¹ Dra tamizay tao Ikonioma Paoly vo i Barnabasy nindray nilisy tao amigny Synagoganigny Jiosy dra nizaka tapazotoa dra gny vahoaky marobe Jiosy vo Grika dra nino. ² Fa gny Jiosy ze sy nakato koa dra nagnakorota gny fisianigny Jentilisa dra nahavy anereo hanohisy reo rahalahy. ³ Dra nitoby ela teo ereoo, nizaka apahavania niaraky tamigny herinigny Topo, tamigny nagnomeza porofo mahakasiky gny hafasy gny amigny fahasoavany. Izy nanao anizay tamigny alalanigny famatara vo fahagaga ze natao tamigny alalanigny tagnan'i Poaly vo i Barnabasy. ⁴ Fe seky gny akamaroanigny tana dra nizarazara: gny olo ilany niandany niaraky tamireo Jiosy, dra gny ilany niaraky tamireo apostoly. ⁵ Gny fa nagnandra nandresy lahasy gny pitariky anereo gny Jentilisa vo gny Jiosy ba hamono vo hitora-bato an'i Paoly vo i Barnabas, ⁶ dra nazary nivony ereo dra nienga malaky tao atananigny Lykaonia, Lystra vo Derbe, vo reo tana magnodidy gny farisy, ⁷ dra tagny ereo gny nitalily gny filazasara. ⁸ Nisy lelahy raiky nipetraky ta Lystra ao, malemy gny tombony, bopaky atrondreniny agny, zefa sy nandeha hatramizay. ⁹ Io lelahy io nahare an'i Paoly nizaka. Paoly nagnatriky anazy soa teo amigny masony dra nahita fa mana finoa gny ho sitrany izy. ¹⁰ Ko nizaka taminazy izy tamigny fo mahery ho: "Misangana amigny tombonao hanao." Gny fa boakeo gny lelahy igny dra nisanga , nidikodikosy dra nandeha teo amigny magnodidy. ¹¹ Gny fa nahita anize nataon'i Paoly reo vahoaky maro be dra nanandrasy gny feony ereo, nizaka tamigny fizakanigny Lykonia ho: "Nizoso boaky andagnisagny ho amisika amigny endrik'olo gny Zagnahary." ¹² Nitoka an'i Barnabasy ereo ho: "Jopitera" dra i Paoly " Merkory", akory izy gny pandaha-teny. ¹³ Gny pisoron'i Jopitera, zay gny tepoly dra teo ivelanigny tana, dra ninday agnomby vo fehiloha vy teo ambavahady; izy vo gny vahoaky maro be nikasa hagnome soro. ¹⁴ Fa gny apostoly, Barnabasy vo i Paoly gny fa nahare anizay dra naniasy gny akazony ereo dra nandeha malaky ho ao agnatiny gny vahoaky, ntaray vo nizaka ho: ¹⁵ "Ry rahalahy, nagnino handrareo gny manao anizay raha zay? Izahay avo koa dra olombelo mitovy fahasapa amindrareo koa. Izahay minday gny filazasara ho andrareo, ba hindesandrareo hiala amizao zava-poa zao ho agny amin'Agnahary velo, ze nanao gny lagnisy, gny tany, dra gny ranomasy vo gny raha aby, Izy dra nagnenga gnyt firenena aby nandeha tamigny lalany manoka aby. ¹⁷ Kanefa, Izy dra sy nagnenga gny vatany sy hisy vavolombelo, tao amizay dra nanao gny soa Izy dra nagnome andrareo ranon'ora boaky andagnisy agny vo vani-potoa mahavokasy, dra hameno gny fondrareo amigny hany vo firavoravoa." ¹⁸ Fa na dre tamizay zaka zay aza, Paoly vo i Barnabasy dra sy nasahasy nihazo gny vahoaky maro be sy hanao soro ho anaereo ¹⁹ Fa gny Jiosy boaky ao Antiokia vo Ikonioma dra avy dra nandresy lahasy gny vahoaky. Ereo nitora-bato an'i Paoly vo nitariky anazy hiboaky gny tana, dra nieriserisy fa maty izy. ²⁰ Dra raha bo nizoro nagnodidy anazy teo reo pianasy, dra nisanga izy dra nilisy gny tana. Gny maraindray, dra nandeha nagna Derbe agny niaraky tamin'i Barnabasy izy. ²¹ Boak'eo ereo nitalily gny filazasara tao amize tana zay dra nahazo pianasy maro, nihery ta Lystra ao ereo. ta Ikonioma ao, vo ta Antiokia agny. ²² Ereo dra nanohy napahery gny fagnahin'ireo pianasy dra napirisiky anazy ba hanohy ao amigny finoa, no sady nizaka fa: "Sy maisy amigny fahoria maro be gny hilirasika ao amigny fazakan'Agnahary." ²³ Gny fa nanendry loholo ho anereo teo amigny isa-pengona ereo, vo nivavaky tamigny fifaliakany, dra natolon'ereo ho anigny Topo zay, ze ninoan'ereo. ²⁴ Dra nandalo tamigny Pisidia ereo dra niavy ta Panfilia. ²⁵ Gny fa nitalily gny zaka tao Perga ereo, dra nandeha nizoso ta Italia agny. ²⁶ Boak'agny ereo gny nitikisy sambo nizoso ho agny Antiokia, ze nahazoanereo fahasoavan'Agnahary ho anigny asa ze vitan'ereo amizao. ²⁷ Gny fa avy ta Antioka agny ereo dra namory niaraky gny fengona, dra nitatisy gny raha aby ze vitan'Agnahary tamin'ereo, vo ho ino gny namoahany vatrangaranigny finoa ho anireo Jentilisa. ²⁸ Dra nizano fotoa ela niaraky tamireo pianasy ereo.