¹ Taloha ela be Zagnahary dra nizaka tamigny razambesika tamigny alalan'ireo paminany tamigny fotoa maro vo tamigny fomba maro. ² Fa amizao andro farany izao, dra nisaraky tamisika tamigny alalanigny zanadahiny Izy, Zay nitendreny ho pandova gny raha aby. Tamigny alalany avo koa gny naharian'Agnahary anizao totolo izao. ³ Izy gny famirapiratanigny voninahin'Agnahary, gny endrikiny gny vatany aby. Na gny raha aby aza dra hazogniny hindray amigny alalanigny herinigny vatany. Tafaranigny nagnaliovany reo fahota, dra nitoby teo ambaninigny tagnan'akavananigny Lahibe agny amigny avo izy. ⁴ Lasa ambony manahaky reo azely Izy, akory gny agnara nilovany dra soa lavisy noho gny agnaran'ereo. ⁵ Fa iza tamireo azely gny ba nizakan'Agnahary ho: "Zanako hanao, zaho lasa babanao androany" Dra indraiky ho: "Ho ray ho anazy zaho, dra izy ho zanako ho anahy"? ⁶ Dra gny fa ninday gny lahimatoa teto amin'izao totolo izao Zagnahary, dra nizaka Izy ho: "Reo azelin'Agnahary aby dra sy maisy midera anazy." ⁷ Momba reo azely dra nizaka Izy ho: "Izy gny raiky nanao reo azeliny ho fagnahy, dra reo panopony nataony lelan'afo." ⁸ Fa mombanigny Zanaky dra hoy Izy ho: "Gny seza fiandriananao, ry Zagnahary, dra mandrakizay dra ho doria. Gny tehinigny fazakanao dra tehinigny fisara. ⁹ Nitia gny fahamarigna hanao dra nalaiky gny fandikan-dalana. Noho izay zagnahary, zagnaharinao, dra nanososy anao tamigny menaky gny hafalia mihoasy noho reo piara-dia aminao." ¹⁰ "Tagny amboloahany, ry Topo, Ianao gny namoro gny fotosy gny tany. Reo lagnisy dra asanigny tagnanao. ¹¹ Ho levo ereo, fa Hanao hanohy. Ho rota manahaky gny tapa-damba ereo. ¹² Hamorisy anereo manahaky gny fekazoa hanao, dra hova manahaky gny poti-damba ereo. Fa hanao dra manahaky anizay, dra gny taonao dra sy hana-pahatapera." ¹³ Fa iza tamin'ireo azely gny nizakan'Agnahary taminigny fotoa ho: "Mipetraha eo amigny tagna akavanako mandra-panovako reo fahavalonao ho seza ho anigny tombokao"? ¹⁴ Moa ra reo azely aby sy fagnahy manopo, vo nalefa hiahy reo ze handova gny famozena?