnaraky , soa; fa raha sy zay,dra tapao izy !''' ¹⁰ Dra Jesosy nampianasy tao amin'gny raiky tamin'gny Synagogo nandrisy gny Sabasy. ¹¹ Indro,nisy apela raiky ze nana gny fanahy rasin'gny fahaleme nandrisy gny valo ambinifolo tao teo, dra izy dra nivokoky dra sy nahavita nijoro soa. ¹² Nony nahita anazy Jesosy, dra nitoka anazy dra nizaka ho:''Rapela,afaky amin'gny fahalemenao anao.'' ¹³ Napetrany teo aminazy gny tagnany, vo niaraky tamin'izay dra nitraka gny apela dra nihoby an'Agnahary. ¹⁴ saiky gny mpanapaky gny Synagoga dra ory noho gny fagnasitrana nataon'i Jesosy tamin'gny Sabasy. Noho zay dra namaly gny npanapaky vo nizaka tamin'gny vahoaky ho:''Misy enin'andro ze tokony iasa. Tongava dra sitrana, fa sy amin'gny andro Sabata.'' ¹⁵ Gny Topo namaly anazy dra nizaka ho:''Ry mpiasaravelahisy! Moa se sy samy mamaha gny boriky dre gny agn'ombiny ao amin'gny valany andrareo dra minday anazy hino rano amin'gny Sabasy? ¹⁶ Dra manahaky anizay koa itiho zanakapelan'i abrahama, ze voafehin'i Devoly nandriky gny valo ambinifolo tao itiho, sy tokony ba ho vaha se gny fehiny amin'gny andro Sabata?'' ¹⁷ Gny nizaka anizay raha aby zay Izy,dra megnasy reo aby ze nanohisy Anazy,fa gny vahoaky raiky manotolo dra faly noho reo raha aby malaza nataony. ¹⁸ Dra Jesosy nizaka ho:''Manahaky gny ino gny fazakan'Agnahary, dra manahaky gny ino gny afaky agnoharako anizay?'' ¹⁹ Zay dra manahaky gny voasinapy ze nalany vo nafafin'gny lelahy raiky teo azaridainany, dra lasa hazo lahibe raiky, dra gny voron'gny lagnisy dra nagnamboasy gny tragnony teo amin'ereo rasany.'' ²⁰ Bo nizaka avo Izy ho:''Ino gny afaky hampitahako gny fazakan'Agnahary? ²¹ Zay dra manahaky gny masirasira ze nalan'gny apela raiky dra nafangarony tamin'gny koba intelon'gny famatara mandra-piparitahany ao agnatin'gny koba aby.'' ²² Jesosy dra nandeha nizaka gny tana vo gny vohisy kirairaiky tegny an-dala magnagny Jerosalema vo nampianasy anazy reo. ²³ Nisy raiky nizaka taminazy ho:''Topo, moa se keliky gny olo gny ho voze?''Dra ho izy tamin'ereo ho:'v 24 Mialia gny hilisy gny vatrangara tery andrareo ,satria, zaho mizaka amindrareo, maro gny te-hisofiky, fa sy ho afaky gny hilisy. ²⁵ Gny fa ndray misanga gny topon-tragno vo magnily gny vatrangara, dra hisanga ao ambaliky eo andrareo dra handondo gny vatrangara vo hizaka ho:''Topo, Topo, apizosoy zahay.'Izy hamaly dra hizaka amindrareo ho:'Sy fatako andrareo dre gny fiaviandrareo.' ²⁶ Dra hizaka andrareo ho:'Nihina vo nino teo agnoloanao zahay,dra anao fa nampianasy tegny an-dalambenay.' ²⁷ Fa Izy dra hamaly ho:'Mizaka amindrareo zaho, sy fatako ze fiaviandrareo. Miala eto aminahy, andrareo mpanao rasy !' ²⁸ Hisy fitomagnia vo fikitroha-nify gny fa indro andrareo mahita an'i Abrahama, Isaka, Jakoba, vo gny mpaminany aby ao amin'gny fazakan'Agnahary, fa ho voaroaky agny ambaliky andrareo. ²⁹ Ereo dra ho avy asignana, andrefa, avarasy, dra asimo dra hipetraky eo amin'gny latabasy gny fazakan'Agnahary. ³⁰ Fatako zao, reo ze sy dra manan-daja gny ho volohany,vo reo ze tena manan-daja gny farany.'' ³¹ Tafarany kelin'izay , nisy Fariseo sasany avy vo nizaka taminazy ho:''Mandehana hilomesa eto satria Heroda dra te-hamono Anao.'' ³² Jesosy nizaka zakao zay amboahaolo zay ho: Indro, zaho mandroaky devoly vo manao fagnasitragna amizao vo maray, vi amy andro fahatelo dra ho trasiko gny tazoko.' ³³ Dre ino dre ino misanga, raha-lahibe aminahy gny manohy amizao , maray, vo gny andromagnaraky, satria vo azo eke gny famonoa gny mpaminany lavisy an'i Jerosalema. ³⁴ ''Ry Jerosalema , ry Jerosalema , ze mamono gny mpaminany vo mitora-bato reo ze nirahy tagny amindrareo. Ipy zaho gny nagniry gny hanango gny zanakindrareo tahaky gny akoho vavy manangona gny zanany ambany elany, kanefa sy nagniry anizay andrareo. ³⁵ Indro,nangany gny tragnondrareo. Izaho dra mizaka amindrareo,sy ho hitanndrareo Zaho ambar-pizakandrareo ho:''Sambasy ze avy amin'gny agnaran'gny Topo.'''