¹ Tamizay andro zay, gny fa sy nisy pazaka tao Israely, dra nisy lelahy raiky, Levita, nivahiny tagny amigny farisy lavisy faratapony tamigny tany havoan'i Efraima. Nangalaky apela ho anazy izy, valisindranony boak'agny Betleheman'i Joda. ² Nefa sy toka-po taminazy gny valisindranony; nagnenga anazy rapela dra nihery tagny atragnon-drany tagny Betleheman'i Joda. Nizaho tagny efa-bola izy. ³ Dra niary gny valiny dra nagnaraky anazy ba handresy lahasy anazy holy. Niaraky taminazy gny panopony, vo gny apondra rolahy. Dra nizaka tagny atragnon-drany izy. Gny fa nahita anazy gny babanigny rapela, dra faly izy. Gny Rafozan-dahiny, ⁴ gny babanigny zazapeka, dra nandresy lahasy anazy ba hizano telo andro. Nihina vo nino rano ereo, dra nandany gny hariva tao. ⁵ Nifoha aloha ereo tamigny andro fahaefasy, dra nioma gny handeha izy, kanefa gny babanigny zazapeka nizaka tamigny vinatony lahiny ho: "Tohagno amigny mofo aloha gny vatanao, dra mahazo mandaha handrareo boak'eo." ⁶ Dra nipetraky izy ro dra nindray nihina vo nino rano. DRa hoy gny babanigny zazapela igny ho: "Ba magneke handany gny hariva dra mifalia." ⁷ Gny fa nifoha ba handeha gny Levita, dra nanery anazy hizano gny babanigny zatovovavy, nagnova gny drafiny izy noho zay dra nandry tao ndraiky. ⁸ Tamigny andro fahadimy dra nifoha aloha ba hagnenga izy, fa gny babanigny zazapela igny nizaka taminazy ho: "Tohagno aloha gny vatanao, dra mandignisa mandra-pihilanigny andro." Dra nihina ereo. ⁹ Gny fa niary ba hagnenga gny Levita vo gny valisindranony dra gny panopony, dra nizaka taminazy gny rafozan-dahiny, gny babanigny zazapela igny ho: "Ingo, mandroso miha hariva gny andro. Mizagnona re amizao hariva zao, dra mifalia. Afaky mifoha aloha handrareo maraindray dra mandeha moly." ¹⁰ Fa gny Levita sy vonona gny hitakasy. Niary izy dra nandeha. Nandroso nagnagny Jebosa izy ( Jerosalema zay). Nana apondra nisy lasely rolahy izy_dra nindray taminazy gny valisindranony. ¹¹ Gny fa nagnariny an'i Jebosa ereo, dra fa nandiva hifara gny andro, dra gny panopo nizaka tamigny topony ho: "Ndao, handeha sika hivily ao atagnan'ireo Jebosita dra handry ao amizay." ¹² Hoy gny topony taminazy ho: "Sy hivily amigny tananigny vahiny ze sy isanigny vahoakin'i Israely isika. Handroso ho agny Gibea isika." 13Gny Levita nizaka tamigny tovolahiny ho: "Ndao, handeha isika ho agny amigny raiky amireo toera hafa, dra handany gny hariva agny Gibea na Rama." ¹⁴ Dra nandroso ereo, dra niletiky gny masoandro raha nagnariny an'i Gibea ereo, ao amigny faritanin'i Benjamina. ¹⁵ Nivily tao ereo dra nandry tao Gibea. Nandeha ereo dra nipetraky teo akiazanigny tana, fa sy nisy olo na raiky napetragno anereo gny hariva. ¹⁶ Fa boak'eo dra nisy lelahy atisy raiky noly boaky niasa tagny agnahisy tamigny hariva igny. Boak'agny amigny tany havoan'i Efraima izy, dra nivahiny tao Gidea. Nefa gny olo nitoby teo amigny toera dra Benjamita. ¹⁷ Nipetraky gny masony izy dra nahita gny pandeha boaky lavisy teo akiazanigny tana. Hoy gny lelahy atisy ho: "Ho eza handrareo? Dra boak'eza gny fiaviandrareo?" ¹⁸ Gny Levita nizaka taminazy ho: "An-dala boak'agny Betleheman'i Joda ho agny amigny farisy lavisy faratapony amigny tany havoan'i Afraima, ze niaviako zahay. Nagnagny Betleheman'i Joda zaho, dra handeha ho agny atragnon'i Yaveh, nefa sy hisy olo hapetragno anahy. ¹⁹ Mana mololo vo hany ho anigny apondranay zahay, dra misy mofo vo divay ho anahy vo ho an'ireo panopo apelanao atiky, dra ho anigny tovolahinao miaraky amireo panoponao. Sy misy raha manakosiky anay. ²⁰ Dra nanalama anereo gny lelahy atisy ho: "Ho amindrareo gny fiadagna! Izaho gny hiatoky gny filanao aby. Fa ka mandry eto akiazako avo." ²¹ Ko dra nandesinigny lelahy tagny atragnony gny Levita dra nameny hany reo apondrany. Nanasa gny tragnony ereo dra nihina vo nino rano. ²² Raha bo napifaly gny fony ereo, dra nisy lelahy maromaro tao atana, lelahy sy mendriky, nagnodidy gny tragno, nively gny vatrangara. Nizaka tamigny lelahy atisy, gny topo-tragno ereo, nanao anizahoky ho: "Aboaho gny lelahy ze boak'ato atragno, fa hindray mandry aminazy zahay." ²³ Niboaky gny lelahy igny, topo-tragno, dra nizaka tamin'ereo ho: "Aha, ry rahalahiko, ka manao anizao raha rasy zao topoko! Akory vahiny ato atragnoko io lelahy io, dra ka manao anizao raha faly zao! ²⁴ Ingo, ato gny zanakapelako virziny vo gny valisindranony. Mamela anahy hinday anereo hiboaky amizao. Haolagno vo atovy amin'ereo ze tiandrareo hatao aminazy. Fa ka manao raha faly manahaky anizay amin'io lelahy io!" ²⁵ Kanefa sy niteno anereo gny lelahy igny, dra nisamboriny gny lelahy gny valisindranony dra naboakiny teo amin'ereo izy. Nanambosy anazy ereo, nagnola anazy, dra nagnararaosy anazy nandrisy gny hariva, dra nangan'ereo handeha izy raha vo nangiran-drasy gnandro. ²⁶ Gny fa nangiran-drasy dra avy rapela dra nezera teo am-batrangaranigny tragnonigny lelahy ze nisy gny topony izy, dra nisirara teo izy mandra-pahazavanigny andro. ²⁷ Nifoha gny topony nony mary dra namoha gny vatrangaranigny tragno dra niboaky hanohy gny lalany. Nahita gny vali-sindranony niapasy teo ambatrangara izy, dra gny tagnany teo atokonambatrangara. ²⁸ Dra hoy gny Levita taminazy ho: "Mifohaza, ndao isika handeha." Nefa sy nisy namaly. Nariany teo amigny apondrany izy, dra nandeha holy agny aminazy gny lelahy. ²⁹ Gny fa avy tagny atragnony gny Levita, dra nangalaky asy izy, dra nitakariny gny valisindranony, dra nitetehiny, isa-pamavani-tolany, ho ro ambiny folo tetiky, dra napinday anizay nanera gny Israely aby. ³⁰ Ze nahita anizay aby dra nizaka ho: "Raha bo sy nisy nanao na nahita hatramigny andro niakaran'Israely boak'agny amigny tagny Egypta mandrak'androany zao. Hevero zay! Toroy hevisy zahay! Zakao anay ze tokony hanatao!"