¹ Noho avy gny andrnigny Pantekosta, niango tamigny toera raiky ereo aby. ² Topoko teo avy agny andagnisy nisy feo manahaky gny rivosy mahery nifofofofo, dra nagnome gny tragno manotolo ze nipetrahan'ereo zay. ³ Nisy afo niendriky lela maro ze nizarazara, dra nipetraky teo agnabon'ereo, dra nipetraky teo agnabon'ereo sirairay aby. ⁴ Izy aby dra feno gny Fagnahy Masy dra nanomboky nizaka tamigny fizaka maro samy hafa, araky gny namenigny Fagnahy Masy hizakan'ereo. ⁵ Dra nisy Jiosy ze nipetraky tao Jerosalema, olon'Agnahary, boaky amigny firenena aby ambaninigny lagnisy. ⁶ GNy fa nahare feo zay, dra avy niaraky reo vahoaky sady sahira-say akory gny sirairay dra samby nahare anereo nizaka tamigny fizakany aby. ⁷ Ereo dra talazo vo gaga; nizaka ho: "Mary, fa sy reo mizaka aby reo ra gny Galileanina? ⁸ Nagnino gny mahare anereo sika, amigny fizakasika aby ze naha lahibe asika? ⁹ Partianina vo Medianina dra Elemita, dra reo ze mipetraky agny Mesopotamia, agny Jodia vo Kapodokia, agny Ponto vo Asia, ¹⁰ Frygia vo Pamfylia, agny Egypta dra Libya hatragny amin'i Kyrena, dra reo pisiliky boaky agny Roma, ¹¹ Jiosy vo Proselyta, Kreatana vo Arabo, dra resika mizaka amigny fizakasika momba gny asa lahibe ataon'Agnahary." ¹² EReo dra gaga vo sahira-say; dra nifapizaka ereo ho: "Ino gny dikan'izay?" ¹³ Fa reo ilany naneso sady nizaka ho: 'EReo dra mamonigny divay vaovao." ¹⁴ Fa i Petera nisanga niaraky tamin'izy Raiky ambiny folo, napiakasy gny feony, dra nizaka tamin'ereo ho: "RY lelahin'i Jodea vo handrareo aby ze mipetraky eto Jerosalema, aoky ho fatandrareo zao, tandremo reo zakako. ¹⁵ Ho an'ireo olo sy mamo araky ze heverinao, fa vo ora fahatelo amigny andro zao. ¹⁶ Fa izao gny voazaka tamin'i Joela paminany: ¹⁷ 'Amigny andro farany,' Zagnahary mizaka ho: 'Halasako amigny olon'aby gny fagnahiko. Reo zanadahindrareo vo gny zanakapelandrareo dra haminany, gny zatovondrareo dra hahita fahita, dra gny ati-dahy hagnonofy. ¹⁸ Manahaky anizay koa gny amireo panopoko lahy vo gny panopoko apela amireo andro reo. Halasako gny Fagnahiko, dra ereo haminany. ¹⁹ Izao dra haneho raha-mahagaga egny amigny lagnisy ambony vo famata egny amigny tany ambany, lio, afo, dra eto-setroky. ²⁰ Gny masoandro dra ho lasa mezy dra gny vola ho lasa lio, melohanigny andro lahibe vo miavaky hiavianigny Topo. ²¹ Dra gny olon'aby ze mitoka gny agnaran'Agnahary dra ho voavozy. ²² Ry olon'Israely, tenoy izao zaka zao: Jesosy boaky agny Nazareta, gny olo nanehoany andrareo tamigny alalan'Agnahary ba ho mary amireo asa lahibe, reo fahagaga, dra reo famatara ze nataon'Agnahary taminazy teo agnevondrareo, araky gny fatasigny vatandrareo. ²³ Io lelahy io dra natolosy gny drafisin'Agnahary ze fa nomany meloha vo gny fahalala, dra gny vatanigny pandika lalana vo handrareo, namono anazy tamigny famasika anazy teo amigny hazo fizalia. ²⁴ Fa Zagnahary nananga anazy, nagnafaky anazy tamireo fanaitaigna fahafatesa, akory sarosy ho anazy gny niala tamizay. ²⁵ Fa i Davida mizaka momba anazy ho, "Nahita gny Topo teo anoloako mandrakariva zaho, fa eto atagna-kavanako Izy dra sy tokony hangozohozo zaho. ²⁶ Dra tena faly gny foko dra niravoravo gny lelako. Dra gny nofoko hehery amigny fahatokia. ²⁷ Fa sy ninganao ho agny amigny fiegna-sy hita gny fagnahiko ho lo hanao. ²⁸ Napahafatasy anahy reo lalanigny fiegna Hanao; Hanao dra hameno fifalia anahy amigny endrikao.' ²⁹ Ry rahalahy, afaky mizaka amindrareo apitokia momba an'i Davida Patriarika zaho: Fa maty izy vo nsngsny, dra gny lolo eto amisika mandrak'Androany. ³⁰ Noho izay, paminany izy dra fatany fa niat taminazy Zagnahary, fa gny taranany gny ho eo amigny seza fiandriagna. ³¹ Fa hitany zay dra nizaka mombanigny fisanganan'i Kristy tamigny fahafatesa,' sady izy sy nanga tao amigny fiegna sy hita, gny sy nanao gny nofony ho trasinigny fahalova.' ³² Io Jesosy io- Zagnahary gny nananga anazy, dra vavolombelon'izay zahay aby. ³³ Noho izay gny fa nasandrasy gny tagna-kavanan'Agnahary Izy dra nitakasy gny Fagnahy Masy napanatena boaky amigny Ray, fa narosany zay, ze hitandrareo vo rendrareo. ³⁴ Fa i Davida dra sy niakasy tagny andagnisy, fa izy nizaka ho: 'GNy Topo nizaka tamigny Topoko, "mitoera eto atagna-kavagnako, ³⁵ mandra-panaoko gny fahavalonao ho pisy tombonao."' ³⁶ Noho izay, aoky ho fatasy gny olon'aby gny tragnon'i Israely fa Zagnahary gny nanao Anazy ho Topo vo Kristy, gny Jesosy ze nihombondrareo." ³⁷ Gny fa nahare anizay ereo, voasindro gny fon'ereo, dra nizaka tamin'i Petera vo reo apostoly ambiny ho: "Rahalahy, ino gny tokony hatao?" ³⁸ Boak'eo Petera nizaka tamin'ereo ho: "Mibebaha manova batisa, handrareo aby, amigny agnaran'i Jesosy Kristy ho famela gny fahotandrareo, vo handresandrareo gny fagnomezanigny Fagnahy Masy. ³⁹ Fa gny fapanatena dra ho andrareo vo gny zanandrareo dra vo ze lavisy, dra ho maroreo olo ze ho tokavinigny Topo Zagnahary." ⁴⁰ Niaraky tamigny zaka maro hafa gny nizoroany ho vavolombelo vo nandrisihany anereo; nizaka izy ho, "Vozeo gny vatandrareo amity taranaky rasy fagnahy tihoky." ⁴¹ EReo nitakasy gny zakany dra natao batisa, dra tokony fagnahin'olo teo amigny telo arivo teo ho eo gny napiay tamin'io andro io. ⁴² Nanohy vo nahita gny asa fitoria vo gny fapenaranigny apostoly ereo, teo amigny fanapaha gny mofo vo gny fivavaha. ⁴³ Avy teo amigny fagnahinigny sirairay gny tahosy, dra fahagaga vo famatara maro gny vita tamigny alalanigny apostoly. ⁴⁴ Reo nino dra niangon'aby vo nana raha mitovy, ⁴⁵ dra ereo namarosy gny vatany vo gny fanagnany dra nizara anizay tamin'ereo aby,arakize nitaliaviny aby. ⁴⁶ Dra isan'andro isan'andro dra nitohy nanopo tamigny fomba fagnety mitovy tao atepoly ereo, vo nanapaky gny mofo tao atragno, dra nizara hany tami-pifalia vo fo feno fanetre-tegna; ⁴⁷ Nidera an'Agnahary dra nahazo fakasitraha tamigny olon'aby. Isan'andro gny Topo dra nagnapy gny isanireo ze voavozy.