¹ Hoy Yaveh tamin'i Mosesy:''Miresaha amin'ereo mpisoro, reo zanadahin'i Arona ,dra zakao izy reo ho:'Ao sy hisy na raiky amindrareo ka handoto gny vatany ho noho gny amin'ereo zay maty eo amy olony, ² afa-sy reo havany mariny anazy-gny reniny, gny rany, gny zanadahiny, zanakapelany, gny rahalahiny, ³ na gny anabaviny virijyny zay miatehisy aminazy, ambara-panagnany valy-fa mety handoto gny vatany nohony aminazy izy. ⁴ Saiky ao sy handoto gny vatany amy olon-kafa izy ka handoto gny vatany. ⁵ Ao reo mpisoro sy hanarasy gny lohany na hagnarasy reo sisiny volon-bavany, na hitetiky gny vatany. ⁶ Ao ho masy amy Zagnahariny izy ro dra sy hanimbazimba gny agnaran'Agnahary,satria ny mpisoro gny magnome gny fagnatisy hohany ho an'i Yaveh, gny mofo gny Agnaharin'ereo.Noho zay ao ho masy reo mpisoro. ⁷ Ao izy reo sy hanambaly gny ampela ze mpivaro-tena vo maloto, dra ao sy hanambaly ampela nisara-baly izy reo, satria izy reo dra voatoka ho agny Zagnaharin'ereo . ⁸ Hatokandrareo izy, satria izy gny manolosy mofo ho an'Agnaharindreo.Ao ho masy amindrareo izy, satria Zaho , Yaveh zay magnamasy andrareo, dra masy. ⁹ Gny zanakapelany mpisoro zay mandoto gny vatany amy fahalasana ho mpivaro-tena mangakara gny rany .Dra ao ho oroa izy. ¹⁰ Zay mpisorom-be eo amin'ereo rahalahiny , zay fa nandraraha dililo fagnosora teo amy lohany, dra zay fa nohamasy hiakazo gny ankazo voatoka ho agny mpisorom-be , dra ao sy hampisarakorako gny volony na haniasy gny ankazony. ¹¹ Ao sy handeha egny amin'izay misy fatin'olo izy ka handoto gny vatany, na gny rany na gny reniny avo. ¹² Ao gny mpisorom-be sy hagnenga gny farisy gny fitoera masy gny tabernakely na hanimbazimba gny fitoera masin'Agnahariny, satria fa nohamasy ho mpisorom-be tamy alalany fagnosora gny dililo gny Zagnahariny izy.Zaho gny Yaveh. ¹³ Ao gny mpisoro hangalaky valy virijiny. ¹⁴ Ao izy sy hanambaly mpinday vata, ampela nisara-baly, na ampela mpivaro-tena.Sy hanambaly anizay karaza-napela zai izy.Virijiny laha tamy olony avo gny azony valiany, ¹⁵ ka sy handotoany gny zanany eo amy vahoakiny, satria Zaho gny Yaveh, gny nagnamasy anazy.''' ¹⁶ Hoy Yaveh tamin'i Mosesy, nanao ho: ¹⁷ ''Miresaha amin'i Arona dra zakao anazy ho:'Zay aby mana handrany ara-bata amy taranakindrareo vo gny fara mandimbin'ereo, dra ao izy sy hagnato ka hanolosy hany ho agny Zagnahariny. ¹⁸ Ao sy hagnato an'i Yaveh gny olo aby zay mana handrany ara-bata, manahaky gny olo poaky sy afa-mandeha , zay sola tarehy na sembana, ¹⁹ gny olo zay manan-takaisy gny tagnany na tombony, ²⁰ gny olo zay misy votany ao andamosiny na kaozatina na bory,na olo misy takaisy gny masony, na misy arety, na areti-maso, lagaly, na ze vihy fa torotoro. ²¹ Sy misy olo eo amy taranak'i Arona mpisoro mana handrany ara-bata ka hagnariny ba hagnatateraky gny fagnatisy atao amy afo ho an'i Yaveh.Gny olo mana handrany ara-bata manahaky zay;dra ao izy sy hagnariny ka hanolosy mofo ho agny Zagnahariny. ²² Afaky mihina gny sakafon'Agnahariny izy, na gny sasany amin'ereo masy indrindra na sasany amin'ereo masy. ²³ Na zay avo, ao sy hilisy agnatiny lamba fanakona na hagneky gny alitara izy, satria manan-kandrany ara-bata izy, ba sy mandoto gny toerako masy , satria zaho gny Yaveh, zay magnamasy reo.''' ²⁴ Ka noresahan'i Mosesy tamin'ereo zanadahiny vo reo zanak'Israely aby.