¹ Paoly, apostoly _sy apostoly boaky amigny olo na tamigny alalanigny olo, fa avy amin'i Jesosy Kristy vo gny Zagnahary Ray, ze nananga anazy tamigny maty _ ² dra reo rahalahy aby miaraky aminahy, ho anireo fengonanigny Galatiana: ³ Fahasoava ho amindrareo dra fedagna boaky amin'Agnahary Rasika vo Jesosy Kristy Topo, ⁴ ze nanolosy gny vatany ho anigny fahotasika ba hahafahany asika amizao andronigny faharasia zao, araky gny sitrapon'Agnaharisika vo Raika, ⁵ ho anazy anie gny voninahisy mandrakizay doria. Amena. ⁶ Gaga zaho ho niala malaky tamigny nitoka andrareo tamigny fahasoavan'i Kristy hadrareo. Gaga zaho fa mitoliky ho amigny filazasara hafa hadrareo. ⁷ Sy midika akory izay fa misy filazasara hafa, fa misy olo mamoro izay minday fikorotagna ho andrareo dra tehagnova gny filazasaran'i Kristy. ⁸ Fa na izahay na azely avy agny an-dagnisy aza gny hitory filazasara hafa amindrareo, dra aoka izy ho voaozo. ⁹ Araky zay nizakanay taloha, dra amizao zaho mizaka ndraiky ho: ''Gny misy olo mizaka amindrareo filazasara hafa noho izay niresindrareo, dra aoka zy ho voaozo.' ¹⁰ Moa se izaho amizao mitalia gny fakatoavan'ny olo sa Zagnahary? Moa se zaho mitalia izay hapifaly gny olo? Gny bo manohy miezaky gny hapifaly olo zaho, dra sy panopon'i Kristy. ¹¹ Fa tiako ho fatasindrareo, ry rahalahiko, fa gny filazasara izay zinakako dra sy filazasaran'olombelo. ¹² Sy nandray izay tamin'olo zaho. na napianary anahy izay. Fa koa, izay dra fagnambaran'i Kristy jesosy taminahy. ¹³ Fa handrareo nahare gny amigny fiegnako taliha tamigny fomba fivavaha Jiosy, vo gny fomnba nagnezehako gny fengonan'i Zagnahary mihoasy gny tokony ho izy dra gny fiezahako handrava izay. ¹⁴ Nandroso tamigny fivavahan'ny Jiosy zaho nihoasy gny maro tamin'ireo nitovy tao taminahy, avy tamin'ireo raiky ferenena taminahy. Manahaky izay gny fomba nihazognako fatrasy reo fomban-drazako. ¹⁵ Kanefa Zagnahary, ze nanoka anahy hatragny atron-dreniko, dra nitoka anahy tamigny alalanigny fahasoavany, ¹⁶ gny fa faly gny haneho gny zanadahiny taminahy, ba hahafahako mitalily anazy agny amigny Jentilisa, dra sy nangalaky say tamigny nofo vo lio zaho. ¹⁷ Sy niakasy tagny Jerosalema ho agny amireo fa lasa Apostoly talohako zaho. Fa nandeha tagny Arabia dra boak'eo nihery tagny Damaskosy Zaho. ¹⁸ Dra telo tafara dra niakasy tagny Jerosalema ba hifakafatasy tamin'i Kefasy zaho dra nizano niaraky taminazy nandrisy gny dimy ambiny folo akoasy an'i Jakoba, gny rahalahinigny Topo. ²⁰ Dra ao amize soratiko ho andrareo, dra magnome toky andrareo zaho eo agnatrehan'Agnahary, fa sy mavandy zaho. ²¹ Boak'eo zaho dra nandeha tagny amigny faris'i Syria vo Kilikia. ²² Sy bo fatasy teo amireo fengonan'i Jodia ze ao amin'i Kristy zaho. ²³ Ren'ereo avo ze voazaka ho: "Gny lelahy ze nagneziky asika faela dra zinaka gny finoa ze niezahany nipotehi taloha." ²⁴ Noho izay ereo dra nidera an'Agnahary noho gny aminahy.