² Reo teratany dra sy nagnome hasoa-fagnahy sotra taminay avo, fa nandrehisy afo ereo dra napandroso anay aby , nohonigny oram-be vo hasiaky. ³ Fa gny fa nanango hita vo nametraky anizay teo amigny afo Paoly, dra nisy menarana niboaky nohonigny hafana, vo nifehy tamigny tagnany. ⁴ Gny fa nahita gny biby nihato teo amigny tagnany reo teratany, dra nifapizaka ereo ho: "Tena pamono olo ze nienga boak'agny andranomasy io lelahy io, gny rariny dra sy tokony ho velo izy." ⁵ Fa boak'eo nagnozongozo gny biby ho agnaty afo izy nefa sy narasy. ⁶ Nandigny anazy ba ho voanigny tazo na ho maty tapoky ereo. Fa gny fa boaky nagnety anazy maharisy ereo dra nahita fa sy nisy raha sy mahazasy nazo anazy, dra niova hevisy ereo vo nizaka fa izy dra zagnahary. ⁷ Dra tamigny toera mariny teo nisy reo tany ze anigny lelahy lahibenigny nosy, lelahy atao i Poplio zay. Nitakasy anay izy vo nagnome hany anay tamigny hasoa-fagnahy nandrisy gny telo andro. ⁸ Gny baban'i Poplio dra nararinigny tazo vo mivala lio. Gny fa nagnagny aminazy i Paoly, dra nivavaky izy, nametraky gny tagnany teo aminazy, vo nagnasitra anazy. ⁹ Tafaranigny nitrangan'izay, dra nagnato anazy avokoa gny ambinigny vahoaky aby ze narary teo amigny nosy dra nisitrany. ¹⁰ Gny vahoaky avo koa dra nagnome voninahisy anay tamigny voninahisy maro. Dra gny fa nioma handeha hitikisy sambo zahay, dra nagnome anay ze nitaliavinay ereo. ¹¹ Afaka telo vola zahay dra nandeha niondra tamigny sambo nizano tao amigny nosy nandrisy gny ririny, sambon'i Aleksandria, misy"' sarikamban'agnahary" eo anoloanigny sambo. ¹² Gny fa avy tamigny tanan'i Sirakosa zahay, dra nitoby tao nandrisy gny telo andro. ¹³ Niala boak'eo zahay gny nitikisy sambo tagny amigny tanan'i Regioma. Dra gny fa afaky andro raiky dra nisy rivosy nisioky boak'agny asimo, dra ro andro zahay vo niavy a tanan'i Potioly ao. ¹⁴ Tao gny nahitanay gny rahalahy ilany vo nanasa anay ba hizano hiaraky amin'ereo mandrisy gny fito andro. Tamigny alalan'izay gny nahavianay a Roma agny. ¹⁵ Boak'egny reo rahalahy, tafaranigny naharezan'ereo gny momba anay, dra avy niseza anay hatregny amigny senan'i Apio vo reo tragnom-bahiny telo. Gny fa nahita gny rahalahiny Paoly, dra nisaotra an'Agnahary izy dra nahazo hery. ¹⁶ Gny fa nilisy tao Roma zahay, dra nahazo lala hira-hiay amireo maramila niamby anazy i Paoly. ¹⁷ Dra gny fa afaky hateloa tafaranizay dra napitoka gny lelahy vo gny petarky teo amigny Jiosy rei i Paoly. Gny fa niaraky avy ereo, dra nizaka tamin'ereo izy ho: "Ry rahalahy, na dre sy nanao raha rasy tamigny olo na gny fomban'ireo razambesika aza zaho, dra natolosy ho gadra ta Jerosalema agny teo atagnanigny Romana. ¹⁸ Gny fa boaky nagnadihady anahy ereo, dra nagniry gny hamono anahy, akory sy nisy atony tokony hapigadra anahy na hovono. ¹⁹ Fa gny fa gni nahisy gny fagnirian'ereo gny Jiosy, dra voatery zaho napitoka an'i Kaisara, na dre sy manahaky gny ho ninday fiapanga hanohisy gny fireneko aza. ²⁰ Nohonigny tokako, dra nangataky gny hahita andrareo vo hizaka amindrareo zaho. Izay dra nohonigny fahatokian'Israely momba gny fahamatora anahy amity ravaky tihoky. ²¹ Boak'eo dra nizaka taminazy ereo ho: "Bo sy nahare gny taratasy momba anao boak'a Jodia agny zahay, na na gny rahalahy avy vo nitatisy na nizaka raha rasy momba anao. ²² Fa tianay ho re aminao gny eriserisao momba anizay sekta zay, akory fatasay fa rasy laza egny amigny maro egny zay. ²³ Gny fa nisafidy andro ho anereo reo, dra maro kokoa reo olo nagnato anazy tagny amigny tragno nivahiniany. Napahafatasy gny raharaha tamin'ereo izy, dra nizoro vavolombelo mombanigny fazakan'Agnahary. Niezaky nandresy lahasy anereo gny momba an'i Jesosy izy, na tamigny alalan'i MOsesy zay na tamigny alalanigny paminany, nanomboky maraindray dra hatramigny hariva. ²⁴ Gny ilany dra resy lahasy tamireo raha ze nizakany, gny hafa koa dra sy nino. ²⁵ Gny fa synifagnaraky ereo, dra lasa tafaranigny nitalilian'i Paoly ty zaka raiky tihoky ho: "Gny Fagnahy Masy dra nizaka soa reo razandrareo tamigny alalan'Isaia paminany. ²⁶ Hoy izy ho: "Mandehana agny amireo vahoaky reo vo zakao ho: "Amigny fitenoa haharezandrareo, fa sy hahatakasy; vo amigny fahita gny hahitandrareo, fa sy hahita. ²⁷ Fa nihadoto gny fon'ireo olo reo, dra sorasy amigny sofin'ereo gny hahare, dra nanapiky gny masony ereo. Fa gny sy zay dra mety afaky hahita amigny masony ereo, dra hahare amigny sofiny, vo hahatakasy amigny fony dra hihery ndraiky, dra hagnasitra anereo zea."' ²⁸ Noho izay, Tokony ho fatandrareo fa ze famezen'Agnahary zay dra nalefa tamireo Jentilisa, dra hiteno ereo." ²⁹ (Fagnamariha egny amigny farany ambaninigny pezy: Asa 28-29- Gny atotataratasy ilany dra mana gny andininy. 29 ho: "Gny fa niteno reo raha reo izy, dra lasa gny Josy. Nisy fifandira lahibe teo amin'ereo.") ³⁰ Paoly dra niay nandrisy gny ro tao magnizisy tao amigny tragnony nihofa manoka, dra nitakasy ze tao aminazy izy. ³¹ Nagnambara gny fazakan'Agnahary izy dra napenariny reo raha momban'i Topo Jesosy Kristy tamigny fahavania. Dra sy nisy nanaka izy.