¹ "Ry rahalahy vo ry ray, tenoy gny ferovako ze hataoko aminadrareo amizao." ² Gny fa nahare an'i Paoly nizaka tamigny zaka Hebreo reo vahoaky, dra lasa sinizaka ereo. Hoy izy ho: ³ " Joisy zaho, teraky tagny Tarsosy agny Kilikia, fa nilahibe teto amity tana tihoky eto teo amigny tombok'i Gamaliela. Napenary araky gny fomba hetisy gny lalanireo razasika zaho. Tena mafana fo hoan'Agnahary zaho, manahaky andrareo aby amizao andro izao. ⁴ Nagneziky io lalana io ho amigny fahafatesa zaho, namotosy vo nanolosy anereo hatao atragno mezy na lahy na vavy. ⁵ dra gny pisorombe vo gny loholon'aby dra afaky mizoro vavolombelo. Nahare taratasy boak'agny amin'ereo zaho ho anigny rahalahy agny Damaskosy, dra nandeha nagnagny ninday anazy reo nihery bo mifehy hagna Jerosalema ba hagnasazia anereo. ⁶ Izao gny niseho gny fa nandeha vo nagnariny anigny Damasoky zaho, dra tamigny mitataovovogna teo ho eo dra nisy hazava lahibe boak'agny andagnisy nanomboky namirasy nagnodidy anahy. ⁷ Lavo tamigny tany zaho dra nahare feo nizaka taminahy ho: 'Saoly, Saoly, nagnino hanao magneziky anahy io?' ⁸ Namaly zaho ho: 'Iza moa hanao io, Topoko?' Nizaka taminahy Izy ho: 'Izaho Jesosiny Nazareta, ze ezehinao io.' ⁹ Reo ze niaraky taminahy dra nahita gny hazava, fa ereo dra sy nahafatasy gny feony ze nizaka taminahy. ¹⁰ Hoy zaho ho: 'Ino gny tokony hataoko, Topoko?' Gny Topo nizaka taminahy ho: 'Misangana vo midira a Damaskosy agny; agny gny hizaka anao gny raha aby ze tokony hataonao.' ¹¹ Sy nahita nohonigny famirapiratan'izay fahazava zay zaho, dra nitataranireo ze nagniraky taminahy, dra avy tagny a Damaskosy zaho. ¹² Nihao tamigny lelahy raiky atao i Ananiasy tagny zaho, lelahy matahosy an'Agnahary nagnaraky gny lalana vo soa laza teo amireo Jiosy aby ze nitoby tao. ¹³ Nagnato anahy izy, nizoro teo agnilako eo, dra nizaka ho: 'Ry rahalahy Saoly, mahirata.' Tamizay ora zay dra nahita anazy zaho. ¹⁴ Dra nizaka izy ho: 'Gny Zagnaharin'ireo razasika dra nifily anao ba hahay gny sitrapony, ba hahita gny raiky Mary, dra nahare gny feo aloaky gny vavany. ¹⁵ Fa ho vavolombelo ho anazy amigny olon'aby momba ze hitanao vo renao hanao. ¹⁶ Dra magnino hanao gny mandigny? Misangana, aoky hatao batisa, vo liovy reo fahotanao, mitokava amigny agnarany." ¹⁷ Gny fa boaky nihery ta Jerosalema agny zaho, dra bo nivavaky tao atepoly, vo nagnonofy zaho. ¹⁸ Nahita anazy zaho nizaka taminahy ho: 'Miala a Jesalema ao malaky, fa ereo sy magneky gny fizoroanao vavolombelo momba Anahy.' ¹⁹ Hoy zaho: 'Topo, ereo dra mahafatasy fa izaho nagnagadra vo nazera reo ze nino anao tao amigny synagoga aby. ²⁰ Gny fa nalasaky gny lion'i Stefana vavolombelo, izaho koa dra ba nisanga teo vo nagneky, dra niamby gny fekazon'ireo ze namono anazy zaho.' ²¹ Fa nizaka taminahy izy ho: 'Mandehana, akory halefako lavisy anireo Jentilisa hanao."" ²² Niteno anazy ereo mindra-pizakany anizay. Dra nihiaky fatrasy ereo vo nizaka ho: "Vonoy hiala eto amity tany tihoky gny lelahy manahaky anio, akory sy mendriky gny ho velo izy." ²³ Gny fa narevoky ereo, nagnary gny akazony, dra nagnary botany tamigny sioky, ²⁴ gny lahibenigny kapiteny dra nandidy an'i Paoly ba handesy agny amigny lapa. Izy nandidy fa tokony hadigny miaraky amigny zera izy, ka ba izy vatany avo gny tokony hahay ho nagnino ereo nanohisy anazy manahaky anizay io. ²⁵ Gny fa namehy anazy tamigny kofehy holisy ereo, dra hoy Paoly tamigny kapiteny ze nisanga teo: "Ara-dalana ho andrareo ra gny manakaravasy lelahy ze Romana vo sy bo nisa koa? ²⁶ Gny fa nahare anizay gny kapiteny, dra nagnagny amigny lahibenigny kapiteny izy dra nizaka anazy, nizaho ho: "Ino raha ataonao zao? Fa poninigny Romana lelahy hoky io." ²⁷ Nagnato gny lahibenigny Kapiteny, vo nizaka taminazy ho: "Zakao anahy, poniny Romana ra hanao io?" Paoly namaly ho: "Eh." ²⁸ Dra namaly gny lahibenigny kapiteny ho: "Tamigny vola be avo gny nahazoako io zopirenena io. Fa i Paoly nizaka ho: "Nateraky ho poniny Romana zaho." ²⁹ Dra nagnenga anazy teo no ho eo gny lelahy nametra-pagnotania aminazy igny. Natahosy avo koa gny lahibenigny Kapiteny, gny fa fatany fa poniny i Paoly, akory izy namehy anazy. ³⁰ Gny maraindray, te hahay gny mary momba reo fagnendrikendrehan'ireo Jiosy nanohisy an'i Paoly gny lahibenigny kapiteny. Dra vihahany gny fehi vo nibekony gny pisorombe vo reo fila-kevisy aby ba hivory izy. Dra ninday an'i Paoly nizoso izy dra nametraky anazy teo agnevon'ereo.