¹ Joda, panopon'i Jesosy Kristy raiky, rahalahin'i Jakoba, ho anireo ze atao ho, malala ao amin' Andriamanitra gny Ray, Vo voatahiry ho an'i Jesosy Kristy: ² Hapitombo ho amindrareo anie gny famindra-po vo gny fedagna dra gny fitiava. ³ Ry malala, Raha gny nanao ezaky aby hanorasy ho andrareo gny mahakasiky gny famozena asika igny zaho, dra nanorasy ho andrareo zaho, dra nanorasy ho andrareo zaho ba handrozy andrareo hialy fatrasy ho anigny finoa ze fa natolosy indray mandeha ho anireo pino. ⁴ Fa ho anigny olo ilany nizezy asokosoka eo amindrareo. Reo dra olo voamariky ho anigny fagnameloha. Reo dra olo rasy fagnahy zay manevateva gny fahasoavan'Agnahaey ho agny amigny fizezozezoa, vo dra manda gny andriana vo gny Topo tokasika, Jesosy Kristy. ⁵ Amizao zaho dra te hapahasiaro andrareo_na dre fa fatandrareo tateraky aza zay_ fa gny Topo dra nagnavosy gny olo boak'ao amigny tany Egypta, fa tafaranizay dra naringany ze sy nino aby. ⁶ Dra reo azely sy nita gny fahefany ze napetraky tamin'iereo, Fa ze nandoa gny fonegnan'ireo _ Zagnahary dra namehy anereo tamigny fehy mandrakizay, ao amigny mezikitroky tateraky, ho amigny andronigny fisara lahibe. ⁷ Manahaky an'i Sodoma vo Gomora vo reo tana magnodidy anereo, ze nanolosy gny vatan'ereo ho amigny fizangazanga vo gny fanova filana sy ara-boazagnahary. Dra natao ohasy amireo ze mizaly amigny fagnasazia agny amigny afo mandrakizay ereo. ⁸ Kanefa manahaky anizay avo koa, reo panofinofy reo dra mandoto avo koa gny vatan;ereo, dra mizaka raha rasy manohisy reo manam-boninahisy. ⁹ Fa na dre Mikaela arikazely aza, gny fa nialy tamigny devoly vo nifandisy taminazy gny amigny fatin'i Mosesy, dra sy nahavany nizaka rasy hasiaky anazy. Fa hoy koa izy: "Hagnasy anao anie gny Topo!" ¹⁰ Fa reo olo reo dra mizaka rasy gny raha rasy sy fatany aby. Dra ze fatany_manahaky gny fahafataranigny biby sy mana-say_izay gny manola anereo. ¹¹ Loza ho anereo! Fa raha nandeha tao amigny tananan'i Kaina ereo, dra nagnaraky gny fahadisoan'i Balama hahazoa tambiny. Dra naringa tao amigny fikomian'i Kora ereo. ¹² Reo dra gny olo ze harambato mivony ao amigny sakafo-pitiavandrareo. Mihina a-pahamegnara, mamisy gny vatan'ereo avo. Ereo dra raho sy misy tegnany_ indro maty, niala fakany. ¹³ Ereo dra ozan-dranomasy mahery mitopatopa mamorivory gny fahamegnaran'ereo. Kitana mirenireny ereo, dra voatahiry ho anazy mandrakizay gny fahametisanigny mezy. ¹⁴ DRa Enoka, gny faha fitin'i Adama, dra fa naminany momba anireo, nizaka ho: "Indro! Ho avy gny Topo miaraky amireo masiny amy harivariva. ¹⁵ Ho avy Izy ba hagnatateraky gny fisara gny olon' aby. Ho avy izy hapiaiky gny olo rasy fagnahy aby tamigny asa vitany tamigny harasia-pagnahy, dra reo zaka fatrasy aby ze nizakanigny olo rasy fagnahy hanohisy anazy." ¹⁶ Reo dra pimonomono, vo pimenimeny, ze magnaraky gny filan-drasin'ereo. Ereo dra pieboebo fatrasy, zay, nohonigny tombosoan'ereo manoka, dra mandoka gny hafa. ¹⁷ Fa handrareo, ry malala, tadidio reo zaka ze nizakan'ireo apostolin'i Jesosy Kristy Toposika faela. ¹⁸ Hoy ereo tamindrareo: "Fa amigny andro farany dra hisy panirasira ze hagnaraky gny filanigny harasia-pagnahy." ¹⁹ Reo olo reo dra mitariky fisaraha. Izy reo dra olo araky gny nofo, dra sy mana gny Fagnahy. ²⁰ Fa handrareo, ry malala, mioregna soa eo amigny finoandrareo masy indrindra, dra mivavaha amigny fagnahy Masy. ²¹ Mitoera handrareo ao amigny fitiavan'Agnahary, dra ligniso gny famindra-pon'i Jesosy Kristy Toposika ze minday anao ho amigny fiegna mandrakizay. ²² Mamindra fo amindrareo ze misalasala. ²³ Vozeo dra tariho hiala amigny afo gny olo ilany. Dra gny ilany ndraiky amindrao fo amitahosy. Malaiky na dre hatramigny akazo nilotonigny nofo aza. ²⁴ Dra ho an'izay miaro andrareo ba sy ho tafitohy, dra hahavy anao hozoro eo agnatrehanigny voninahiny, sy misy signy dra apifalia lahibe, ²⁵ amin'agnahary toka pamozisika tamigny alalan'i Jesosy Kristy Toposika anie, gny voninahiny, gny fahalahibeny, gny fahefany, gny hery, talohanigny fota aby, amizao, dra zisiky mandrakizay. Amen.